Mégeiwati hitaü. Úati ni aban gürigia le gayaraati labagaridun sin hitaü. Kei Bungiu lubéi adügübaliwa, garichati lun lariñaguni woun ida luba lan wayusuruni hitaü. Ka lariñagubei Bungiu woun luagu hitaü? Gayaraati san leigin gürigia hitaü o lichugúniwa lidoun lúgubu? Ka gayaraabei líderagunün lun hanúadirun buidu lidan katei le?

1. Ida liña larihini Heowá hitaü?

Lidan meha tidaani Bíbülia, ariñagati Heowá houn lubúeingu: “Sun katei le gabagaribei, lita libagaribei” (Fádirigu 17:14). Lun Heowá, ítara liña hitaü kéigubeirügü ibagari. Kei sagüráu lubéi ani sánduti ibagari, aban idewesei lúmagiñeti Bungiu, sagüráuti giñe hitaü.

2. Ka ligaburi layusurún hitaü unbei lamahada Heowá?

Saragu dan lubaragiñe ñein lan damuriguaü kristiánu lariñaguña Heowá houn lumutuniña lun meigin hamá hitaü (aliiha huméi Agumesehani 9:4 luma Fádirigu 17:10). Danti le añaheinhaña kristiánugu, ábaya líchuguni Heowá gumadiméme le. Ru hamuti apostolugu hama wéiyaaña ha meha adundehabalin damuriguaü adundehani le houn kristiánugu: “Meigin huguyame hitaü [‘sigí humá amahada [...] lun hitaü’, TNM]” (aliiha huméi Adügaü 15:28, 29).

Ka mini lubéi wamahadun lun hitaü? Anhein hamuga ariñaga hisurusian hun lun matun humá binu, matun hubéi hamuga, adián? Héigiña hamugati éigini le gaganati binu o híchuguñein hamuga lidoun húgubu luéigiñe hílagüle? Uá, adián? Ítarameme, ariñagati lilurudun Bungiu lun meigin wamá, matun wagíame hitaü, meigin wagíame lǘgürügü animaalu le mawiyurúnwagili lita. Meigin wagíame éigini le gaganati hitaü.

Ka gayaraabei wariñaguni luagu layusurúniwa hitaü lidan agaranihani? Anihein agaranihani le múaranti luma lilurudun Bungiu, kéiburi lichugúniwa hitaü lidoun lúgubu gürigia, hitaü lan yebe le dayarüti o furumiñeguarügü lídangiñe gádürü katei méiniti le ídanbei lafanreinrawagúa hitaü: lífunan hitaü (glóbulos rojos), líharun hitaü (glóbulos blancos), lederaagun hitaü (plaquetas) luma lidunari hitaü (plasma). Anihein agaranihani le ídanti ua lan furangu lan anhein ladüraawaguña lubéi lilurudun Bungiu. Kéiburi agaranihani le ídanbei layusurúa katei ñǘbüriti le asagarúbei lídangiñe furumiñeguarügü lídangiñe gádürü katei méiniti le lídanbei hitaü. Anihein giñe agaranihani le ídanbei layusurúa lita guánarügü gürigia. Lunti lanúadiruni kada gürigia kaba lan ladüga lárigiñe larihini lungua ídatima liña lan katei a (Galasiana 6:5).

 SIGÍ HUMÁ AFURENDEIRA

3. Anúadira humá agaranihani le úarati luma lugundan Heowá

Ida luba hanúadirun agaranihani le úarati luma ligaburi larihini Bungiu hitaü? Ariha huméi BIDÉU, ábameti hayanuhan luagu ka lan uagu lunti lubéi lafalarúniwa adundehani le asigirubei.

• Amuriaha humá lichú aau lidan furíei (Santiagu 1:5).

• Áluaha humá adundehani tidan Bíbülia ani ariha huméi ida luba lan hafalaruni (Ariñawagúni 13:16).

• Áluaha humá ariñahani luagu agaranihani le gayaraabei hadariruni lidan fulasu le ñein lubéi heredera.

• Subudi huméi ka lan agaranihani unbei moun lumuti lan hánharun.

• Adüga huméi sun hiyaraati lun hanúadirun aban katei le ígiruti hisaminan darangilu (Adügaü 24:16). b

• Gabaroun huméi ua lan lunti lariñaguni hun kaba lan hanúadira: ni húmari ni wéiyaaña lidan afiñeni ni gürigia le íchugubei aturiahani tídangiñeti Bíbülia hun (Rómana 14:12).

• Bürǘ huméi le hanúadirubei.

4. Áluaha hamuti gefentiña luagu Heowá agaranihani le buídutimabei

Moun lumuti wasaminarun siñabei lan weresibiruni agaranihani le buídutimabei ladügarügü gaganbadi wamá lun lilurudun Bungiu. Ariha huméi BIDÉU

Aliiha huméi Titu 3:2, ábameti hayanuhan luagu álügüdahani le:

• Ka uagu lunti lubéi wídehan hama surusiagu, ayanuha wagíame houn lau gálumaü luma inebesei?

 5. Katei ñǘbüriti le asagarúbei lídangiñe hitaü

Gádürüñein ubuñei méiniti lidan hitaü: lífunan hitaü, líharun hitaü, lederaagun hitaü luma lidunari hitaü. Lídangiñe kada aban lídangiñe gádürü katei méiniti le, sagawati amu le ñǘbüritimati. c Anihein lídangiñe katei ñǘbüriti le asagarúbei lídangiñe hitaü ayusurúti lun lagaranihóun lun sandi o lun lararamúniwa aseñeinhani.

Kada kristiánu lunti lanúadiruni anhein lánharuba lubéi o mánharunbei lan lun katei ñǘbüriti le asagarúbei lídangiñe hitaü, según lariñaguni lisaminan lun, le héchugüda láalibei afalarei le tariñagubei Bíbülia. Másiñati ñéinbaña lan amahadutiña lun agaranihani le ídanbei layusurúa katei ñǘbüriti le burí asagarúbei lídangiñe hitaü. Ani añahein amu, gayaraati hasaminarun mariban lan hánharun lun.

Danme le hanúadiruni kaba lan hadüga, álügüdagua humá hungua:

• Ida luba hamuga san hafuranguagüdüni lun hisurusian ka lan uagu hánhara o hamahada lun ítaga katei ñǘraüti le asagarúbei lídangiñe hitaü?

 LE HAFURENDEIRUBEI

Busenti Heowá lun wóuseruni hitaü kei aban katei sagüráuti.

Águyuguagüdüni

• Ka uagu larihei Heowá hitaü kei aban katei sagüráuti?

• Ida liña wasubudiruni mabusenrun lan Bungiu lun wíchugun hitaü lidoun wágubu?

• Ida luba hanúadirun buidu lidan luáguti agaranihani le ídanti layusurúa hitaü?