ARUFUDAHANI 19
Kristiánugu san inarünitiña gefentiña luagu Heowá?
Kei gefentiña luagu Heowá, afiñetiwa wagía lan kristiánugubaña inarünitiña. Ka uéigiñe? Ayanuha wamá luagu lébuna wafiñen, iri le aubei wasubudirúa luma luagu ínsiñeni le warufudubei wámagua.
1. Ka lébunabei hafiñen gefentiña luagu Heowá?
Ariñagati Hesusu lun Heowá: “Bererun [...] inarünibei” (Huan 17:17). Ítara kei Hesusu, wagía gefentiña luagu Heowá, yusu wamutu Lererun Bungiu lébuname wafiñen. Ariha waméi hatatiraha gefentiña luagu Heowá ha uguñebaña weyu. Kéiburi lidan irumu 1870, tátiti aban sétanu aturiahatiña Bíbülia aturiahoun Lererun Bungiu buidu buidu. Bíbülia lébunaboun hafiñen, íbini múaran lan afiñeni ligía luma le arufudahóubei tidan burí ligilisi. Lárigiñe, aba hayanuhan hama amu luagu inarüni le hafurendeirubei tídangiñe Bíbülia. a
2. Ka uagu laguarúa woun gefentiña luagu Heowá?
Ariñagati Heowá lánigu lan gefentiña gürigia ha áhuduragubaña lun ladüga hariñaguni inarüni luagu houn amu (Ebüréu 11:4–12:1). Kei hénpulu, lidan meha binadu dan, wati Bungiu houn lánigu: “Huguya nánibei gefentiña” (aliiha huméi Isaíasi 43:10). Wáwati lun Hesusu “gefenti le gúnfulibei” (Arufudúni 1:5). Ligíati, lidan irumu 1931 wanúadirei iri gefentiña luagu Heowá wírime. Gúndaatiwa lau wanügüni iri le.
3. Ida liña háyeihani gefentiña luagu Heowá línsiñehabu Hesusu?
Wéiriti hínsiñe lani Hesusu disipulugu lun darí lun lanügüniña kei liduheñu (aliiha huméi Márükosu 3:35). Lídanñadiwa úarani, wagía gefentiña luagu Heowá, ani kei iduheñu wanügagua woungua lidan sun ubóu, ligía íbirigu lubéi wagúahan wámagua (Filemón 1, 2). Gaganbaditiwa giñe lun gumadi le: “Hínsiñe hamá hiduheñu luéigiñe Hesukrístu hun” (1 Féduru 2:17). Kei gefentiña luagu Heowá, arufudatiwa ínsiñeni lidan ámuñegueinarügü igaburi, kéiburi lau wíderaguniña wíbirigu lidan sun ubóu dan le megei hamá híderawagun.
SIGÍ HUMÁ AFURENDEIRA
Sigí humá afurendeira luagu le winwan hamaalibei gefentiña luagu Heowá ani ariha wamá amu burí katei le arufudubalin kristiánugu hamá ha inarünitiña.
Bíbülia lébunaboun hafiñen kristiánugu inarünitiña ani ayanuhatiña tuagu houn amu.
4. Bíbülia lébunaboun wafiñen
Ariñagati Heowá lidan aban profesía lachülürüba lan buga dan lun gunfurandawa lan inarüni le tídanbei Bíbülia buidu buidu. Aliiha huméi Danieli 12:4, ábameti hayanuhan luagu álügüdahani le:
-
Kaba buga aganwounda eibu haturiahanu lubúeingu Heowá Bíbülia?
Ariha huméi ida liña lan haturiahanu fiu wügüriña Lererun Bungiu, Charles Russell haganagua. Ariha huméi BIDÉU, ábameti hayanuhan luagu álügüdahani le:
-
Según warihini lidan bidéu, ida liña laturiahanu Charles Russell Lererun Bungiu úara hama ha híbiri?
Subuditi san hun?
Anihein dan sansi wamani ligaburi gunfuranda wamani fiu lídangiñe wafiñen. Ka uagu? Ladüga murusun murusun lan ladüga Bungiu lun gunfuranda wamanu Lererun, ítara kei murusun murusun lan ladüga Weyu lun larugoungadun darí lun gayara lan warihini sun katei buidu (aliiha huméi Ariñawagúni 4:18). Ligíati, lau sun masansirun tan Bíbülia, adügatiwa asansiruni lidan wafiñen eibu gunfuranda wamanu.
