ARUFUDAHANI 38
Ru wamá eteingiruni luagu idewesei le lánina ibagari
Buin liña ibagari lau saragu sügǘ buíduburiti. Íbini laganagua turobuli, wínwantiwa sügǘ le ruti ugundani woun. Ida luba warufuduni lun Heowá teinki wamani luagu idewesei le? Ani kátima uagu lunti lubéi weteingiruni?
1. Ka uagu lunti lubéi gebegi lan ibagari woun?
Lunti gebegi lan ibagari woun ladüga aban lan lubuidun idewesei lúmagiñeti Wáguchi Heowá le hínsiñehabubei. Lídanñein Heowá “lubuñe ibagari”, ladüga ligía lan adügübalin sun le gabagaribei (Sálumu 36:9). “Ligía guánarügü íchugubei ibagari luma garabali, luma sun katei woun” (Adügaü 17:25, 28). Heowá íchugubalin sun le wemegeirubei woun lun wasigirun awinwanda. Ligía adügübei lun gayara lan wagundaarun lidan wabagari (aliiha huméi Adügaü 14:17).
2. Ida luba warufuduni lun Heowá teinki wamani luagu idewesei le lánina ibagari?
Lúmagiñe lagumeserun hibagari turageirugu húguchu, leteniruña Heowá hun. Adügati Bungiu lun labürüdǘn aban furíei tidan Lererun le ñein lubéi lariñaga aban lubúein gíriti Dawidi: “Ariha lumuti bagu ladügǘn núgubu” (Sálumu 139:16). Wéiriti lebegi hibagari lun Heowá (aliiha huméi Matéu 10:29-31). Wéiriti ligari lun Heowá dan le lagidaruni somu gürigia libagari amu luéi o libagari guánarügü (Áfuriduni 20:13). a Gáriti giñe lun dan le wíchuguni wabagari lidoun denchaü o peliguru o dan le madügün wamá ni kata lun wóunigiruni habagari amu. Arufuda wamuti gebegi lan lubuidun idewesei le lánina ibagari woun dan le wóunigiragun woungua ani inebe ligía habagari amu woun.
SIGÍ HUMÁ AFURENDEIRA
Ariha wamá fiu katei le gayaraabei wadügüni lun warufudun eteingiruni luagu idewesei le lánina ibagari.
3. Góunigigua humá hungua luéi habuleseirun o hasandirun
Kei füramasehaadiwa lan lun Heowá wadügübei lan lugundan súnwandan, yusu wamuti sun wabagari lun weseriwidun lun. Derege wamaali wágubu lun keisi aban adagaragüdüni le sánduti ani lunti wóunigiruni. Aliiha huméi Rómana 12:1, 2, ábameti hayanuhan luagu álügüdahani burí le:
-
Ka uagu lunti lubéi hóunigiragun hungua luéi habuleseirun o hasandirun?
-
Ida luba hadügüni?
4. Góunigi humá lidan sun le hadügübei ua láamuga ni aban abuleseiruti o eferidiruti libagari
Rutu Bíbülia adundehani woun lun wóunigiruni wabagari luma habagari amu. Ariha huméi BIDÉU ani teni humá lun fiu katei le gayaraabei hadügüni lun ñein lan ichouruni.
Aliiha huméi Ariñawagúni 22:3 ani ayanuha humá luagu ida luba lan hídehan lun ñein lan ichouruni…
-
… húbiñe.
-
… lidan wadagimanu.
-
… lidan somu huraraü.
-
… danme le habugahaña lan o pasaheruñadün lan tidan somu ugunei.
5. Inebelá libagari irahü le mágurahoungili hun
Afuranguagüda lumuti Dawidi ka lan asuseredubei dan le aniha lan aban irahü aweirida turageirugu lúguchu. Aliiha huméi Sálumu 139:13-17, ábameti hayanuhan luagu álügüdahani le:
-
Lun Heowá, halía latatira libagari aban gürigia, dan le lágurahoun o dan le tadageinadun lúguchu?
