ARUFUDAHANI 34
Ida luba warufuduni lun Heowá hínsiñe lan woun?
Yarafatimaahali san hasandiragun hungua lun Bungiu lúmagiñe hatatirun aturiahoun Bíbülia? Hínsiñeti hamuga san hun lun héretima lan humadagua luma? Anhein ítara liña lubéi, haritagua huméi eibu lanme aweirideina lan ínsiñeni le hasandirubei luagu Heowá, wéiritimabei giñe hínsiñe lun ani lóunigirubadün. Ida luba harufuduni lun hínsiñe lan hun?
1. Ida liña warufuduni lun Heowá hínsiñe lan woun?
Arufuda wamuti hínsiñe lan Heowá woun dan le gaganbadi wamá lun (aliiha huméi 1 Huan 5:3). Mafosuti Heowá ni aban gürigia lun gaganbadi lan lun. Rúrügüti chansi woun lun wanúadirun anhein gaganbadibadiwa lubéi lun o madügün wabéi lan. Ka uagu? Ladüga busén lan Heowá lun gaganbadi humá lun “tau sun hanigi” (Rómana 6:17). Mini lan le, busén lan lun gaganbadi humá lun, mama ladüga mosu lan hadügüni, busenti lun gaganbadi humá lun ladüga hínsiñe lan hun. Adügǘwati fánreinti 3 luma 4 le tídanbei líburu to lun líderagunün arufudei hínsiñehabu lun Heowá lidan bián igaburi: lau hadügüni le hínsiñebei lun luma lau madügün humani le mínsiñebei lun.
2. Ka uagu anihein lubéi dan hénrengu lan woun warufuduni hínsiñe lan Heowá woun?
“Sügütiña ha harumabaña lídangiñe saragu wuribani” (Sálumu 34:19). Sun wagía ageindaguatiwa luma igaburi le mabuidunbei wawagu ani charatiwa. Ligibuagun lira, gayaraati gagibugua wamá luma turobuli lánina seinsu, marichaü luma burí amu lénrengunga. Dan le wásügürün lídangiñe lénrengunga, gayaraati hénrengutima lan woun wadügüni le lagurabubei Heowá wámagiñe lugundun ménrenguntimati ladügǘn le wuribabei. Ligíati, dan le háfaagun lun hadügüni le lamuriahabei Heowá húmagiñe, harufuduñein lun hínsiñetima lan hun sügǘ lau furumiñeguarügü amu katei. Arufuda humuti giñe lau lira úaragua humá lun. Gúnfulibei Heowá humá ani mígirun lubadün (aliiha huméi Sálumu 4:3).
SIGÍ HUMÁ AFURENDEIRA
Ariha waméi ka lan uagu busén lubéi Heowá lun gaganbadi wamá lun luma ka lan gayaraabei líderaguniwa lun úaragua wamá lun súnwandan.
3. Aban sigenei le gádanbalin hibagari
Aliihatiwa tidan Bíbülia, tidan liliburun Hobu, ru lan Satanási lidurun Hobu luma hadurun sun gürigia ha busenbaña heseriwidun lun Heowá. Aliiha huméi Hobu 1:1, 6–2:10, ábameti hayanuhan luagu álügüdahani burí le:
-
Según Satanási, ka meha uagu gaganbadi lubéi Hobu lun Heowá? (Ariha huméi Hobu 1:9-11).
-
Ka duru líchugubei Satanási hawagu sun gürigia, huguya haganagua? (Ariha huméi Hobu 2:4).
Ariñagati Hobu: “Úaraguamemebadina darime nounwen!” (Hobu 27:5, TNM). Ayanuha humá luagu álügüdahani le:
-
Ida liña larufuduni Hobu hínsiñe lan Heowá lun tídangiñe sun lanigi?
Arufuda lumuti Hobu hínsiñe lan Heowá lun lau úaragua lan lun.
Arufuda wamuti hínsiñe lan Heowá woun dan le úaragua wamá lun.
4. Gúndaagüda humóun lanigi Heowá
Aliiha huméi Ariñawagúni 27:11, ábameti hayanuhan luagu álügüdahani burí le:
-
Ida liña san lasandiragun Heowá lungua dan le gaganbadi humá lun ani anúadira huguya lau lichú aau? Ka uagu?
5. Gayaraati úaragua humá lun Heowá
Ínchaha lumutiwa ínsiñeni le wasandirubei luagu Heowá lun wadimurehan luagu houn amu. Ánheinti úaraguni le wasandirubei luagu Heowá, ínchaha lumutiwa lun gaganbadi wamá lun íbini hénrengu lan. Ariha huméi BIDÉU, ábameti hayanuhan luagu álügüdahani burí le:
-
Hénrenguti san hun lun hayanuhan luagu Heowá houn amu?
-
Según le warihibei lidan bidéu, ka íderagubalin Grayson lun lagidarun anufudei luéi?
Ménrenguntimati úaragua wamá lun Heowá dan le hínsiñe lan le hínsiñebei lun woun ani iyereegu ligía le iyereegubei lun woun. Aliiha huméi Sálumu 97:10, ábameti hayanuhan luagu álügüdahani burí le:
-
Según le furendei humaalibei, ka burí katei hínsiñebei lun Heowá? Ka burí katei iyereegubei lun?
-
Ida luba línsiñedun le buídubei hun ani iyereegu ligíame le wuribabei hun?
6. Barüti gaganbadi wamá lun Heowá saragu buiti woun
Súnwandan buídutima lan gaganbadi wamá lun Heowá. Aliiha huméi Isaíasi 48:17, 18, ábameti hayanuhan luagu álügüdahani burí le:
-
Afiñetün san subudi lani Heowá kátima lan buídubei woun? Ka uagu hasaminara ítara?
-
Ida liña líderagunün haturiahanu Bíbülia luma hasubudirunitima Heowá, Bungiu le inarünibei?
LE HARIÑAGUBEI FIU GÜRIGIA: “Meberesegúnti Bungiu lau le nadügübei”.
-
Ka bérusu tídangiñeti Bíbülia gayaraabei hayusuruni lun harufuduni gayara lan wadügün lun lagundaarun o lun lírudun Heowá lau le wadügübei?
LE HAFURENDEIRUBEI
Arufuda humuti hínsiñe lan Heowá hun dan le gaganbadi humá lun ani úaragua huguya lun íbini laganagua lénrengunga.
Águyuguagüdüni
-
Ka hafurendeirubei lídangiñe lani Hobu hénpulu?
-
Ida luba harufuduni hínsiñe lan Heowá hun?
-
Kaba íderaguaün lun úaragua humá lun Heowá?
FURENDEI HUMÁ LANWOUN
Furendei huméi ida luba lan úaragua humá lun Heowá luma lun damuriguaü.
Furendei humá amu burí katei luagu lasigenehan Satanási.
“Kíputi Hobu úaraguni” (Bíbülia, ka uganu tídanbei?, fánreinti 6)
Ariha huméi íbini lan irahüñü gayaraati harufuduni hínsiñe lan Heowá houn.
Dan le héredun amu hawagu nibureintiña lun hadügün somu katei wuribati, ida luba úaragua hamá lun Heowá?
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