5. Úarati ligaburi wawinwandun luma iri le wanügübei
Ka uagu gefentiña lubéi luagu Heowá wíribei? Ariha huméi BIDÉU, ábameti hayanuhan luagu álügüdahani le:
-
Ka uagu buidu lubéi lun wasubudirúniwa kei gefentiña luagu Heowá?
Ka uagu lanúadira Heowá gürigia lun lánigume gefentiña? Ladüga kei ariñawagúaali lan saragu iyeeni luagu, gürigiaba ha adüga lun lasubudirúniwa Heowá lan Búngiubei le inarüniti. Ayanuha wamá luagu biama iyeeni le ariñawagúbei luagu.
Anuhein relihión arufudahatu busén lan Bungiu lun wayusurun guáriua lidan wáhuduragun lun. Aliiha huméi Fádirigu 26:1, ábameti hayanuhan luagu álügüdahani burí le:
-
Inarüni funa san katei le? Según bérusu le, ka inarünibei? Ka lasaminarubei Bungiu hawagu guáriua?
Añahein tábutigu relihión arufudahatiña Hesusu lan Bungiu le suntigabafubei. Aliiha huméi Huan 20:17, ábameti hayanuhan luagu álügüdahani burí le:
-
Inarüni funa san katei le? Según bérusu le, ka inarünibei? Ábanmeme san gürigia Heowá luma Hesusu?
-
Ida liña hasandiragun hungua luagu lóunahan Heowá gefentiña lun hasubudiragüdüni inarüni luagu luma luagu Liráü?
6. Hínsiñeguatiwa wámagua
Ariñagatu Bíbülia ítara haña lan kristiánugu kei ámuñegueinarügü lumegegun úgubu. Aliiha huméi 1 Korintuna 12:25, 26, ábameti hayanuhan luagu álügüdahani burí le:
-
Ka agurabúbei hámagiñe kristiánugu inarünitiña dan le harihin hasufuriruña lan amu kristiánugu?
-
Ariha humaali san ida liña lan harufudun gefentiña luagu Heowá ínsiñeni hámagua?
Dan le hasufurirun gefentiña luagu Heowá ha lídanbaña aban fulasu ubouagu, hóuchatiña hábirigu ha lídanbaña sun Ubóu lun híderaguniña lau lóufudagun. Lun harihin aban hénpulu, ariha huméi BIDÉU, ábameti hayanuhan luagu álügüdahani le:
-
Arufuda hamuti san gefentiña luagu Heowá hínsiñehabu lau híderaguniña ha mégeihabubaña? Ka uagu?
Arufudatiña kristiánugu inarünitiña ínsiñeni houn ha mégeibaña híderawagun.
LE HARIÑAGUBEI FIU GÜRIGIA: “Aban relihión iseri gefentiña luagu Heowá”.
-
Lúmagiñe ídabuga lagumesera Heowá agúara houn ha áhuduragubaña lun nánigu “gefentiña”?
LE HAFURENDEIRUBEI
Kristiánugu inarünitiña gefentiña luagu Heowá. Ítara waña kei iduheñu ha lídantiña sun ubóu ha áhuduragubaña lun Bungiu, ha anügübarun Bíbülia lébuname hafiñen ani arufudaha hamuti inarüni luagu Heowá.
Águyuguagüdüni
-
Ka uagu wanúadirei iri gefentiña luagu Heowá lun wírime?
-
Ida liña warufudun ínsiñeni wámagua?
-
Afiñetün san kristiánugu lan inarünitiña gefentiña luagu Heowá?
FURENDEI HUMÁ LANWOUN
Furendei humá luagu le winwan hamaalibei gefentiña luagu Heowá.
Los testigos de Jehová: una historia de fe viva. Parte 1: Salen de la oscuridad (1:00:53)
Ariha humá aban lídangiñe arufudahani le harufudubei gefentiña luagu Heowá iyeeni lan.
Darí humá óunabagülei lun furumiñeguarügü álügüdahani le hadügübei hawagu gefentiña luagu Heowá.
Ínchaha lumuti meha iyereehabúni Stephen lun ladügün wuribani houn amu. Furendei huméi ka lan larihibei hawagu gefentiña luagu Heowá le ínchahabalin lun lasansiruni libagari.
a Lúmagiñe irumu 1879, hadügüñoun gefentiña luagu Heowá Garüdia Awisahatu lun hafuranguagüdüni le tariñagubei Bíbülia.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