Yusu lumuti meha Heowá lúrudu le líchugubei houn ísüraelina lun lóunigiruniña würiña ha estoubugubaña luma irahü le hanügübei harageirugu. Aliiha huméi Áfuriduni 21:22, 23 lídangiñe abürüdǘni, b ábameti hayanuhan luagu álügüdahani burí le:
-
Ida liña larihini Heowá gürigia le agidarubalin libagari aban irahü le mágurahoungili íbini mabusenrun lan yebe ladügüni?
-
Ida lubati lasandiragun Heowá lungua anhein lau lubéi lugundan gürigia ligía ladügei? c
-
Agia huguya, ida liña hasandiragun hungua lau hasubudiruni le lasaminarubei Bungiu?
Íbini aban würi to unboun gebegi lan ibagari, gayaraati tasaminarun taragachuni lan tiráü láranibei aban turobuli. Aliiha huméi Isaíasi 41:10, ábameti hayanuhan luagu álügüdahani burí le:
-
Anhein adügǘwa erei tuagu aban würi lun taragachuni tiráü, kaba uma tamuriaha lun líderagunu? Ka uagu??
LE HARIÑAGUBEI FIU GÜRIGIA: “Garichatu kada würi lun tanúadiruni anhein taragachubei lubéi tiráü o maragachun tubéi lan, ladüga túgubu lira, le tadüga lau”.
-
Ka achoururagüdübalin hun gebegi lan tibagari würi dageinatu lun Heowá ítara kei libagari irahü le turageirugubei?
LE HAFURENDEIRUBEI
Aban idewesei lúmagiñeti Heowá ibagari. Arufudahatu Bíbülia woun lunti lan inebe lan dandu wabagari kei habagari amu woun, hínsiñe ligíame woun ani góunigi wameime.
Águyuguagüdüni
-
Ida liña wasubudiruni gebegi lan habagari gürigia lun Heowá?
-
Ida liña lasandiragun Heowá lungua dan le láfarun aban gürigia gürigia líledi o láfaragun lungua?
-
Ka hínsiñetimabei hun luagu idewesei le lánina ibagari?
FURENDEI HUMÁ LANWOUN
Ida luba weteingiruni Heowá luagu idewesei le lánina ibagari?
Gayaraati san feruduna lanu Bungiu würi to ragaaruboun tiráü lidan dan le sügühalibei?
“Ka tariñagubei Bíbülia luagu haragachún irahüñü?” (Ariñahani lídangiñeti jw.org)
Ariha huméi ka lan lánibei wasubudiruni ida liña lan larihini Heowá ibagari luma isebáhari le wanúadirubei.
Ánheinti saminaali lubéi aban gürigia lun láfaragun lungua? Ariha huméi ida luba lan tíderaguni Bíbülia.
a Bereseti Heowá hau “ha gáribei hasandirunu hanigi” (Sálumu 34:18). Gunfuranda lumuti igarigu le hasandirubei gürigia ha asaminarubaña háfaragun houngua ani busenti líderaguniña. Lun harihini hungua hu lan adundehani le líchugubei, aliiha huméi ariñahani le gíribei “Gayaraati san tíderagunina Bíbülia anhein saminaadina lubéi náfaragun nungua ladüga mabusenrunhadina lan nawinwandun?”, le lídanbei fánreinti “Furendei humá lanwoun” lidan arufudahani le.
b Áfuriduni 21:22, 23 [TNM]: “Ánhaña ageindagua bián wügüriña hámagua, habuleseirame aban würi dageinatu, adüga ítara lun tágurahan lubaragiñe dan, anhein ua óunweti, mosu lafayeiruni le gadurunbei sun damichi le ladügübei ítara kei lamuriahani tani würi tuguya weiriei hagibugiñe aguseragüdütiña. Ánheinti ñein óunweti, mosu lafayeirúniwa ibagari luagu ibagari”.
c Anhein ragaadün lubéi hiráü lidan dan le sügühalibei, moun lumuti hígirun lun ladügün duru lun hírudun saragu lugundun gayaraati feruduna lanün Heowá. Lúntima hasubudirun luagu le, ariha huméi ariñahani le gíribei “Ka tariñagubei Bíbülia luagu haragachún irahüñü?” le lídanbei fánreinti “Furendei humá lanwoun”, le lídanbei arufudahani le.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
