ARUFUDAHANI 06
Ida liña lagumeserun ibagari?
“[Bungiu,] bídanñein lubuñe ibagari” (Sálumu 36:9). Afiñe humuti san le? Añahein gürigia saminatiña mama lan adügǘwarügüti ibagari. Anhein ítara liña lubéi, mebegiti wabagari. Ánheinti Heowá lubéi adügübalin ibagari, aniheinrügü liña labusenrun woun, adián? a Ariha huméi abahüdaguni le tídanbei Bíbülia luáguti lagumeseha ibagari ani ariha huméi ka lan uagu gayara lubéi lafiñerúniwa.
1. Ida liña lagumeserun sun katei?
Ariñagatu Bíbülia: “Dan le lagumeserunbei sun katei, aba ladügüni Bungiu sielu luma ubóu” (Agumesehani 1:1). Hiibe-agei aturiahatiña siensia ariñagatiña gagumeseha lan sun katei. Ida liña ladügüni Bungiu sun katei? Yusu lumuti lani sífiri sandu lun ladügüni sun katei, kéiburi waruguma luma sun le líbiri Ubóu (Agumesehani 1:2).
2. Ka un ladügei Bungiu Ubóu?
Mama lun ni kata ladügei Heowá Ubóu, adüga lumuti “lun haganóun gürigia” lidan (Isaíasi 45:18). Adüga lumuti Bungiu Ubóu lun aban lan fulasu le ídanti hasandiragua gürigia houngua buidu ani lun gayara lan hawinwandun lidan lun súnwandan (aliiha huméi Isaíasi 40:28 luma 42:5). Ariñagatiña aturiahatiña siensia aban lan fulasu espechaliti Ubóu. Úati amu Ubóu le ídanti ñein lan sun le hemegeirubei gürigia lun hawinwandun.
3. Ka adügübei lun amu hamá gürigia hawéi animaalugu?
Lárigiñe ladügüni Heowá Ubóu, aba ladügüni nadü hama animaalugu. Lárigiñe, aba ladügüni “Bungiu wügüri, lenege guánarügü ladügei” (aliiha huméi Agumesehani 1:27). Ka adügübei lun amu wamá hawéi animaalugu? Kei lenege guánarügü lubéi Bungiu ladügawa, gayaraati wáyeihani ligaburi, kéiburi ínsiñeni luma irichaü. Adüga lumutiwa giñe lau iyaraani lun wafurendeirun amu burí iñeñein, lun hínsiñe lan uremu woun luma waríagun katei buíduburiti. Mítarantiwa giñe kei animaalugu, lugundun gayaraati wáhuduragun lun Bungiu le adügübaliwa.
SIGÍ HUMÁ AFURENDEIRA
Ariha wamá fiu katei le arufudubalin Bungiu lan adügübalin sun luwuyeri ibagari le aniheinbei luma ka lan uagu gayara lubéi lafiñerúniwa le tabahüdagubei Bíbülia luagu ladügǘn sun katei. Ariha wameime ka lan larufudahabei hagaburi gürigia woun luagu Bungiu.
4. Anihein aban le adügübalin sun le gabagaribei
Ibihatiña gürigia uéiriguni luagu hadügün katei le áyeiharügü hamuti lídangiñe le ladügübei Bungiu. Kati íchugubalin uéiriguni lun Bungiu luagu le ladügübei? Ariha huméi BIDÉU, ábameti hayanuhan luagu álügüdahani le:
-
Ka burí katei áyeiha hamaalibei gürigia lídangiñe le ladügübei Bungiu?
Sun muna adügarügü lumutu somu gürigia. Kati adügübalin sun katei le aniheinbei? Aliiha huméi Ebüréu 3:4, ábameti hayanuhan luagu álügüdahani burí le:
-
Ka aweiridagüdübarun hanigi lídangiñe sun katei le adüga láalibei Bungiu?
-
Gayaraati san lafiñerúniwa adügǘwarügü lan Ubóu, sielu luma sun le aniheinbei? Ka uagu?
Subuditi san hun?
Hadariruba ariñahani luma burí bidéu luáguti katei le lidan jw.org. Áluaha huméi lidan “¿Lo diseñó alguien?” luma lidan “Opiniones sobre el origen de la vida”.
