ARUFUDAHANI 21
Ida liña lapurichihóun uganu buiti?
Málühali Heowá ayusurei Larúeihan lun lagumuchun lau sun haturobulin gürigia. Ida lubati wámanichun lau aban lubuidun ñunsu kei le? Busenti Hesusu lun hanügüni lánigu uganu le houn sun gürigia ubouagu (Matéu 28:19, 20). Ka katei adüga hamaalibei gefentiña luagu Heowá lun hagunfulirun lau gumadi lúmagiñeti Hesusu le?
1. Ida liña lagunfulirun Matéu 24:14 uguñe weyu?
Ariñagati Hesusu: “Lapurichihóuba uganu buiti le luáguti larúeihan Bungiu lidan sun ubóu” (Matéu 24:14). Gúndaatiña gefentiña luagu Heowá lau hagunfuliruni wadagimanu le. Apurichiha wamuti uganu buiti le lidan sun Ubóu lidan lóugiñe 1,000 iñeñein! Mégeitiwa saragu áfaaguni luma aransehani buiti lun wagunfulirun lau óunwenbu wadagimanu le. Siñabei hamuga wagunfulirun lau dasi le mibihinga lídehan Heowá.
2. Ka áfaaguni wadügübei lun wapurichihan houn gürigia?
Apurichihatiwa le ñein lumuti wadarira gürigia. Ani kei hadügüni kristiánugu ha lánina furumiñeti sígulu, apurichihatiwa “tidan burí muna” (Adügaü 5:42). Ítara liña gayara lan wayanuhan hama saragu míñunu gürigia sagü irumu. Keiti mama lubéi súnwandan wadariruniña gürigia hábiñe, apurichihatiwa giñe lidan burí fulasu le ñein lumuti hachülüra saragu gürigia. Súnwandan wáluahan chansi lun wayanuhan luagu Heowá houn amu luma luagu le lasaminarubei ladügün.
3. Kátaña san lúnbaña hapurichihani uganu buiti?
Mosu hapurichihani sun kristiánugu inarünitiña uganu buiti. Subudi wamuti lunti lan wadügüni dasi le. Adüga wamuti sun wayaraati lun wapurichihan ladüga subudi wamani esefuha lan uganu le ibagari (aliiha huméi 1 Timotéu 4:16). Maguburahantiwa lun wadügüni wadagimanu le ladüga ariñagatu Bíbülia: “Mafayeihantün lun hibihini ubafu le, maguburaha humá giñe luagu” (Matéu 10:7, 8). Íbiniti añahein lan gürigia ha maganbun hamutiwa, sigitiwa apurichihei uganu le ladüga ligía lan ábanbei lídangiñe ligaburi wáhuduragun lun Heowá ani adügati lun gunda lan.
SIGÍ HUMÁ AFURENDEIRA
Ariha waméi sun le hadügübei gefentiña luagu Heowá lun hapurichihan lidan sun Ubóu luma ida liña lan líderaguniwa Heowá.
Apurichihatiwa lidan sun ubóu: A) Kosu Rísiti, B) Meriga, CH) Benín, D) Tailandia, E) Yapu (Míküronesia), F) Suesia
4. Áfaaguatiwa lun wayanuhan hama sun gürigia
Adügatiña gefentiña luagu Heowá aban óunwenbu áfaaguni lun hapurichihani uganu buiti houn gürigia le ñein lumuti hadariraña. Ariha huméi BIDÉU, ábameti hayanuhan luagu álügüdahani le:
-
Ka hínsiñetimabei hun lídangiñe sun áfaaguni le hadügübei gefentiña luagu Heowá lun hapurichihan houn gürigia?
Aliiha huméi Matéu 22:39 luma Rómana 10:13-15, ábameti hayanuhan luagu álügüdahani burí le:
-
Ida liña larufuduni wapurichihan hínsiñe hamá gürigia woun?
-
Ida liña larihiniña Heowá ha apurichihabalin uganu buiti? (Ariha huméi bérusu 15).
