ARUFUDAHANI 11
Sagá humá saragu buiti tídangiñe Bíbülia
Saminaadün san hadügün aban dasi wéiriti ani saminatün hénrengubei lan? Háfuga lun ménrengun lan, aba hagumeserun adügei murusun murusun. Ligiaméme asuseredubei dan le taliihóun Bíbülia. Háfuga álügüdagua humá hungua: “Halíagiñeba san nagumesera?”. Lidan arufudahani le, warihiba fiu adundehani le gayaraabei líderagunün lun hínsiñe lan taliihóun luma taturiahóun Bíbülia hun.
1. Ka uagu lunti lubéi waliihanu Bíbülia sagü weyu?
Gürigia le aliihabarun Lererun Bungiu, o “lilurudun Aburemei” sagü weyu, gúndaabei ani buídubei lidin lun lidan libagari (aliiha huméi Sálumu 1:1-3). Lun hagumeserun, áfaagua humá lun haliihanu fiu minutu sagü weyu. Éibume hasubudirunu Lererun Bungiu, hínsiñetimabei hun haliihanu.
2. Kaba íderaguaün lun hasagarun buiti lídangiñe taliihóun Bíbülia?
Lun wasagarun saragu buiti lídangiñe taliihóun Bíbülia, mosu wasaminarun luagun le waliihabei. Úati buídurügü lan lau waliihanu líburu to, mosu giñe wararamagun asaminara tuagun (Hosué 1:8). Danme le haliihanu, álügüdagua humá hungua: “Ka lariñagubei bérusu le nun luagu Heowá? Ida luba nawinwanduni le lariñagubei bérusu le? Ida luba nayusuruni lun níderaguniña amu?”.
3. Halíagiñeba san hasagara dan lun haliihanu Bíbülia?
Hénrenguti san hun lun hadarirun dan lun haliihanu Bíbülia? Ligiaméme asuseredubei houn saragu wádangiñe. Ligíati, houcha humá hayusuruni “hidaani lidan katei buiti” (Éfesuna 5:16). Gayaraati hadügüni lau hadireiruni ligiaméme oura sagü weyu lun haliihanu Bíbülia. Añahein gürigia saragiatiña lun haliihanu binaafin. Añahein amu, adüga hamuti lidan amu oura, kéiburi dan le hemeraagun lun heigin somu katei. Añahein, himei hamuti haliihanu guñoun lubaragiñe harumugun. Agia huguya, ka oura buídutimabei hun?
SIGÍ HUMÁ AFURENDEIRA
Ariha waméi kaba lan adüga lun hínsiñetima lan taliihóun Bíbülia woun, ida luba lan haranserun lubá haturiahanu luma hasagarun saragu buiti tídangiñe.
Ítara kei gayara lan línsiñedun amu éigini woun, gayaraati giñe línsiñedun taliihóun Bíbülia woun.
4. Le lunbei hadügüni lun línsiñedun taliihóun Bíbülia hun
Másiñati hénrengu lan woun wagumeserun aliihoun Bíbülia. Ítara kei gayara lan línsiñedun somu éigini woun, gayaraati giñe línsiñedun taliihoun woun. Aliiha huméi 1 Féduru 2:2, ábameti hayanuhan luagu álügüdahani le:
-
Afiñetün san anhein lan haliiha Bíbülia sagü weyu línsiñeduba lan taliihóun hun darime lun busentimabadün lan haliihanu?
Ariha huméi BIDÉU le lun hasubudirun fiu nibureintiña ha agumeserubaña asandira ínsiñeni luagu taliihóun Bíbülia. Ábameti hayanuhan luagu álügüdahani burí le:
-
Ka meha haturobulinbei nibureintiña ha warihubaña lidan bidéu?
-
Ka íderagubaliña lun mábürühan lan harüna?
-
Ida liña línsiñedun taliihóun Bíbülia houn?
Le gayaraabei hadügüni lun hagumeserun:
-
Anúadira humóun Bíbülia to uáguti gayara lan hafiñerun, to bürüwañuboun kei layanuhóun uguñe weyu. Houcha humá haliihanu Traducción del Nuevo Mundo anhein anuhein lubéi lidan hererun o lidan amu iñeñein le gunfuranda humuti.
-
Gumese humá lau haliihani létima hínsiñebei hun. Lun hagumeserun, ariha huméi kuáduru “Le gayaraabei hadügüni lun hagumeserun aliihoun Bíbülia”.
-
Makü huméi le aliiha humaalibei. Yusu huméi kuáduru “Le aliiha náalibei tídangiñe Bíbülia”, le tídanbei líburu to.
-
Yusu huméi programa JW Library®. Anhein harariragüda lidoun higagamurun o hikonputadoran, gayaraabei haliihanu o haganbahanu Bíbülia le ñein humuti.
-
Yusu humóun garüdia Adundehani lun taturiahóun Lererun Bungiu. Hadariruba burí mapa luma kuáduru ñein le gayaraabei líderagunün lúntima línsiñedun taliihóun Bíbülia hun.
5. Aranse humá lubá lichugún aturiahani hun
Aliiha huméi Sálumu 119:34, ábameti hayanuhan luagu álügüdahani burí le:
-
Ka uagu buidu lubéi lun hafurieidun lubaragiñe haliihanu Bíbülia o haranserun lubá lichugún aturiahani hun?
Ida luba hasagarun buiti lídangiñe haturiahanu Bíbülia? Danme haranserun lubá lichugún aturiahani hun, adüga huméi le:
-
Aliiha huméi burí párafu le lídanbei lagumeseha arufudahani.
-
Áluaha huméi ani aliiha huméi burí bérusu, houcha huguyame lun gunfuranda humani ka lan lánibei luma le haturiahabei.
-
Makü huméi burí dimurei le óunabubalin álügüdahani. Líderagubadün le danme le haturiahan luma humaisturun.
Subuditi san hun?
Lau sun yúsuhaña lan gefentiña luagu Heowá ámuñegueinarügü Bíbülia, hínsiñetimatu Traducción del Nuevo Mundo houn ladüga furangu tan, gayara lan lafiñerúniwa tuagu ani yusu tumuti liri Bungiu (ariha huméi ariñahani lídangiñeti jw.org: “Gabibüliantiña san gefentiña luagu Heowá houngua?” (Ariñahani lídangiñeti jw.org)
LE HARIÑAGUBEI FIU GÜRIGIA: “Hénrenguti taturiahóun Bíbülia. Madaanitina lun naturiahanu, henren ligía nun”.
-
Agia huguya, ka hasaminarubei?
LE HAFURENDEIRUBEI
Lúntima hasagarun buiti tídangiñe Bíbülia, góuratela haliihanu sagü weyu, furíei humá lun gunfuranda humanu ani aranse humá lubá haturiahanu.
Águyuguagüdüni
-
Kaba íderaguaün lúntima hasagarun buiti lídangiñe haliihanu Bíbülia?
-
Ka oura gayara lan haliihanu luma haturiahanu hábugua?
-
Ka uagu buidu lubéi lun haranserun lubá haturiahanu Bíbülia?
FURENDEI HUMÁ LANWOUN
Arihaya humá fiu adundehani le lunbei lídehan lúntima hasagarun buiti lídangiñe taliihóun Bíbülia.
Ariha humá ǘrüwa ligaburi taliihóun Bíbülia.
Ariha humá ida luba lan línsiñedun taliihóun Bíbülia hun.
Ariha huméi adundehani le híchugubei fiu gürigia ha barühaña saragu dan aliihoun Bíbülia.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
