ARUFUDAHANI 14
Ida luba wáhuduragun lun Bungiu kei aubei lagundaara?
Kei wafurendeiruni lidan arufudahani le lubaragiñebei le, mama sun relihión lun lagundaaruba lan Bungiu tau. Lau sun lira, gayaraati wáhuduragun lun Bungiu le adügübaliwa lidan aban igaburi le auti lagundaara. Ka ligaburi áhuduraguni o relihión “aubei lagundaara Wáguchi Bungiu”? (Santiagu 1:27). Ariha waméi le tarufudahabei Bíbülia.
1. Halía lafuranguagüdei Bungiu woun ida liña lan labusenrun lun wáhuduragun lun?
Mosu wáhuduragun lun Bungiu kei aubei lariñawagúa tidan Bíbülia. Ariñagati Hesusu lun Bungiu: “Bererun [...] inarünibei” (Huan 17:17). Anuhein burí relihión to ídanboun mafala hamani inarüni le tídanbei Bíbülia to Lererun Bungiu. Himei hamuti hafalaruni hechun luma harufudahan gürigia. Ani magundanti Heowá dan le meberesenwa lan lau lugumadin (aliiha huméi Márükosu 7:9). Ánheinti dan le gaganbadi wamá lun adundehani le líchugubei woun tidan Bíbülia, gúndaagüda wamutu lanigi.
2. Ida luba wáhuduragun lun Heowá?
Kei ligía lan adügübaliwa, garichati lun lúnrügüba lan wáhuduragua (Arufudúni 4:11). Mini lan lira mosu lan hínsiñe lan Bungiu woun ani lúnrügüba lan wáhuduragua, mayusurunga guáriua ni amu katei líbeina lira (aliiha huméi Isaíasi 42:8).
Mosu ábanbei lan katei le “sánduti ani le auti lagundaara Bungiu” ligaburi wáhuduragun lun (Rómana 12:1). Mini lan le mosu lan gaganbadi wamá lun lilurudun. Kei hénpulu, ha hínsiñehabubaña lun Heowá, gebegiti lilurudun houn ani falá hamuti lidan habagari keisi maríeitiña. Mafalatiña giñe échuni wuribati kéiburi tayusurún düroga, agumulahani o átaguni. a
3. Ka uagu lunti lubéi wáhuduragun lun Heowá úara hama gürigia ha gaganbadibaña lun?
Lidan burí adamuridaguni dimaasu-auti le wadügübei, daritiwa chansi lun walawahani Heowá lidan hadamurin “ha hínsiñehabubaña lun” (Sálumu 111:1, 2). Alawaha wamuti Heowá dan le weremuhan lun (aliiha huméi Sálumu 104:33). Amuriahati Heowá wama lun wadamuridagun ladüga hínsiñe wamá lun ani subudi lumuti líderagubadiwa lan lira lun wawinwandun lun súnwandan. Dan le wadamuridagun, rútiwa ani resibitiwa dǘgüdaguaü.
SIGÍ HUMÁ AFURENDEIRA
Ariha waméi ka lan uagu mabusenrun lubéi Heowá lun wayusurun guáriua lidan wáhuduragun. Ariha wagíame amu burí igaburi lun wáhuduragun lun Bungiu.
4. Moun lumuti wayusurun guáriua lidan wáhuduragun
Ida liña wasubudiruni mínsiñe lan katei le lun Bungiu? Ariha huméi BIDÉU, ábameti hayanuhan luagu álügüdahani le:
-
Lidan meha tidaani Bíbülia, ka asuseredubei dan hayusurunbei lumutuniña Bungiu guáriua lun háhuduragun lun?
Añahein gürigia hóuchatiña hayarafadun lun Bungiu lau hayusurun guáriua lun háhuduragun lun. Ma san hadisedagüdüñein Bungiu hawariua lau lira? Aliiha huméi Áfuriduni 20:4-6 luma Sálumu 106:35, 36, ábameti hayanuhan luagu álügüdahani burí le:
-
Ka burí guáriua o katei líbeina lira ariha humaalibei hayusurun gürigia lidan háhuduragun?
