Dan le lasuseredun somu lamiselu, álügüdaguatiña saragu gürigia houngua: “Ka uéigiñe?”. Wéiriti awalidaguni le wasandirubei dan le wasubudiruni ru tan Bíbülia óunabagülei furanguti lun álügüdahani le.

1. Ka ladügübei Satanási lun lagumeserun katei burí wuribati asusereda ubouagu?

Aba meha lebedaagun Satanási le Mafia lun Bungiu. Kei méhati busén lan Satanási lun lagumadihan hawagu amu, aba línchahani Adán tuma Ewa, ha meha furumiñetiña gürigia, lun hóundaragun lumoun lidan lebedaagun. Ani ibiha lumuti lau leyeedunu Ewa (Agumesehani 3:1-5). Aba ladügün lun tasaminarun mabusenrun lan Heowá lun tibihin somu katei buiti. Lariñaguña meha Mafia gúndaatimabaña lan gürigia ánhaña maganbadi lun Bungiu. Lariñaguñein meha Satanási furumiñeti iyeeni dan le lariñagunbei tun Ewa móunwenboun lan. Ligía tariñagunbei Bíbülia ye lan Mafia “ani ligía [lan] lúguchibei iyeeni” (Huan 8:44).

2. Ka lanúadirubei Adán tuma Ewa?

Wéiriti meha areida lan Heowá lun Adán tuma Ewa. Aba lariñagun houn gayara lan heigin lídangiñe tin furumiñeguarügü tídibu wewe to lídanboun fuluri-agei Edén, tídangiñerügübei lan aban meigin hamá (Agumesehani 2:15-17). Íbini ítara, hóutiña lídangiñe tin tídibu wewe tuguya. Aba tátügürün Ewa “aban tídangiñe, aba téiginu. Ñéingiñe [...], aba giñe leigin” Adán (Agumesehani 3:6). Ítara liña maganbadi hamá biángubei hagía lun Bungiu. Kei meha ua lan ni murusun mégeiti luagu Adán tuma Ewa, ménrengunti yebe meha houn lun hadügüni le buídubei. Lau hanúadirun lun maganbadi hamá lun Bungiu chuñu hau, hafigouhaña meha ani harufuduñein meha mabusenrun hamá lun lariñaguni Bungiu houn ka lan lunbei hadügüni lumoun le moun lubéi hadügüni. Súfuritiña saragu ladüga le hanúadirubei (Agumesehani 3:16-19).

3. Ka lanügübei le lanúadirubei Adán tuma Ewa woun?

Dan le maganbadi lubéi Adán tuma Ewa lun Bungiu, aba gafigoun hamá ani sügügüda hamuti figóu ligía houn hadügawagun. Ariñagatu Bíbülia luagu Adán: “Ítara kei lídangiñe lan meha aban wügüri lebelura figóu ubouagun, belú ligía óunweni lídangiñe figóu, ítara liña giñe hóunweguba lubéi sun gürigia lugundun afigouhaaña súngubei” (Rómana 5:12).

Kati uagu wasufurira? Anihein dan, ladüga luriban wanúadirun. Anihein giñe dan, ladüga wuriba lan le hanúadirubei amu gürigia. Ani anihein dan, súfuritiwa ladüga lídanñadiwa lan somu fulasu o oura le ñein lubéi lasusereda somu katei le magaradahan wabéi (aliiha huméi Apurichihati 9:12).

 SIGÍ HUMÁ AFURENDEIRA

4. Le gadurunbei luagu wasufurirun

Afiñetiña saragu gürigia Bungiu lan agumadihabalin ubóu. Inarüni san lira? Ariha huméi BIDÉU.

Aliiha huméi Santiagu 1:13 luma 1 Huan 5:19, ábameti hayanuhan luagu álügüdahani le:

• Bungiu san gadurunbei luagu asufuriruni luma wuribani?

5. Ka lanügübei lagumadihan Satanási?

1. A. Úati meha mégeiti luagu Adán tuma Ewa ani lidan meha Paraísu hawinwanda. Gama lumoun, aba haganbuni Satanási, ábati hebedaagun lun Heowá.

2. B. Lárigiñebei hebedaagun furumiñetiña gürigia lun Bungiu, aba labuinchun ubóu lau figóu, asufuriruni luma óunweni.

3. CH. Lagumuchuba Heowá lau figóu, asufuriruni luma óunweni. Ábayameti hawinwandun gürigia mafigounga lidan aban paraísu.

 6. Mínsiñeti lun Heowá larihiniwa asufurira

Bereseti san Bungiu lau wasufurirun? Ariha huméi le labürüdübei urúei Dawidi luma apostolu Féduru. Aliiha huméi Sálumu 31:7 luma 1 Féduru 5:7, ábameti hayanuhan luagu álügüdahani le:

• Ida liña hasandiragun hungua lau hasubudiruni ariha lani Heowá wasufurirun ani berese lan lau?

 LE HAFURENDEIRUBEI

Satanási hama bián furumiñetiña gürigia, hagíatima gadurunbaña luagu sun wuribani le ubouagubei. Mínsiñeti lun Heowá larihiniwa asufurira, ligía lagumuchuba lubéi lau asufuriruni yarafa madise.

Águyuguagüdüni

• Ka meha iyeeni lariñagubei Mafia tun Ewa?

• Lau lebedaagun Adán tuma Ewa lun Heowá, ka lanügübei lira woun?

• Ida liña wasubudiruni mínsiñe lan lun Heowá larihiniwa asufurira?