ARUFUDAHANI 10
Lanügüba san hadamuridagun hama gefentiña luagu Heowá buiti hun?
Agunbirahóuaadün san lidoun hadamuridagun gefentiña luagu Heowá? Anhein mídinñahagidün lubéi, háfuga hasandirun anufudei láurügü hasaminarun hidin. Háfuga hálügüdagun hungua: “Ka san hadügübei Gefentiña lidan hadamuridagun? Ka uagu súdini lubéi houn? Lunti san nidin?”. Lidan arufudahani le, warihibei gayara lan lederebudagüdüni adamuridaguni humadagua luma Bungiu, barǘ ligíame buiti hun.
1. Ka resun súdinitimabei lun wadamuridagun?
Ariñaga lumuti aban abürühati Bíbülia ka lan resun súdinitimabei lun wadamuridagun: “Nalawahabei Aburemei hañúarü lumutuniña” (Sálumu 26:12). Uguñe weyu, óundaraguatiña giñe gefentiña luagu Heowá ani ruti katei le saragu ugundani houn. Lidan sun ubóu, óundaraguatiña sagü dimaasu lun halawahani Bungiu, heremuhan lun luma hafurieidun úara. Anihein dan lidan irumu, óundaraguatiña lidan burí sétanu le wéinamutimati.
2. Kaba hafurendeira lidan wadamuridagun?
Lidan adamuridaguni, ayanuhóuati tuagu Lererun Bungiu ani “aba tafuranguagüdüniwa lun gunfuranda hamani gürigia le aliihóubei” (aliiha huméi Neemíasi 8:8). Anhaün abasiiha lidoun adamuridaguni, hafurendeiruba saragu katei luagu Heowá luma luagu lubuidun burí ligaburi. Éibume afurendeireina humá luagu ínsiñeni le lasandirubei huagu, busentimabadün lun humada lan. Hafurendeirubei giñe ida luba lan líderagunün lun darangilu lan hibagari (Isaíasi 48:17, 18).
3. Kaba buiti hibiha lau hásügürün dan hama amu lidan wadamuridagun?
Amuriahati Heowá wama lun “wáfaagun wíderaguniña wíbirigu lun hínsiñehabu hamá, luma lun hadügüni le buídubei”, mígirun wameime wadamuridagun (Ebüréu 10:24, 25). Lidan wadamuridagun, hasubudiruba gürigia ha hínsiñeguatiña hámagua, ha giñe busenbaña hasubudirun luagu Bungiu, ítara kei huguya. Haganbuba giñe ariñahani tídangiñeti Bíbülia le ruti gurasu (aliiha huméi Rómana 1:11, 12). Hasubudiruba giñe gürigia dandu maríeitiña kei mamarieidungiña ha gúndaabaña lau sun gaturobulin hamá. Anihán fiu lídangiñe resun le uágubei labusenra Heowá lun wadamuridagun.
SIGÍ HUMÁ AFURENDEIRA
Ariha waméi ida liña lan hadamuridagun gefentiña luagu Heowá luma ka lan uagu buidu lubéi lun wáfaagun lun wadamuridagun.
4. Hadamuridagun gefentiña luagu Heowá
Lidan furumiñeti sígulu, héchutiña meha kristiánugu adamuridagua lun háhuduragun lun Heowá (Rómana 16:3-5). Aliiha huméi Kolosana 3:16, ábameti hayanuhan luagu álügüdahani le:
-
Ida liña meha háhuduragun furumiñetiña kristiánugu lun Heowá?
Uguñe weyu, héchutiña giñe Gefentiña óundaragua tidan Luban Hadamuridagun. Lun hasubudiruni ka lan adügǘbei lidan wadamuridagun, ariha huméi BIDÉU. Lárigiñe, aríagua huméi dibuhu lani aban lídangiñe wadamuridagun, ábameti hayanuhan luagu álügüdahani burí le:
-
Ida liña genegegua lan le adügǘbei tidan luban wadamuridagun luma le ariñawagúbei lidan Kolosana 3:16?
-
Lárigiñe harihini bidéu o dibuhu, anihein san somu katei le hínsiñeti hun lídangiñe wadamuridagun?