-
Ida liña lasandiragun Heowá lungua dan le hayusurun guáriua?
-
Ka hisaminanbei luagu hayusurún guáriua?
5. Ánhawa áhuduragua lúnrügü Heowá, wesefuruba luéi arufudahani mama inarüniti
Ariha waméi ida liña lan ladügün wáhuduragun lun Heowá kei aubei labusenra lun wesefurun luéi arufudahani mama inarüniti. Ariha huméi BIDÉU.
Aliiha huméi Sálumu 91:14, ábameti hayanuhan luagu álügüdahani le:
-
Ka füramase lubéi Heowá ladügübei lan wawagu ánhawa arufuda hínsiñe lan woun ani lúnrügüñein lan wáhuduragua?
6. Huduguatiwa lun Heowá dan le wadamuridagun
Dan le weremuhan lidan adamuridaguni luma dan le wíchuguni wóunabagüle, walawahañein Heowá ani wíchuguña dǘgüdaguaü wámagua. Aliiha huméi Sálumu 22:22, ábameti hayanuhan luagu álügüdahani burí le:
-
Hínsiñeti san hun haganbuni óunabagülei le híchugubei amu lidan burí adamuridaguni?
-
Hínsiñeti hamuga san hun lun haranserun aban óunabagülei lun híchuguni lidan adamuridaguni?
7. Hínsiñeti lun Heowá lun wayanuhan houn amu luagu le wafurendeirubei
Gayaraati wayanuhan houn amu luagu le wafurendeirubei tídangiñe Bíbülia lidan ámuñegueinarügü igaburi. Aliiha huméi Sálumu 9:1 luma 34:1, ábameti hayanuhan luagu álügüdahani le:
-
Ka hamuga habusenrubei habahüdagun houn amu lídangiñe le furendei humaalibei tídangiñe Bíbülia?
LE HARIÑAGUBEI FIU GÜRIGIA: “Anhein afiñe wabéi luagu Bungiu, meberesenti ida liña lan wáhuduragun lun”.
-
Agia huguya, ka hasaminarubei luagu katei le?
LE HAFURENDEIRUBEI
Gúndaagüda wamuti Bungiu le adügübaliwa dan le lúnrügüñein lan wáhuduragua, dan le walawahani lidan adamuridaguni luma dan le wayanuhan houn amu luagu le wafurendeirubei.
Águyuguagüdüni
-
Halía lafuranguagüdei Bungiu woun ida liña lan labusenrun lun wáhuduragun lun?
-
Ka uagu lunti lubéi lúnrügü lan Heowá wáhuduragua?
-
Ka uagu lunti lubéi wáhuduragun lun Heowá úara hama gürigia ha gaganbadibaña lun?
FURENDEI HUMÁ LANWOUN
Aliiha huméi ka lan uagu tasandiragua aban würi tungua séfuñu ani gúndaañu lárigiñebei máhuduragunharu lan houn guáriua.
“Ya no soy esclava de los fetiches” (La Atalaya, to lánina 1 lidan sedü-hati, irumu 2011)
Furendei huméi ka lan gayaraabei líderagunün lun híchugun óunabagülei lidan burí adamuridaguni.
“Alawaha waméi Heowá lidan damuriguaü” (Garüdia Awisahatu, eneru, irumu 2019)
Ariha huméi ida liña lan líderaguni adamuridaguni aban nibureinti lau sun meha hénrengu lan lun lun lidin.
Lau sun samina hamá saragu gürigia kristiánugu lan ayusurubalin gurúa, lunti san wayusuruni lidan wáhuduragun?
“Ka uagu mayusu habéi gefentiña luagu Heowá gurúa?” (Ariñahani lídangiñeti jw.org)
a Wabaruaguóunmeme wayanuhaba luagun burí katei le.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
