ARUFUDAHANI 09
Ladügüba furíei lun hayarafadun lun Bungiu
Anihein san dan hasandirun megei humá adundehani lidan hibagari o óunabagülei lun somu álügüdahani? Mégeitün san gurasu o dǘgüdaguaü? Hínsiñeti hamuga san hun lúntima hasandiragun hungua yarafa lun Heowá? Gayaraati líderagunün furíei lidan sun lira. Ida luba wafurieidun? Aganba lumuti san Bungiu sun furíei? Ida luba hachoururuni laganbubei lan Bungiu hafurieidun? Ariha waméi.
1. Kaba un wafurieida ani ka gayaraabei wariñaguni lidan?
Arufudahati Hesusu lúnrügüba lan Wáguchi le siélubei wafurieida. Furíeiti meha Hesusu lun Heowá. Ariñagati: “Ítara luba lubeiti hafurieidun: ‘Wáguchi Bungiu le siélubei...’” (Matéu 6:9). Dan le wafurieidun lun Heowá, ábatima gamadagua wamá luma.
Lau sun gayara lan wayanuhan luagu furumiñeguarügü katei dan le wafurieidun, anhein busén wabéi lun lóunabuniwa Bungiu, moun lumuti wamuriahan katei le múaranti luma lugundan. Ariñagatu Bíbülia “ánhawa lan amuriaha furumiñeguarügü katei keisi lugundan, laganbubadiwa lan” (1 Huan 5:14). Íridati Hesusu fiu katei le gayaraabei wariñaguni lidan furíei (aliiha huméi Matéu 6:9-13). Amu luéi wafurieidun luagu le wemegeirubei, moun lumuti wabulieiduni weteingiruni Bungiu luagu le adüga láalibei wawagu luma wamuriahan hawagu amu.
2. Ida luba wafurieidun?
Adüga tumuti Bíbülia agunbirahani le woun: “Hadimureha lidan furíeigi [lun Bungiu] lau sun hemenigin” (Sálumu 62:8). Ligía lunti lubéi wafurieidun tídangiñe sun wanigi. Gayaraati wadügüni maniñu o lau umalali héreti, ñun, rara o lidan furumiñeguarügü igaburi le arufudati inebesei lun Heowá. Ani gayaraati wadügüni lidan furumiñeguarügü fulasu luma oura.
3. Ida liña lóunabuni Bungiu wafurieidun?
Óunabati Heowá lidan ámuñegueinarügü igaburi. Liibe-agei dan, yusu lumutu Bíbülia, to Lererun, lun lóunabuni álügüdahani le wadügübei. Chúgüdati taliihóun Lererun Bungiu “hau gürigia ha ǘnabugubaña” (Sálumu 19:7; aliiha huméi Santiagu 1:5). Dan le gaturobulin wamá, gayaraati líchugun Bungiu darangilaü woun o línchahaniña lubúeingu lun híderaguniwa dan le wemegeiruni.
SIGÍ HUMÁ AFURENDEIRA
Ariha huméi ida luba lan hafurieidun lun Bungiu tídangiñe sun hanigi lidan aban igaburi le auti lagundaara luma ida luba lan lanügün furíei buiti hun.
4. Dan le wafurieidun, anihein katei lagurabun Bungiu wámagiñe
Ka adügübei lun laganbuni Bungiu wafurieidun? Ariha huméi BIDÉU.
Busenti Heowá lun lúnrügüba lan wafurieida. Aliiha huméi Sálumu 65:2, ábameti hayanuhan luagu álügüdahani burí le:
-
Afiñetün san busén lan Bungiu le aganbubalin afurieiduni lun hafurieidun lun? Ka uagu?
Mosu wafalaruni lugumadin Bungiu lidan wabagari anhein busén wabéi lun laganbuni wafurieidun. Aliiha huméi Mikeasi 3:4 luma 1 Féduru 3:12, ábameti hayanuhan luagu álügüdahani le:
-
Ida luba wachoururuni laganbubei lan Bungiu wafurieidun?
