Samina humá tuagun aban úguchuru hínsiñehabutu asansiraguagüdei tisaani lubá lidin leskuela. Arihatu lau ágawa lan, haruma tan ladaüragun ani buidu ligía taríawagun. Ídehati lira lun masandirun lan luma lun harihini amu góunigi hamani lagübürigu. Hínsiñetiwa giñe lun Wáguchi Heowá ani busenti lun haruma lan wágubu, le geyegubei wau luma wabagari. Dan le haruma wamá, rútiwa uéiriguni lun Bungiu ani barüti giñe buiti woun.

1. Ka lunbei wadügüni lun haruma lan wágubu luma le geyegubei wau?

Ariñagati Heowá woun: “Sandu humá” (1 Féduru 1:16). Lun sandu wamá, mosu haruma lan wágubu, le geyegubei wau luma wabagari. Arufudatiwa haruma wamá dan le wagoun sagü weyu, haruma tan wadaüragun, waban, wagune ani kipu wameime sun katei lidan lilugaarun. Ídehatiwa giñe lidan tarumadahóun Luban Wadamuridagun. Dan le haruma wamá, gayaraabei wadügün lun lichugún uéiriguni lun Heowá (2 Korintuna 6:3, 4).

2. Ka échuni lunbei wígiruni lun haruma wamá?

Ariñagatu Bíbülia woun lun “wachibuni sun luwuyeri iwiyei wawariua, dandu luéi wágubu kei tuéi wawani” (2 Korintuna 7:1). Mini lan lira, mosu lan wígirun furumiñeguarügü échuni le gayaraati ladügün lun wasandirun luma lun lagadeirun wasaminan. Keiti busén wamá lun lagundaarun Heowá lau le wasaminarubei, adüga wamuti sun wayaraati lun wamahadun lun liwiye saminaü (Sálumu 104:34). Áfaaguatiwa giñe lun haruma lan sun le wariñagubei (aliiha huméi Kolosana 3:8).

Ka amu katei gayaraabei lawiyeduni wágubu o wabagari? Anihein katei le gayaraabei lawiyeduni wágubu. Ligía magumulahan wabéi, machaguhan wagía iyuri, mayusutiwa düroga ani mátahantiwa árani le gayaraati ladügün lun wéchudun luagu. Lau wamahadun lun katei burí le, góunigiguatiwa woungua luéi wasandirun ani arufudatiwa inebesei luagu idewesei lánina ibagari. Lun haruma lan wabagari, áfaaguatiwa lun wadisedun luéi échuni wíyeti, kéiburi amulidaaguni unguaü o taríawagun iyawaü o bidéu lánina agamariduni (Sálumu 119:37; Éfesuna 5:5). Lau sun gayara lan hénrengu lan ligirúniwa bisiu burí le, aranseñu liña Heowá lun líderaguniwa (aliiha huméi Isaíasi 41:13).

 SIGÍ HUMÁ AFURENDEIRA

3. Rútiwa uéiriguni lun Heowá dan le haruma lan wágubu luma sun le geyegubei wau

Dan le waliihani lúrudu le meha líchugubei Heowá houn ísüraelina, aba gunfuranda wamani ida liña lan larihini arumani. Aliiha huméi Áfuriduni 19:10 luma 30:17-19, ábameti hayanuhan luagu álügüdahani burí le:

• Ka larufudahabei bérusu burí le woun luagu ligaburi larihini Heowá arumani?

• Ka burí katei gayaraabei wadügüni lun harumameme wamá?

Barüti arumani dan luma áfaaguni. Lau sun lira, gayaraati haruma wamá meberesenga halía lan weredera o anhein risi wabéi o gudeme wamá. Ariha huméi BIDÉU, ábameti hayanuhan luagu álügüdahani le:

• Anhein wakipura wálagu harumañu, gayaraati san ladügün lira lun inebe lan Heowá houn gürigia ha únbaña wapurichiha? Ka uagu?

4. Ígira huméi échuni le wuribabei

Anhein agumulaha hubéi o yusu humá düroga, másiñati subudi humani hénrengu lan ligirún bisiu burí le. Kaba íderaguaün? Hasaminarun hulili luagun damichi le ladügübei lira. Aliiha huméi Matéu 22:37-39, ábameti hayanuhan luagu ida liña lan lagadeiruni agumulahani luma düroga…

• … lumadagua aban gürigia luma Heowá.

• … ligaburi lanaagun gürigia lungua hama liduheñu luma hama amu gürigia.

Samina huméi ida luba lan hígiruni bisiu. a Ariha huméi BIDÉU.

Aliiha huméi 2 Korintuna 4:7, ábameti hayanuhan luagu álügüdahani burí le:

• Afiñetün san lídehaba lan léchudun gürigia afurieida, aturiahoun Bíbülia luma adamuridagua lun lígirun aban luriban échuni? Ka uagu?

 5. Ageindagua humá luma burí saminaü luma échuni wíyeti

Aliiha huméi Kolosana 3:5, ábameti hayanuhan luagu álügüdahani burí le:

• Ida liña wasubudiruni wiye lan larihini Heowá échuni lánina taríawagun iyawaü lánina agamariduni, amulidaaguni unguaü luma lounahóun burí bidéu o iyawaü lánina magíaguni luéigiñe gágamuru?

• Afiñetün san gíbeya lan lamuriahan Heowá wámagiñe lau lariñagun woun lun haruma lan wanügüni wabagari? Ka uagu?

Furendei huméi ida luba lan hageindagun luma liwiye saminaü. Ariha huméi BIDÉU.

Abahüdaguati Hesusu aban sügǘ lun larufuduni woun mosu lan aranseñu wamá lun wadügüni le mégeiwabei lun wakipuruni wabagari harumañu. Aliiha huméi Matéu 5:29, 30, ábameti hayanuhan luagu álügüdahani le:

• Mama lariñaguña Hesusu woun mosu lan wadürürüni wáhabu o wasagaruni wagu, le labusenrubei lariñagun woun, mosu lan wadügüni le mégeiwabei. Ka katei lunbei ladügüni gürigia lun masaminarun lan luagun katei wíyeti? b

Anhein hageindaguña lubéi luma liwiye saminaü, gayaraati hachoururuni gebegi lan áfaaguni le hadügübei lun Heowá. Aliiha huméi Sálumu 103:13, 14, ábameti hayanuhan luagu álügüdahani burí le:

• Anhein hageindaguña lubéi luma aban liwiye échuni, ida liña línchahanün bérusu le lun hasigirun ageindagua? Ka uagu?

 LE HAFURENDEIRUBEI

Gúndaagüda wamuti Heowá dan le haruma lan wakipuruni wágubu, wasaminan luma wabagari.

Águyuguagüdüni

• Ka uagu lunti lubéi haruma wamá?

• Ka gayaraabei wadügüni lun haruma lan wakipuruni wágubu luma sun le geyegubei wau?

• Ka gayaraabei wadügüni lun haruma lan wakipuruni wasaminan luma wabagari?