ARUFUDAHANI 36
Óusera wamá lau arumani lidan sun katei
Sun gürigia busentiña umadagu ha harumati hóuserun. Ligiaméme giñe lagurabubei Heowá hámagiñe lumadagu. Lau sun lira, hénrenguti louserúniwa lau arumani lidan aban ubóu le ñein habéi saragu gürigia eyeedaña amu. Ka buiti wibihubei dan le wóuserun lau arumani lidan sun katei?
1. Kátima uagu lunti lubéi wóuserun lau arumani?
Dan le wóuserun lau arumani hama amu, warufuduñein lun Heowá hínsiñe lan woun ani inebe lan woun. Gabaroun huméi subudi lani Heowá sun le wasaminarubei luma le wadügübei (Ebüréu 4:13). Ariha lumuti dan le wanúadirun wóuserun lau arumani ani adügati lira lun lagundaarun. Ariñagatu Lererun: “Mínsiñetiña ha wuribabaña igaburi lun Bungiu, ánheinti hama ha buídubaña, gamadaguati lungua” (Ariñawagúni 3:32).
2. Ka burí katei ídanbei lunti lan wóuserun lau arumani lidan wabagari?
Busenti Heowá lun wadimurehani inarüni wámawagua (Sakaríasi 8:16, 17). Ka mini lubéi le? Meyeehan wamá, michu wagía ariñahani iyeeniti houn waduheñu, houn wapanaagu lidan wadagimanu, houn wíbirigu lidan damuriguaü ni houn gumadimatiña. Gürigia ha óuserubaña lau arumani, míweruhantiña, meyeedun hagía amu (aliiha huméi Ariñawagúni 24:28 luma Éfesuna 4:28). Afayeiha hamuti giñe liseinsuna gumadi (Rómana 13:5-7). Lidan burí katei le luma lidan amu burí sügǘ lidan wabagari, busentiwa lun “buidu lan wóuserun lidan sun katei” (Ebüréu 13:18).
3. Ka buiti wibihubei dan le haruma lan wóuserun?
Dan le subudiwa wamá luagu wóuserun lau arumani, afiñetiña amu gürigia wawagu. Ídehatiwa lun chouru lan hasandiragun sun lílana damuriguaü houngua, ha ítarabaña woun kei iduheñu. Harumati giñe wasaminan o waritagun. Dan le wóuserun lau arumani, ídehatiwa “lun larihíniwa lidan ligaburi [w]abagaridun luagu buidu lan arufudahani le luáguti Bungiu le Wasalbaragüle”. Gayaraabei giñe wídehan lun busén hamá amu gürigia heseriwidun lun Heowá (Titu 2:10).
SIGÍ HUMÁ AFURENDEIRA
Ariha waméi ka lan lánibei wóuserun lau arumani luma wamadagua luma Heowá luma ida luba lan wóuserun lau arumani lidan ámuñegueinarügü sügǘ lidan wabagari.
4. Hínsiñetiña gürigia ha harumabaña óuserun lun Heowá
Aliiha huméi Sálumu 44:21 luma Malakíasi 3:16, ábameti hayanuhan luagu álügüdahani burí le:
-
Ka uagu moun lumuti lubéi wasaminarun gayara lan waramuduni inarüni?
-
Ida liña lasandiragun Heowá lungua dan le wanúadirun wariñaguni inarüni íbini dan le hénrengu lan?
Dan le hariñaguni irahüñü inarüni, gúndaagüda hamutiña hagübürigu. Dan le wariñaguni inarüni, gúndaagüda wamuti Heowá.
5. Harumalá wóuserun súnwandan
Lau sun añahein lan saragu gürigia ha afiñetiña mabuidun lan louserúniwa lau arumani súnwandan, anihein resun buiti lun wóuserun lau arumani súnwandan. Ariha humá fiu lídangiñe. Ariha huméi BIDÉU.
Aliiha huméi Ebüréu 13:18 ani ayanuha humá luagu ida luba lan wóuserun lau arumani…
-
… hadan waduheñu.
-
… lidan wadagimanu o leskuelarugu.
-
… lidan burí amu sügǘ.
6. Barüti wóuserun lau arumani saragu buiti woun
Lau sun gayara lan lanügün wóuserun lau arumani somu turobuli woun, ligía buídutimabei lun wadügüni. Aliiha huméi Sálumu 34:12-16, ábameti hayanuhan luagu álügüdahani le:
-
Ida luba ladügün wóuserun lau arumani lun labuidurun wabagari?
-
A. Dan le hóuserun maríeitiña lau laruman igaburi, aba buídutima lan habagari hámagua.
-
B. Dan le haruma lan hóuserun nadagimeintiña, afiñetiña hayubudirigu hawagu.
-
CH. Dan le haruma lan hóuserun lílana fulasu, buiti hiri hagibugiñe gumadimatiña.
LE HARIÑAGUBEI FIU GÜRIGIA: “Gayaraati beyeehan anhein mama lubéi badügüña wuribani ni ka un”.
-
Afiñetün san iyereegu lan sun iyeeni lun Heowá? Ka uagu?
LE HAFURENDEIRUBEI
Agurabati Heowá lun hóuserun lumadagu lau arumani lidan sun le hariñagubei luma le hadügübei.
Águyuguagüdüni
-
Ka burí katei ídanbei lunti lan wóuserun lau arumani?
-
Ka uagu siñá lubéi wafiñerun gayara lan waramuduni inarüni?
-
Ka burí resun húmabei lun hóuserun lau arumani súnwandan?
FURENDEI HUMÁ LANWOUN
Ida luba harufudahan agübürigu houn harahüñü lun hóuserun lau arumani?
Kaba afayeiruahaü heresibira sun ha gúnfulibaña lan hererun?
Gúnfuli humá lau le füramase hubéi resibi humaamuga abinirúni (9:09)
Ariha huméi anhein lunti lubéi hafayeiruni liseinsuna gumadi íbini wuriba lan layusurún.
“¿Debe usted pagar impuestos?” (La Atalaya, to lánina 1 lidan nefu-hati, irumu 2011)
Ka ínchahabalin aban híweruti lun lasansiruni libagari luma lun ábanhali lan gürigia le óuseruti lau arumani?
“Aprendí que Jehová es bueno y nos perdona” (La Atalaya, to lánina 1 lidan seingü-hati, irumu 2015)
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