5. Ídehatiwa luma Bungiu
Anihein saragu sügǘ le arufuduti Heowá lan adundehabalin wadagimanu lánina apurichihani. Ariha waméi le asuseredubei Néwaselanda. Dan meha le lapurichihaña lubéi aban gefenti luagu Heowá gíriti Paul tidan burí muna, aban rábounweyu, dariti aban würi to meha furíeiharuboun lun Bungiu, binaafin ligía, amuriaheina luma Heowá lau liri lun lóunahan somu gürigia íderaguoun lun tasubudiruni. “Ǘrüwa oura lárigiñe—liña Paul—, anaha meha ñein adaünha luagu tubenari”.
Aliiha huméi 1 Korintuna 3:9, ábameti hayanuhan luagu álügüdahani le:
-
Ida liña larufuduni sügǘ kéiburi le ladundehañein lan Heowá apurichihani?
Aliiha huméi Adügaü 1:8, ábameti hayanuhan luagu álügüdahani le:
-
Ka uéigiñe megei wabalin lídehan Heowá lun wagunfulirun lau dasi lánina apurichihani?
Subuditi san hun?
Súnwandan larufudahóun woun ida luba lan wapurichihan lidan burí adamuridaguni le adügǘbei labadinagua dimaasu. Anhein ñǘdünhadün lubéi lidan aban lídangiñe adamuridaguni le, ida liña harihin lun arufudahani le weresibirubei ñein?
6. Dan le wapurichihan, warufuduñein gaganbadi wamá lun gumadi le líchugubei Bungiu woun
Lidan furumiñeti sígulu, hóuchatiña meha láganiñu Hesusu lun hararamuniña disipulugu luéi hapurichihan. Ráramatiña meha furumiñetiña kristiánugu ligibugiñe lúrudu lun hachoururuni lapurichihóun “uganu lánina asalbaruni” luma lun hageindagun luéigiñe haricha lun hapurichihan (Filipuna 1:7). Adüga hamuti gefentiña luagu Heowá ligiaméme uguñe weyu. a
Aliiha huméi Adügaü 5:27-42, ábameti hayanuhan luagu álügüdahani le:
-
Ka uagu mararamun wabéi lubéi wapurichihan? (Ariha huméi bérusu 29, 38 luma 39).
ÁLÜGÜDAHANI LE HADÜGÜBEI FIU GÜRIGIA: “Ka uéigiñe hapurichiha gefentiña luagu Heowá tidan burí muna?”.
-
Kaba hamuga hóunaba?
LE HAFURENDEIRUBEI
Ru lumuti Hesusu gumadi houn lani disipulugu lun hapurichihani uganu buiti houn sun néchanigu. Líderaguñanu Heowá lumutuniña lun hadügüni dasi le.
Águyuguagüdüni
-
Ida liña lapurichihóun uganu buiti lidan sun ubóu?
-
Ida liña larufuduni wapurichihan hínsiñe hamá gürigia woun?
-
Afiñetün san gayara lan ladügün apurichihani lun gunda wamá? Ka uagu?
FURENDEI HUMÁ LANWOUN
Ariha huméi ida liña lan hapurichihan gefentiña luagu Heowá lidan uburugu wéinamuti.
Apurichihani lidan guririguaü lidan uburugu wéinamuti Parisi (5:11)
Ka hadügübei gefentiña luagu Heowá lun híderaguniña ha anurahabaña lídangiñe hageira?
Ru wamuti le hemegeirubei anurahatiña hageiragiñe houn lun gamadagua hamá luma Bungiu (5:59)
Aganba huméi le tariñagubei aban gürigia luagu ida liña lan lagundaaragüdünu tayusuruni tibagari lun tapurichihan.
Furendei humá luagu fiu kesi le gáñeiwaalibei ligibugiñe lúrudu ani ídehaali lun mararamun lan lapurichihóun uganu buiti.
a Kei Bungiu lubéi óunahabaliña gefentiña luagu Heowá apurichiha, memegeiruntiwa üma hámagiñe gumadimatiña lun wapurichihani uganu buiti.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
