ARUFUDAHANI 32
Gumeseeli Larúeihan Bungiu agumadiha!
Gumeseti Larúeihan Bungiu agumadiha sielu lidan irumu 1914. Lídanmeme irumu ligía lagumesera lagumuhóun dan lun harúeihan gürigia. Ida liña wasubudiruni? Warihaali le tariñagubei Bíbülia lidan profesía, le asuseredubei uguñe weyu luma ida liña lan hóuserun gürigia lúmagiñe irumu 1914.
1. Ka tariñagubei Bíbülia lidan profesía?
Ariñaga taali meha liliburun Danieli lagumeseruba lan Larúeihan Bungiu agumadiha lárigiñe aban dan gíriti “sedü irumu” (Danieli 4:16, 17). Saragu sígulu lárigiñe, ayanuhati Hesusu luagu ligiaméme dan lau dimurei “dan le ichugúbei houn” ha mámabaña huríu ani arufudati magumuchungili lan meha dan ligía (Lúkasi 21:24). Keime warihini, gumuti sedü irumu ligía lidan irumu 1914.
2. Ka asuseredubei ubouagu ani ida liña hagaburi gürigia lúmagiñe irumu 1914?
Álügüda hamuti meha disipulugu Hesusu “ídaba lan lasusereda sun le ani kaba lan liseinin [...] lagumuchagüle ubóu” (Matéu 24:3). Aba lóunabuniña Hesusu lau lariñagun houn kaba lan burí katei asusereda lárigiñe lagumeserun arúeiha sielu kei Lurúeite Larúeihan Bungiu. Ariñagati houn ñeinbei lan ilamaü, wuribu luma hárabaganali (aliiha huméi Matéu 24:7). Ariñagatu giñe Bíbülia ladügüba lan ligaburi hóuserun gürigia lidan “lagumuhóun dan” lun hénrengu lan ibagari (2 Timotéu 3:1-5). Furangutimahali larihíniwa igaburi burí le lúmagiñetima irumu 1914.
3. Ka uagu wuribatimahali lubéi katei ubouagu lúmagiñe lagumeserun Larúeihan Bungiu agumadiha?
Murusun dan lárigiñe lagumeserun Hesusu arúeiha kei Lurúeite Larúeihan Bungiu, aba ñein lan aban wuribu sielu ani aba lageindagun Hesusu luma Satanási hau sun lumafianu. Féridi lumuti Satanási wuribu ani kei tariñaguni Bíbülia, aba lachagarún “ligía hau sun lani ánheligu” múarugun (Arufudúni 12:9, 10, 12). Wéiriti ligañi Satanási ladüga subudi lani málühali lan Heowá agumucha lau. Ligía aniha lubéi Mafia adüga lun labuinchun ubóu lau igarigu luma asufuriruni. Ida lubati mariban lan léibugun katei ubouagu? Lau sun lira, lagumuchuba Larúeihan Bungiu lau sun turobuli burí le.
SIGÍ HUMÁ AFURENDEIRA
Ariha waméi ka lan arufudubalin gumese lan Larúeihan Bungiu agumadiha lidan irumu 1914 luma ka lan lánibei le wama.
4. Arufudati profesía gumese lan Larúeihan Bungiu agumadiha lidan irumu 1914
Adügati Bungiu lun gewenedü lan aban binadu lurúeite Babilónia gíriti Nabukodonosoru aban uénedü le arufudubalin le meha lunbei lasuseredun ámuñegü. Arufuda lumuti ligaburi lafuranguagüdüni Danieli uénedü le gúnfuli lan profesía le dandu luagu larúeihan Nabukodonosoru kei luagu Larúeihan Bungiu (aliiha huméi Danieli 4:17). a
Aliiha huméi Danieli 4:20-26, lárigiñe ábame hayusuruni rekuáduru lun hóunabuni álügüdahani burí le:
-
A) Ka larihibei Nabukodonosoru lidan luénedü? (Ariha huméi bérusu 20 luma 21).
-
B) Kaba meha san asusereda lun tídibu wewe? (Ariha huméi bérusu 23).
-
CH) Kaba meha san asusereda lárigiñe lagumuchun “sedü irumu”? (Ariha huméi bérusu 26).
Tídibu wewe le lídanbei uénedü luma Larúeihan Bungiu
PROFESÍA (Danieli 4:20-36)
Arúeihani
A) Aban óunwenbu tídibu wewe
Ladüraawagún arúeihani
B) “Chaün huméi tídibu wewe” ani ábame hígirun lun lásügürün “sedü irumu”
Lagiribudawagüdün arúeihani
CH) “Lichugúayaba [...] arúeihani hun lárigoun”
Furumiñeti lagunfulirun profesía le:
-
D) Ka mini lubéi tídibu wewe? (Ariha huméi bérusu 22).
-
E) Ka dan ladüraawagúa larúeihan? (Aliiha huméi Danieli 4:29-33).
-
F) Ka asuseredubei lárigiñe “sedü irumu”? (Aliiha huméi Danieli 4:34-36).
FURUMIÑETI LAGUNFULIRUN PROFESÍA
Arúeihani
D) Nabukodonosoru, lurúeite Babilónia
Ladüraawagún arúeihani
E) Lárigiñe irumu 606 lb.l.K., aba lálülüdün lau Nabukodonosoru, ábati siñaali lan larúeihan luagu sedü irumu
Lagiribudawagüdün arúeihani
F) Aba lareidagun Nabukodonosoru lídangiñe lílülün lau ani ábaya lagumeserun arúeiha
Libiaman lagunfulirun profesía:
-
G) Ka mini lubéi tídibu wewe? (Aliiha huméi 1 Krónikasi 29:23).