“Sun muna adügarügü lumutu somu gürigia; gama lumoun Bungiu adügübalin sun katei le aniheinbei”
5. Gayaraati lafiñerúniwa abahüdaguni le tídanbei Bíbülia luáguti ladügǘniwa sun katei
Lidan Agumesehani kapítulu 1, ariñaga tumuti Bíbülia ida liña lan ladügǘn Ubóu luma sun luwuyeri ibagari le lídanbei. Inarüni san abahüdaguni ligía, o úraga? Ariha huméi BIDÉU, ábameti hayanuhan luagu álügüdahani burí le:
-
Arufudahatu san Bíbülia lidan lan 6 weyu le lánina 24 oura ladügǘwa Ubóu luma sun ibagari le lídanbei?
-
Afiñetün san gayara lan lafiñerúniwa le tariñagubei Bíbülia luagu ladügǘniwa sun katei? Ka uagu?
Aliiha huméi Agumesehani 1:1, ábameti hayanuhan luagu álügüdahani le:
-
Hiibe-agei aturiahatiña siensia ariñagatiña gagumeseha lan sun katei. Úarati san le hariñagubei luma le sun líñabei haliihani tídangiñe Bíbülia?
Añahein gürigia álügüdagutiña houngua anhein adügarügü lubéi Bungiu aban katei gabagariti ani lárigiñe aba lígirun lun asaliragueina lan lidan ámuñegueinarügü luwuyeri ibagari. Aliiha huméi Agumesehani 1:21, 25, 27, ábameti hayanuhan luagu álügüdahani burí le:
-
Arufudahatu san Bíbülia adügarügü lan Bungiu aban katei gabagariti ani aba lígiruni lun asaliragueina lan úduraüme, animaalugu luma kei gürigia? O ligía guánarügü adügübalin kada aban lídangiñe “luwuyeri” ibagari le?
6. Mítarantiña gürigia kei le líbiri katei le ladügübei Bungiu
Mítarantiwa kei animaalugu. Aliiha huméi Agumesehani 1:26, ábameti hayanuhan luagu álügüdahani le:
-
Gayaraati harufudun gürigia ínsiñeni luma gudemehabu lugundun lenege guánarügü Bungiu ladügawa. Ka larufudahabei le hun luagu ligaburi Heowá?
LE HARIÑAGUBEI FIU GÜRIGIA: “Úraga sun le tabahüdagubei Bíbülia luagu ladügǘniwa sun katei”.
-
Agia huguya, ka hasaminarubei? Ka uagu?
LE HAFURENDEIRUBEI
Heowá adügübalin sielu luma Ubóu lau sun ibagari le lídanbei.
Águyuguagüdüni
-
Ka tarufudahabei Bíbülia luagu lagumeserun sun katei?
-
Adügarügüti san Bungiu aban katei gabagariti ani lárigiñe aba lígiruni lun lasaliragun úduraüme, animaalugume luma kei gürigia o adügarügü lumuti kada aban lídangiñe?
-
Ka uagu mítaran habéi gürigia kei le líbiri katei le ladügübei Bungiu?
FURENDEI HUMÁ LANWOUN
Ariha humá fiu katei le arufudubalin Bungiu lan adügübalin sun katei le geyegubei wau.
“¿Qué nos enseña la naturaleza?” (¡Despertad!, to lánina nefu-hati, irumu 2006)
Ariha huméi ida liña lan lafuranguagüdüni aban úguchili lun lisaani ka lan tabahüdagubei Bíbülia luáguti ladügǘn sun katei.
Ariha huméi anhein úara lubéi arufudahani luáguti saliguarügü lan sun katei lungua luma le tarufudahabei Bíbülia.
Ariha huméi hungua anhein arufuda lubalin katei burí le hadügübei aturiahatiña siensia luma burí binadu abun le hadarirubei anhein adügǘwarügü lubéi ibagari o saliguarügü lan lungua.
El origen de la vida. Cinco cuestiones dignas de análisis (garüdia)
a Lidan arufudahani 25, ayanuhóuati luagu ka lan uagu ladügaña Bungiu gürigia.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
