ARUFUDAHANI 17
Ida liña meha ligaburi Hesusu?
Eibu afurendeireina wamá luagu le meha ladügübei luma le lariñagubei Hesusu ya ubouagu, arihatiwa arufuda lan burí igaburi le adügübei lun busén wamá gamadagua wamá dandu luma Hesusu kei luma Heowá le Lúguchi. Katei san lubuidun burí igaburi ligía? Ka lunbei wadügüni lun wáyeihani Hesusu?
1. Ka idan genegegua lan Hesusu luma Lúguchi?
Barühali Hesusu saragu míñunu irumu sielu aríaguei Lúguchi le hínsiñehabubei luma afurendeira lúmagiñe. Ligía ábanmeme lubéi ligaburi lóuserun, lasaminarun luma lasandiragun lungua kei ligía (aliiha huméi Huan 5:19). Áyeiha lumuti Hesusu ligaburi Lúguchi buidu buidu darí lun lariñagun: “Le arihitina, larihiñein giñe Bungiu Úguchili” (Huan 14:9). Ligíati, anhein hasubudira Hesusu buidu buidu, hasubudirubei giñe Heowá buidu. Kei hénpulu, arufuda lumuti gudemehabu le meha lasandirubei Hesusu hawagu gürigia gudemehabu le lasandirubei Heowá huagu.
2. Ida liña larufuduni Hesusu hínsiñe lan Heowá le Lúguchi lun?
Ariñagati Hesusu: “Ítara luba [...] lasubudiruni ubóu luagu hínsiñe lan Núguchi nun, ani adüga nani le lubeibei nun” (Huan 14:31). Dan meha le ya lubéi Hesusu ubouagu, arufuda lumuti lueirin línsiñe Lúguchi lun lau gaganbadi lan lun íbini dan le hénrengu lan lun. Hínsiñeti meha lun Hesusu layanuhan luagu Lúguchi houn amu luma lun líderaguniña lun gamadagua hamá luma Lúguchi (Huan 14:23).
3. Ida liña larufuduni Hesusu hínsiñe hamá gürigia lun?
Ariñagatu Bíbülia gunda lan Hesusu “hau sun gürigia” (Ariñawagúni 8:31). Arufuda lumuti ínsiñeni ligía lau líchugun gurasu houn gürigia luma lau líderaguniña magurabunga ni kata hámagiñe. Adügati burí milaguru le arufudubalin lubafu luma lugudemehabu (Márükosu 1:40-42). Buiti meha lóuseruniña sun gürigia úouga himei lan aban luéi aban. Ruti meha dǘgüdaguaü luma emenigini houn sun gürigia haruma tanigi ha aganbubalin. Aranseñu liña meha lun lasufurirun luma lun lounwen hawagu sun gürigia ladüga hínsiñe hamá lun. Ani wéiritimati ínsiñeni le lasandirubei hawagu ha gaganbadibaña lun sun le larufudahabei (aliiha huméi Huan 15:13, 14).
SIGÍ HUMÁ AFURENDEIRA
Sigí wamá afurendeira luagu ligaburi Hesusu ani ariha waméi ida luba lan wáyeihani línsiñehabu luma líchigadi.
4. Hínsiñeti Lúguchi Hesusu lun
Lau le ladügübei Hesusu, arufuda lumuti woun ida luba lan warufuduni wínsiñehabu luagu Wabungiute. Aliiha huméi Lúkasi 6:12 luma Huan 15:10; 17:26. Lárigiñe haliiruni kada bérusu, ayanuha humá luagu álügüdahani le:
-
Ida luba wáyeihani Hesusu lau warufuduni wínsiñehabu lun Heowá?
Hínsiñehabuti meha Hesusu lun Lúguchi le siélubei ani gabügürüguati meha lafurieidun lun.
5. Bereseti Hesusu hau ha mégeibaña híderawagun
Saminatimati meha Hesusu hawagun amu sügǘ lau luouguoun. Téniti meha houn gürigia íbini dan le buchá lan luagu. Aliiha huméi Márükosu 6:30-44, ábameti hayanuhan luagu álügüdahani burí le:
-
Según abahüdaguni le, ida liña larufuduni Hesusu samina lan hawagun amu? (Ariha huméi bérusu 31, 34, 41 luma 42).
-
Ka uagu líderaguaña Hesusu gürigia hagía? (Ariha huméi bérusu 34).
-
Kei áyeiha lani Hesusu ligaburi Lúguchi, ka larufudahabei sun le hun luagu Heowá?
-
Ida luba warufuduni samina wamá hawagun amu kei meha ladügüni Hesusu?
6. Gíchigaditi Hesusu
Lau sun meha mibe lan lúmati Hesusu, gíchigaditi meha ani ínchaha lumutiwa lun wadügüni ligiaméme. Aliiha huméi Adügaü 20:35, ábameti hayanuhan luagu álügüdahani le:
-
Según le lariñagubei Hesusu, ka adügübei lun gunda wamá?
Ariha huméi BIDÉU, ábameti hayanuhan luagu álügüdahani le:
-
Ida luba gíchigadi wamá íbini mibe lan wámati?
Subuditi san hun?
Arufudahatu Bíbülia lunti lan wafurieidun lun Heowá lidan liri Hesusu (aliiha huméi Huan 16:23, 24). Ítara luba warufuduni teinki wamani le adüga láalibei Hesusu wawagu lun líderaguniwa lun gamadagua wamá luma Heowá.
LE HARIÑAGUBEI FIU GÜRIGIA: “Meberesenti Bungiu lau hasufurirun gürigia”.
-
Kei áyeiha lani Hesusu ligaburi Lúguchi, ida liña larufuduni le ladügübei berese lan Heowá wau?
LE HAFURENDEIRUBEI
Hínsiñeti Heowá lun Hesusu, hínsiñe hagía gürigia lun. Kei ítara liña lan Hesusu kei Lúguchi, éibutima hasubudiruni Hesusu, hasubudiratimabei Heowá.
Águyuguagüdüni
-
Ida luba warufuduni hínsiñe lan Heowá woun, ítara kei meha Hesusu?
-
Ida luba warufuduni hínsiñe hamá gürigia woun, ítara kei meha Hesusu?
-
Ka ligaburi Hesusu hínsiñetimabei hun?
FURENDEI HUMÁ LANWOUN
Ariha humá fiu lídangiñe ligaburi Hesusu le gayaraabei wáyeihani.
“Imitemos el ejemplo de Jesús” (Jesús: el camino, la verdad y la vida, páhina 317)
Furendei huméi ka lan uagu mosu lubéi wafurieidun lidan liri Hesusu.
“¿Por qué orar en el nombre de Jesús?” (La Atalaya, to lánina 1 lidan bián-hati, irumu 2008)
Ariñaga tumuti san Bíbülia ida liña lan meha laríawagun Hesusu?
“Ida liña meha laríawagun Hesusu?” (Ariñahani lídangiñeti jw.org)
Ka gayaraabei wafurendeiruni lídangiñe ligaburi lóuseruniña Hesusu würiña?
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