-
H) Ka dan ladüraawagúa harúeihan? Ida liña wasubudiruni mama lan meha harúeihaña dan le ya lubéi Hesusu ubouagu? (Aliiha huméi Lúkasi 21:24).
-
I) Halíaya lagumesera agumadihani le ani ídabuga?
LIBIAMAN LAGUNFULIRUN PROFESÍA
Arúeihani
G) Urúeigu ísüraelina ha meha añuurubaña luagu lálana larúeihan Bungiu
Ladüraawagún arúeihani
H) Lagünrinchawagun Herusalén lidan irumu 607 lb.l.K.; aba ladüraawagún harúeihan urúeigu ísüraelina luagu 2,520 irumu
Lagiribudawagüdün arúeihani
I) Lagumeserun Hesusu arúeiha sielu kei Lurúeite Larúeihan Bungiu lidan irumu 1914
Átiriñein dan lidura sedü irumu?
Anihein burí fánreinti tidan Bíbülia le íderagubaliwa lun gunfuranda wamá amu burí fánreinti. Kéiburi dan le tariñagun liliburun Arufudúni 1,260 lan weyu mini lubéi ǘrüwa irumu dimí (Arufudúni 12:6, 14). Mini lan le, ǘrüwañein lan san-ǘrüwa-wein weyu lidura aban irumu le lídanbei profesía le tídanbei Bíbülia. Mini lan le, bián-míluñein lan seingü-san-wein weyu lidan sedü irumu. Anihein dan tayusuruni Bíbülia dimurei weyu lun tayanuhan luagu irumu (Esekiéli 4:6). Anihán le asuseredubei lun profesía luáguti sedü irumu le tídanbei liliburun Danieli: 2,520 irumu mini lubéi.
5. Sánsiguaali léibugun katei ubouagu lúmagiñe irumu 1914
Ariñaga lumuti meha Hesusu ida luba lan katei ubouagu lárigiñe lagumeserun arúeiha. Aliiha huméi Lúkasi 21:9-11, ábameti hayanuhan luagu álügüdahani le:
-
Ka sügǘ lídangiñe profesía le ariha humaalibei o aganbaadün lan luagu?
Ariñaga lumuti meha apostolu Pábulu ida luba lan hagaburi gürigia lídanme lagumuhóun dan le lánina harúeihan gürigia. Aliiha huméi 2 Timotéu 3:1-5, ábameti hayanuhan luagu álügüdahani le:
-
Ka lídangiñe igaburi burí le iridúbei lidan burí bérusu le ariha humaalibei uguñe weyu?
6. Lunti línchahaniwa wasubudiruni gumeseeli lan Larúeihan Bungiu agumadiha lun wadügüni le agurabúbei wámagiñe
Aliiha huméi Matéu 24:3, 14, ábameti hayanuhan luagu álügüdahani burí le:
-
Ka wadagimanu arufudubalin gumeseeli lan Larúeihan Bungiu agumadiha?
-
Ida luba gafanran humá lidan dasi le?
Gumeseeli Larúeihan Bungiu agumadiha ani málühali árügüdei ubafu luagu Ubóu sunsuinagubei. Aliiha huméi Ebüréu 10:24, 25, ábameti hayanuhan luagu álügüdahani le:
-
Ka lunbei wadügüni sun wagía “lau ariha wamani luagu yarafaali lan luéyuri Wabureme”?
Kaba hamuga hadüga anhaün afurendeira somu katei le gayaraabei líderaguniña amu o lesefuruni habagari?
ÁLÜGÜDAHANI LE HADÜGÜBEI FIU GÜRIGIA: “Ka uagu weiri lubéi hayanuhan gefentiña luagu Heowá luagu irumu 1914?”.
-
Kaba hamuga hariñaga?
LE HAFURENDEIRUBEI
Arufuda lumuti profesía luma ligaburi léibugun katei ubouagu gumeseeli lan Larúeihan Bungiu agumadiha. Arufuda wamuti afiñe wamani lau wapurichihan luagu Larúeihan Bungiu luma lau wabasiihan lidoun adamuridaguni.
Águyuguagüdüni
-
Ka asuseredubei lárigiñe lagumuchun sedü irumu lánina profesía le uágubei layanuha Danieli?
-
Ka achoururagüdübalin hun gumese lan Larúeihan Bungiu agumadiha lidan irumu 1914?
-
Ida luba harufuduni afiñe humá gumeseeli lan Larúeihan Bungiu agumadiha?
FURENDEI HUMÁ LANWOUN
Ariha huméi le hariñagubei fiu sásaamu luagu ida liña lan lasansirun léibugun katei ubouagu lúmagiñe irumu 1914.
“La era en que los valores decayeron radicalmente” (¡Despertad!, to lánina gádürü-hati, irumu 2007)
Ariha huméi ida liña lan ladügün profesía le lídanbei Matéu 24:14 lun lasansiruni aban wügüri libagari.
Ida liña wasubudiruni layanuhaña lan profesía le lídanbei kapítulu 4 le tídanbei liliburun Danieli luagu Larúeihan Bungiu?
Ka arufudubalin lidan lan irumu 1914 lagumucha “sedü irumu” le uágubei layanuha kapítulu 4 tidan liliburun Danieli?
a Aliiha huméi bián lagumuhóun ariñahani le lídanbei fánreinti “Furendei humá lanwoun” le lídanbei arufudahani le.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