Lidan aban wuribu, gayaraati hamuriahan biángubei áganiñu luma Bungiu lun líderaguniña agañeira. Gayaraati san wagurabun lóunabubei lan Bungiu furíei ítarati?
5. Lunti wafurieidun tídangiñe sun wanigi
Arufudahóuaali houn gürigia lun harisarun ariñageina ligiaméme burí dimurei. Hínsiñeti funa san luwuyeri furíei le lun Bungiu? Aliiha huméi Matéu 6:7, ábameti hayanuhan luagu álügüdahani le:
-
Ka gayaraabei wadügüni lun máguyuguagüdün wamani ligiaméme sagü wafurieidun?
Samina humá sagü weyu luagu somu katei buiti le asuseredubei lidan hibagari, ábameti heteingiruni Heowá luagu. Anhein hadüga, lúmounme lagumuchun aban dimaasu, furíeihadünme luagu sedü ámuñegueinarügü katei.
Busenti aban úguchili le buiti lun layanuhan lisaani lun tídangiñe sun lanigi. Busenti giñe Heowá lun wafurieidun lun tídangiñe sun wanigi.
6. Aban idewesei lúmagiñeti Bungiu furíei
Ida luba líderaguniwa furíei dántima le wásügürün lídangiñe lénrengunga? Ariha huméi BIDÉU.
Füramasetu Bíbülia gayara lan líderaguniwa furíei lun wasandirun darangilaü. Aliiha huméi Filipuna 4:6, 7, ábameti hayanuhan luagu álügüdahani burí le:
-
Lau sun magida lani furíei sun turobuli, ida luba líderaguniwa?
-
Ka hamuga katei uágubei habusenra hafurieidun?
Subuditi san hun?
Lúmagiñe lidan tidaani Bíbülia gumuati furíei lau dimurei “ítarala” (1 Krónikasi 16:36).
7. Sagá humá dan lun hafurieidun
Anihein dan, aba wabulieiduni wafurieidun ladüga gibe lan waberesegun. Ida liña meha larihini Hesusu furíei? Aliiha huméi Matéu 14:23 luma Márükosu 1:35, ábameti hayanuhan luagu álügüdahani burí le:
-
Ka meha ladügübei Hesusu lun gadaani lan lun lafurieidun?
-
Agia huguya, kaba hadüga lun hasagarun dan lun hafurieidun?
LE HARIÑAGUBEI FIU GÜRIGIA: “Lúnrügü lasandiragun gürigia lungua buidu lahuuda furíei”.
-
Agia huguya, ka hasaminarubei?
LE HAFURENDEIRUBEI
Yarafatiwa lun Bungiu dan le wafurieidun lun tídangiñe sun wanigi. Ruti giñe darangilaü woun luma erei le wemegeirubei lun wadügüni le lagurabubei wámagiñe.
Águyuguagüdüni
-
Kaba un wafurieida?
-
Ida luba wafurieidun?
-
Ida liña líderaguniwa furíei?
FURENDEI HUMÁ LANWOUN
Subudi huméi óunabagülei lun álügüdahani burí le hadügübei gürigia luagu furíei.
“Siete preguntas sobre la oración” (La Atalaya, to lánina 1 lidan diisi-hati, irumu 2010)
Aliiha huméi ka lan uagu buidu lubéi lun hafurieidun luma ida luba lan habuiduragüdüni ligaburi hadügüni.
“Ka uagu lunti lubéi nafurieidun?” (Ariñahani lídangiñeti jw.org)
Ariha huméi le tarufudahabei Bíbülia luagu kaba lan un wafurieida.
“Buiti san lun warisarun houn sandu?” (Ariñahani lídangiñeti jw.org)
Ariha huméi lidan bidéu lauti uremu le anhein súdini lubéi dan luma fulasu le ídanbei wafurieida.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
