ARUFUDAHANI 07
Ka wasubudirubei luagu Heowá?
Ka ñǘbuinbei hichügüwagun dan le hasaminarun luagun Heowá? Añahein gürigia, aba hasaminarun wéiriya lan lisudinin Bungiu darí lun ni kata lan hagía ligibugiñe ani dise lan hawéi kei waruguma to warihiboun sielu ani siñati waguurunu. Saminatün san ítara liña lan Bungiu kei aban liñawan dan héreti ani mítaran lan kei aban gürigia le inarüniti? Kátima san wasubudirubei luagu Heowá? Yusu lumutu Heowá Bíbülia to Lererun lun lasubudiragüdün fiu lídangiñe ligaburi woun ani berese lan hau.
1. Ka uagu siñá lubéi warihini Bungiu?
“Sífiri Bungiu” (Huan 4:24). Mama aban gürigia le lauti abun luma ǘgürügü Heowá. Aban sífiri ligía le awinwandubei sielu, aban fulasu le giñe siñabei warihini.
2. Kéiburi ka igaburi luágubei Heowá?
Lau sun siñá lan warihini Heowá, sanditiwa ínsiñeni luagu dan le wasubudiruni lubuidun burí ligaburi. Ariñagatu Bíbülia: “Hínsiñeti irichaü lun Aburemei, ani mágurun lumutiña ha gúnfulibaña luma” (Sálumu 37:28). “Areidati Bungiu, gudemehabu ligía”, hámatima gürigia ha asufurirubaña (Santiagu 5:11). Yarafati Heowá “lun lesefuruniña ha gáribei hasandirunu hanigi, ha féridi hamaalibei hemenigin” (Sálumu 34:18). Subuditi san hun gayara lan wagundaaragüdüni Heowá o wírudagüdüni? Aban gürigia le anúadirati lun ladügün katei le wuribati, hírugüda lumuti Heowá (Sálumu 78:40, 41). Ánheinti gürigia le adügübalin le buídubei, gúndaagüda lumutu lanigi (aliiha huméi Ariñawagúni 27:11).
3. Ida liña larufuduni Heowá hínsiñe wamá lun?
Ínsiñeni ligaburi Heowá le súdinitimabei. “Ínsiñeni Bungiu” (1 Huan 4:8). Mámarügüñein tidan Lererun larufudei Heowá woun hínsiñe wamá lun, arufuda lumuti giñe lau katei burí le adüga láalibei (aliiha huméi Adügaü 14:17). Samina humá murusunraü luagu ida liña lan ladügüniwa. Adüga lumutiwa lau iyaraani lun warihin lubuidun burí koloru, waganbahan lubuidun burí uremu luma lun hínsiñe lan éigini semeeti woun. Busenti lun gunda lan wabagari.
SIGÍ HUMÁ AFURENDEIRA
Ariha waméi ka lan layusurubei Heowá lun ladügün lubuidun burí katei. Lárigiñe, ábame warihini ida liña lan larufuduni lubuidun burí ligaburi woun.
4. Sífiri sandu: lubafu Bungiu
Yusu wamuti wáhabu lun wawadigimaridun, ánheinti Heowá, lani sífiri sandu layusurubei. Arufudatu Bíbülia mama lan aban gürigia sífiri sandu, lubaragiñe lira, ariñagatu lubafu lan Bungiu le layusurubei lun burí ladügün katei. Aliiha huméi Lúkasi 11:13 luma Adügaü 2:17, ábameti hayanuhan luagu álügüdahani burí le:
-
Óunahati Bungiu sífiri sandu hawagun ha amuriahabalin. Saminatün san aban lan gürigia sífiri sandu o lubafu lan Bungiu? Ka uagu?
Yusu lumuti Heowá lani sífiri sandu lun ladügün lubuidun burí katei. Aliiha huméi Sálumu 33:6 luma 2 Féduru 1:20, 21, ábameti hayanuhan luagu álügüdahani le:
-
Ida liña layusuruni Heowá lani sífiri sandu?
5. Achawaha lumutiwa Heowá luouguoun lau lubuidun burí ligaburi
Lau sun aban lan meha lubúein Bungiu le úaraguati Moisesi, busenti meha lun buídutima lan lasubudiruni Bungiu le adügübalin. Ligía lariñagunbei Moisesi lun Bungiu: “Arufudahabei bémeri nun, gayara láamuga nasubudirunibu” (Áfuriduni 33:13, TNM). Dan le lóunabunbalin Heowá Moisesi, aba líridun fiu lídangiñe ligaburi lun. Aliiha huméi Áfuriduni 34:4-6, ábameti hayanuhan luagu álügüdahani burí le:
-
Ka lídangiñe ligaburi Heowá líridubei lun Moisesi?
-
Ka ligaburi Heowá hínsiñetimabei hun?
6. Bereseti Heowá hau gürigia
Idamuni meha ebüréugu, ha lumutuniña Bungiu, lidan binadu Ehiptu. Ka meha lasandirubei Heowá dan le larihiniña asufurira? Aganbaha huméi ARIÑAHANI AGANBAHÓUARÜGÜTI ani sigí huméi laliihóun tidan hibibülian, o aliiha huméi Áfuriduni 3:1-10. Ábameti hayanuhan luagu álügüdahani burí le:
-
Ka larufudahabei abahüdaguni le hun luagu ida liña lan lasandiragun Heowá lungua dan le larihiniña gürigia asufurira? (Ariha huméi bérusu 7 luma 8).
-
Afiñetün san busén lan Heowá líderaguniña gürigia ani gayara lan ladügüni? Ka uagu hasaminara ítara?
7. Ariha wamuti ligaburi Heowá lidan sun katei le adüga láalibei
Arufuda lumuti Heowá ligaburi lidan burí katei le adüga láalibei. Ariha huméi BIDÉU. Ábameti haliihani Rómana 1:20, lárigiñe ábame hayanuhan luagu álügüdahani le:
-
Ka lídangiñe ligaburi Heowá harihibei lidan katei le adüga láalibei?
LE HARIÑAGUBEI FIU GÜRIGIA: “Anihein Bungiu lidan sun fulasu ani hénrenguti lasubudirúniwa”.
-
Agia huguya, ka hasaminarubei?
-
Ka uagu hasaminara ítara?
LE HAFURENDEIRUBEI
Aban sífiri Heowá ligía siñá lubéi warihini. Ínsiñenitima larufudubei Heowá lídangiñe sun lubuidun burí ligaburi.
Águyuguagüdüni
-
Ka uagu siñá lubéi warihini Heowá?
-
Ka san sífiri sándubei?
-
Katei san fiu lídangiñe ligaburi Heowá?
FURENDEI HUMÁ LANWOUN
Subuditima huméi Heowá lau haturiahan luagu gádürü igaburi létima larufudubei.
“Ida liña ligaburi Bungiu?” (Garüdia Awisahatu, núm. 1 2019)
Ariha huméi ka burí lan katei arufudubei ua lan Heowá lidan sun fulasu.
“Anihein san Bungiu lidan sun fulasu?” (Ariñahani lídangiñeti jw.org)
Ariha waméi ka lan uagu tagúara Bíbülia lun sífiri sandu “lúhabu” Bungiu.
Hénrenguti meha lun aban wügüri marihinti lun lafiñerun berese lan Bungiu lau. Ariha huméi ka lan adügübei lun lasansiruni lisaminan.
“Ahora siento que puedo ayudar a los demás” (La Atalaya, to lánina 1 lidan diisi-hati, irumu 2015)
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
