ARUFUDAHANI 28
Arufuda huméi heteingiradi luagu le ladügübei Heowá luma Hesusu huagu
Ida liña hasandiragun hungua dan le líchugun aban humada aban lubuidun idewesei hun? Másiñati aba lan hagundaarun ani aba habusenrun harufuduni lun humada teinki humani luagu idewesei ligía. Heowá luma Hesusu íchugubalin idewesei buítimati le gayaraabei heresibiruni gürigia: Lebegi asalbaruni. Ariha waméi ida luba lan warufuduni weteingiradi luagu.
1. Ida luba warufuduni weteingiradi lun Bungiu luma lun Kristu luagu le hadügübei wawagu?
Füramasetu Bíbülia “sun lan ha afiñerutiña luagu [Hesusu]” habihiba lan ibagari le magumuchaditi (Huan 3:16). Ida liña larufuduni gürigia afiñe lan luagu Hesusu? Úati buídurügü lan wafiñerun luagu. Mosu giñe warufuduni wafiñen lau le wanúadirubei luma le wadügübei (Santiagu 2:17). Dan le warufuduni wafiñen lau le wadügübei luma le wariñagubei, héregüda wamuti wamadagua dandu luma Hesusu kei luma Heowá, le Lúguchi (aliiha huméi Huan 14:21).
2. Ka adamuridaguni espechaliti íchugubei chansi woun lun warufuduni weteingiradi lun Heowá luma lun Hesusu luagu le hadügübei wawagu?
Guñoun le lubaragiñebei lounwen Hesusu, ariñaga lumuti houn lani disipulugu ka lan lunbei hadügüni lun harufuduni heteingiradi luagu lani sákürifisiu. Gumeseti aban adamuridaguni espechaliti, le unbei tagúara Bíbülia “Ladinerun Aburemei”, le giñe subudiwabei kei Laritaguagüle lounwen Kristu (1 Korintuna 11:20, TNM). Gumese lumuti Hesusu adamuridaguni le lun haritaguni lani apostolugu—hama sun kristiánugu inarünitiña ha nǘbuinbaña hárigiñe—ru lani libagari wawagu. Dan le layanuhanbei Hesusu luagu adamuridaguni le, ru lumuti gumadi le: “Lúmagiñe guentó, adüga huméi le, haritaguagüleme nuagun” (Lúkasi 22:19). Dan le hachülürün lidoun Aritaguagülei, arufuda humuti heteingiradi luagu lueirin ínsiñeni le lasandirubei Heowá luma Hesusu wawagu.
SIGÍ HUMÁ AFURENDEIRA
Ariha wamá amu igaburi lun warufuduni weteingiradi luagu lueirin línsiñehabu Heowá luma Hesusu. Warihibei giñe lunti lan ladügǘn Laritaguagüle lounwen Kristu.
3. Ida luba warufuduni weteingiradi?
Samina humá hañaradaguña lan ani aba lesefurunün aban gürigia. Habulieiduñein hamuga san le ladügübei gürigia ligía huagu lau lóufudagun? O háluahaña hamuga ida luba lan heteingiruni?
Dúei wamuti wabagari lun Heowá. Aliiha huméi 1 Huan 4:8-10, ábameti hayanuhan luagu álügüdahani burí le:
-
Ka uagu aban lubéi idewesei espechaliti lani Hesusu sákürifisiu?
-
Ida liña hasandiragun hungua dan le hasaminarun luagu le ladügübei Heowá luma Hesusu huagu?
Ida luba warufuduni weteingiradi lun Heowá luma lun Hesusu luagu le hadügübei wawagu? Aliiha huméi 2 Korintuna 5:15, 1 Huan 4:11 luma 5:3. Lárigiñe haliiruni kada bérusu, ayanuha humá luagu álügüdahani le:
-
Según lariñaguni bérusu le, ka lunbei wadügüni lun warufuduni weteingiradi?
4. Áyeiha waméi Hesusu
Gayaraati giñe warufuduni weteingiradi lau wáyeihani Hesusu. Aliiha huméi 1 Féduru 2:21, ábameti hayanuhan luagu álügüdahani le:
-
Ida luba hafalaruni Hesusu lau úaraguni?
Hínsiñetu meha Lererun Bungiu lun Hesusu, apurichiha lumuti uganu buiti ani íderagua lumutiña amu gürigia.
5. Chülǘ wamá lidoun Laritaguagüle lounwen Kristu
Lun hasubudiruni ida liña lan meha ladügǘn Ladinerun Aburemei luagu furumiñeti wéiyaasu, aliiha huméi Lúkasi 22:14, 19, 20. Ábameti hayanuhan luagu álügüdahani le:
-
Ka asuseredubei lidan Ladinerun Aburemei?
-
Ka mini tubéi fein tuma diwéin? (Ariha huméi bérusu 19 luma 20).
Busenti meha Hesusu lun hadügüni lani disipulugu Ladinerun Aburemei aban wéiyaasu luagu irumu lidan luéyuri lóunwegüle. Ligía hóundaragunbei gefentiña luagu Heowá sagü irumu lun haritaguni lounwen Kristu ani adüga hamuti kei larufudahani. Lun hasubudiruni ida liña lan ladügǘn adamuridaguni le, ariha huméi BIDÉU, ábameti hayanuhan luagu álügüdahani le:
-
Ka adügǘbei lidan Aritaguagülei?
Lúgubu Kristu le úabei mégeiti luagu, le lederegerubei wawagu, mini tubéi fein. Ánhounti diwéin, lita Kristu mini tubéi.
LE HARIÑAGUBEI FIU GÜRIGIA: “Lun wasalbarun, buídurügüti lau wafiñerun luagu Hesusu”.
-
Ida luba hamuga hayusuruni Huan 3:16 luma Santiagu 2:17 lun hafuranguagüdüni mosu lan giñe ladügǘn amu katei?
LE HAFURENDEIRUBEI
Arufuda wamuti weteingiradi luagu le ladügübei Hesusu wawagu lau warufuduni wafiñen luagu luma lau wachülürün lidoun Laritaguagüle lounwen.
Águyuguagüdüni
-
Ida liña larufuduni gürigia afiñe lan luagu Hesusu?
-
Busentün san harufuduni heteingiradi lun Heowá luma lun Hesusu luagu le hadügübei huagu? Ida luba hadügüni?
-
Ka uagu lunti lubéi hachülürün lidoun Laritaguagüle lounwen Kristu?
FURENDEI HUMÁ LANWOUN
Ka un línchahawa lounwen Kristu?
Yusu lumuti Hesusu lúgubu lun líchugun uéiriguni lun Heowá (9:28)
Furendei humá amu katei luagu afiñeni luma ida luba lan larufudún.
“Afiñe wamá luagu lani Heowá füramasei” (Garüdia Awisahatu, diisi-hati, irumu 2016)
Sánsiti meha tibagari aban würi lárigiñebei gunfuranda tani ka lan mini lubéi lani Hesusu sákürifisiu. Aliiha humá tuagu lidan abahüdaguni luáguti ibagari le gíribei “Me siento limpia, viva y en paz”.
“La Biblia les cambió la vida” (La Atalaya, to lánina 1 lidan widü-hati, irumu 2011)
Ariha huméi ka lan uagu mibe habéi éigitiña tídangiñe fein gurá hagía tídangiñe diwéin lidan Laritaguagüle lounwen Kristu.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
