Mínsiñeti chagaguaü lun Heowá (1 Korintuna 14:33). Ligía agurabúa lubéi lun ñein lan aransehani buiti hadan lumutuniña. Ka aransehani lídanbei damuriguaü kristiánu? Ida luba wídehan lun buidu lan léibugun sun katei?

1. Ka lichügüdinabei damuriguaü?

Kristu lichügüdinabei damuriguaü (Éfesuna 5:23). Lúmagiñe siélugiñe, lalidihañein Hesusu sun le hadügübei lumutuniña Heowá lidan sun Ubóu. Íridaali aban liraüraü sétanu hani wéiyaaña lidan afiñeni ha derebuguhaña lun hagía lan “musu úaraguati ani gunfuranda ligía”, le giñe subudiwabei kei Sétanu le Arihibei lau Hawadigimari Gefentiña luagu Heowá lidan sun Ubóu (aliiha huméi Matéu 24:45-47). Hagía adundehabaliña lumutuniña Heowá uguñe weyu kei meha hadügüni apostolugu hama wéiyaaña lidan afiñeni ha Herusalénbaña lidan furumiñeti sígulu (Adügaü 15:2). Mama wügüriña ha tábutigubaña lóundarun Heowá. Áluaha hamuti ladundehan Heowá tidan Lererun ani rédeitiña lábugiñe lererehan Hesusu.

2. Ka hawadigimaribei wéiyaaña lidan afiñeni?

Wügüriña ha barühaña saragu irumu eseriwida lun Heowá eseriwidubaña kei wéiyaaña lidan afiñeni. Yusu hamutu Lererun Bungiu lun harufudahan houn lílana damuriguaü, híderaguniña luma híchugun dǘgüdaguaü houn. Maguburahantiña íbirigu ha luagu hawadigimari. Adüga hamuti “lau ugundani keisi labusenruni Bungiu, [...] mama ladüga línsiñe seinsu” houn (1 Féduru 5:1, 2). Íderagua hamutiña ídehatiña lidan damuriguaü wéiyaaña lidan afiñeni, ha giñe gayaraabei heseriwidun kei wéiyaaña lidan afiñeni lau lásügürün dan.

Anúadirati Musu Úaraguati fiu wéiyaaña lidan afiñeni lun heseriwidun kei óunigirutiña sirkuitu. Abisidahatiña íbirigu ha saragu damuriguaü lun híchugun adundehani luma dǘgüdaguaü houn lílana. Gabaroun hamuti le tariñagubei Bíbülia lun hanúadiruniña íbirigu ha gayaraabei heseriwidun kei wéiyaaña lidan afiñeni o kei ídehatiña lidan damuriguaü (1 Timotéu 3:1-10, 12; Titu 1:5-9).

3. Ka lunbei ladügüni kada gefenti luagu Heowá?

Alawaha hamuti sun lílana damuriguaü liri Heowá dan le gafanran hamá lidan adamuridaguni luma dan le hapurichihan según le hayaraati (aliiha huméi Sálumu 148:12, 13).

 SIGÍ HUMÁ AFURENDEIRA

4. Aban alidihati le ruti awalidaguni Hesusu

Adügati Hesusu aban lubuidun agunbirahani woun. Aliiha huméi Matéu 11:28-30, ábameti hayanuhan luagu álügüdahani le:

• Ka luwuyeri alidihati Hesusu ani ida liña labusenrun lun wasandiragun woungua?

5. Winwan hamuti wéiyaaña lidan afiñeni le harufudahabei

1. A. Héreti hakipuruni wéiyaaña lidan afiñeni hamadagua luma Heowá ani íderagua hamutiña haduheñu lun hadügüni ligiaméme.

2. B. Góunigi hamutiña wéiyaaña lidan afiñeni sun lílana damuriguaü.

3. CH. Gabügürüguati hapurichihan wéiyaaña lidan afiñeni.

4. D. Arufudahatiña wéiyaaña lidan afiñeni, ídeha hagía lidan arumadahani luma lau amu burí dasi.

 6. Ídehatiwa hama wéiyaaña lidan afiñeni

Rutu Bíbülia resun dǘgüdati woun lun wídehan hama wéiyaaña lidan afiñeni. Aliiha huméi Ebüréu 13:17, ábameti hayanuhan luagu álügüdahani burí le:

• Ka uagu tariñaga Bíbülia lunti lan gaganbadi wamá lau sun wagundan houn ha anügübalin ubaraü lidan damuriguaü? Ka hasaminarubei luagu katei le?

Aliiha huméi Lúkasi 16:10, ábameti hayanuhan luagu álügüdahani le:

• Ka uagu lunti lubéi wídehan hama wéiyaaña lidan afiñeni íbini lidan katei le genegebei masudinin lan?

 LE HAFURENDEIRUBEI

Hesusu lichügüdinabei damuriguaü. Lábugiñeñanu lererehan Hesusu wéiyaaña lidan afiñeni ani ídehatiwa hama lau sun wagundan ladüga hóunigiruñadiwa lan, arufudaha hagía woun lau hani hénpulu.

Águyuguagüdüni

• Ka lichügüdinabei damuriguaü?

• Ida liña híderaguniña wéiyaaña lidan afiñeni lílana damuriguaü?

• Ka lunbei ladügüni kada lubúein Heowá?