ARUFUDAHANI 27
Ida liña lasalbaruniwa lounwen Hesusu?
Aba meha maganbadi lan Adán tuma Ewa, ha furumiñetiña gürigia, lun Bungiu. a Ligía gafigoun wabéi, wasufurirunbei ani hilagua wagía. Lau sun lira, anihein emenigini! Adügaali Heowá aransehani lun lesefuruniwa luéi figóu luma óunweni lau layusuruni Hesukrístu, le Liráü. Arufudahatu Bíbülia fayei lani Hesusu lebegi asalbaruni lau lounwen. Lebegi asalbaruni liña laguarún lun ebegi le afayeirúbei lun lesefurún somu gürigia. Ani lau líchuguni libagari le úabei mégeiti luagu lafayeirei Hesusu lebegi asalbaruni (aliiha huméi Matéu 20:28). Lau sun lugundan Hesusu lígirei liricha lun lawinwandun lun súnwandan ya ubouagu. Ítara liña ladaaruni üma lun wibihini sun le leferidirubei Adán tuma Ewa. Arufuda lumuti giñe lira, weiri lan wínsiñe dandu lun Heowá kei lun Hesusu. Laganwoundagüdübei arufudahani le heteingiradi luagu lounwen Hesusu.
1. Ka buiti gayaraabei lanügüni lounwen Hesusu woun uguñe weyu?
Kei gafigoun wabéi, adügatiwa saragu katei le mínsiñeti lun Heowá. Lau sun lira, gayaraati lumadagu wamá Heowá, ánhawa asaküriha luagu wafigoun tídangiñe sun wanigi ani amuriaha wagíame luma lun feruduna lániwa lidan liri Hesusu, áfaagua wagíame lunya méiguadun wamá lidoun ligiaméme charati (1 Huan 2:1). Ariñagatu Bíbülia hilá lan Kristu “luagu wafigoun aban wéiyaasu lun sun dan. Madurunti yebe, gama lumoun aba lasufurirun wawagu, wagía le salufuribei, lun lanügüniwa lun Bungiu” (1 Féduru 3:18).
2. Ka buiti gayaraabei lanügüni lounwen Hesusu woun ámuñegü?
Óunaha lumuti Heowá Liráü lun líchuguni libagari le úabei mégeiti luagu “lun sun lan ha afiñerutiña luagu [Hesusu] meferidirun hamaamuga, gabagarirügü hamaamuga aban ibagari le magumuchaditi” (Huan 3:16). Seremei le ladügübei Hesusu, málühali Heowá agidarei sun katei wuribati le lanügübei maganbadi lan Adán. Mini lan le, ánhawa lan arufuda afiñe wamá luagu lani Hesusu sákürifisiu, gachansinbadiwa lan lun wawinwandun lun súnwandan ubouagu danme le paraísuhali (Isaíasi 65:21-23).
SIGÍ HUMÁ AFURENDEIRA
Gunfurandatima huméi ka lan uagu líchigei Hesusu libagari wawagu ani ariha huméi ida luba lan lanügün katei le buiti hun.
3. Sefu lumutiwa lounwen Hesusu lídangiñe figóu luma óunweni
Ariha huméi BIDÉU, ábameti hayanuhan luagu álügüdahani le:
-
Ka chansi leferidirubei Adán dan le maganbadi lubéi lun Bungiu?
Aliiha huméi Rómana 5:12, ábameti hayanuhan luagu álügüdahani le:
-
Ka lanügübei lifigoun Adán hun?
Aliiha huméi Huan 3:16, ábameti hayanuhan luagu álügüdahani le:
-
Ka uagu lóunahei Heowá Liráü ubouagun?
-
Aban meha wügüri le úati mégeiti luagu Adán. Ábati maganbadi lan lun Bungiu ani adügati lira lun gafigoun hamá gürigia, hilagua hagía.
-
Aban meha wügüri le úati mégeiti luagu Hesusu, gaganbaditi lun Bungiu ani adügati lira lun gachansin hamá gürigia lun mafigoun hamá luma lun hawinwandun lun súnwandan.
4. Gayaraati lanügün lounwen Hesusu buiti houn sun gürigia
Ariha huméi BIDÉU, ábameti hayanuhan luagu álügüdahani le:
-
Ida liña lanügün lounwen ábanrügü gürigia buiti houn sun gürigia?
Aliiha huméi 1 Timotéu 2:5, 6, ábameti hayanuhan luagu álügüdahani le:
-
Aban meha wügüri le úati mégeiti luagu Adán, danti le lafigouhanbei, alugura lumutiña sun gürigia lun figóu luma óunweni. Aban meha giñe wügüri le úati mégeiti luagu Hesusu, ida liña lagunfulirun lounwen lau le mégeiwabei lun gayara lan hasalbarun gürigia?
5. Aban idewesei lúmagiñeti Heowá hun lebegi asalbaruni
Ariha hamuti lumadagu Heowá lebegi asalbaruni kei aban idewesei le líchugun Heowá lun kada aban hádangiñe. Lun harihin aban hénpulu, aliiha huméi Galasiana 2:20, ábameti hayanuhan luagu álügüdahani le:
-
Ka dimurei le lariñagubei apostolu Pábulu arufudubalin ariha lani lebegi asalbaruni kei aban idewesei le ichugúti lun?
Dan le lafigouhanbei Adán, siádiwati hau sun ladügawagun lun óunweni. Óunaha lumuti Heowá Liráü ubouagun lun lounwen lun gachansin humá lun hawinwandun lun súnwandan.
Sun haliihañein lan bérusu burí le, houcha humá lun hasaminarun luagun ida liña lan meha lasandiragun Heowá lungua lau larihini Liráü asufurira. Aliiha huméi Huan 19:1-7 luma 16-18, ábameti hayanuhan luagu álügüdahani le:
-
Ka hasandirubei dan le hasaminarun luagun le ladügübei Heowá luma Hesusu huagu?
ÁLÜGÜDAHANI LE HADÜGÜBEI FIU GÜRIGIA: “Ida liña gayara lan ladügün lounwen ábanrügü wügüri lun hasalbarun sun gürigia?”.
-
Kaba hamuga hóunaba?
LE HAFURENDEIRUBEI
Adügati lounwen Hesusu lun feruduna lani Heowá wafigoun luma lun gachansin wamá lun wawinwandun lun súnwandan.
Águyuguagüdüni
-
Ka uagu lounwe Hesusu?
-
Ida liña lagunfulirun lounwen Hesusu lau le mégeiwabei lun lafayeirún lebegi asalbaruni?
-
Ida liña lanügün lounwen Hesusu buiti hun?
FURENDEI HUMÁ LANWOUN
Furendei huméi ka lan uagu seriwi lubéi libagari Hesusu, le úabei mégeiti luagu, kei lebegi asalbaruni.
Furendei huméi ka lan lunbei wadügüni lun wasalbarun.
“Ida liña lasalbaruniwa Hesusu?” (Ariñahani lídangiñeti jw.org)
Feruduna lumuti san Heowá íbini figóu le wéinamuti?
“Álügüdahani burí tuagu Bíbülia” (Garüdia Awisahatu, to lánina 1 lidan seingü-hati, irumu 2013)
Lárigiñebei lafurendeirun aban wügüri luagu lani Kristu sákürifisiu, íderagua lumuti lira lun lasansiruni ligaburi.
“Ya no soy esclavo de la violencia” (Ariñahani lídangiñeti jw.org)
a Mámarügüñein katei burí wuribati le wadügübei figoubei, figóu giñe luriban gádantiwa le galagante wabéi lúmagiñe Adán tuma Ewa.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