Aliiha huméi 2 Korintuna 9:7, ábameti hayanuhan luagu álügüdahani le:
-
Ka uagu mamuriahóun lubéi seinsu lidan hadamuridagun gefentiña luagu Heowá?
Ariha huméi, úara luma humaisturun, kaba lan ariñahani aturiahóua lidan leweñegua adamuridaguni.
-
Ka fánreinti lídangiñeti adamuridaguni le harihibei luagu lahuuduba lan hun?
Subuditi san hun?
Lidan páhina jw.org gayaraabei háluahani halía lan ani ka burí lan weyu ladügǘwa wadamuridagun lidan ámuñegueinarügü fulasu ubouagu.
-
A. Rúati burí yanu, arufudúati sügǘ, arihúa ligía bidéu lidan burí wadamuridagun. Gumeseti ani gumuti kada aban lídangiñe lau uremu luma furíei.
-
B. Anihein burí fánreinti lídangiñe adamuridaguni le ídanbei híchiga lílana damuriguaü óunabagülei.
-
CH. Gayaraati hachülürün sun ha busentiña: wügüriña, würiña, gürigia wéinamugaaña, irahüñü...
-
D. Lidan hadamuridagun gefentiña luagu Heowá mamuriahóunti seinsu.
5. Mégeiwati áfaaguni lun wadamuridagun
Samina wamá hawagun liduheñu Hesusu. Nasarétü meha hawinwanda ani lun hachülürün tidoun ténpulu to Herusalénboun sagü irumu, mosu meha héibugun kéiburi ǘrüwa weyu luéigiñe aban fulasu gawübüriti. Aliiha huméi Lúkasi 2:39-42, ábameti hayanuhan luagu álügüdahani burí le:
-
Afiñetün san mégeiwa lan meha áfaaguni lun ladügǘniwa wéiyaasu le Herusaléun?
-
Háfuga ka áfaaguni lunbei hadügüni lun habasiihan lidoun adamuridaguni?
-
Saminatün san buídubei lan áfaaguni ligía íbini hénrengu lan hun? Ka uagu?
Arufudahatu Bíbülia weiri lan lisudinin wadamuridagun lun wáhuduragun lun Heowá. Aliiha huméi Ebüréu 10:24, 25, ábameti hayanuhan luagu álügüdahani le:
-
Ka uagu lunti lubéi hechu wamá abasiiha lidoun adamuridaguni??
LE HARIÑAGUBEI FIU GÜRIGIA: “Mama mosu wadamuridagun, buídurügüti lau waturiahanu Bíbülia wábiñe”.
-
Kaba hamuga bérusu o hénpulu tídangiñeti Bíbülia hayusura lun harufuduni busén lan Heowá lun wadamuridagun?
LE HAFURENDEIRUBEI
Ladügüba habasiihan lidoun adamuridaguni lúntima hafurendeirun luagu Heowá, lederebugudun humadagua luma luma lun háhuduragun lun úara hama amu gürigia.
Águyuguagüdüni
-
Ka uagu lariñaga Heowá woun lunti lan wadamuridagun?
-
Kaba hafurendeira lidan hadamuridagun gefentiña luagu Heowá?
-
Ka amu buiti hasaminarubei gayaraabei lan hasagaruni lídangiñe adamuridaguni?
FURENDEI HUMÁ LANWOUN
Sanditün san anufudei láurügü hasaminarun hidin adamuridagua? Ariha huméi ka lan adügübei lun línsiñedun adamuridaguni lun aban wügüri le meha asandirubalin ligiaméme.
Subudi humá aban nibureinti le meha unbei weiri lan línsiñe adamuridaguni luma ka lan katei ladügübei lun merede lan labasiihan.
Aliiha huméi ka lan hasaminarubei amu luagu adamuridaguni.
Subudi huméi ida liña lan lasansirun libagari aban gürigia wuribati lárigiñebei lidin lidan aban hadamuridagun gefentiña luagu Heowá.
“No iba a ningún lado sin mi arma” (La Atalaya, to lánina 1 lidan sedü-hati, irumu 2014)
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
