Agurabatiña gürigia ha sun líñabei hamarieidun lun ladurarun ugundani le hasandirubei weyu le hamarieidunbei lun sun habagari. Ani gayaraati habihini. Subudi hamuti kristiánugu ha barühañabaña saragu irumu maríeiñu luma afalarei adundehani le tídanbei Bíbülia inarüni lan katei le.

1. Ka adundehani tíchugubei Bíbülia lun wügüri maríeiti?

Írida laali Heowá wügüri maríeiti keisi hachügüdina liduheñu (aliiha huméi Éfesuna 5:23). Ani agurabati Heowá lun lanúadiruni maríeiti le buídubei houn liduheñu. Ru tumuti Bíbülia adundehani le houn wügüriña maríeitiña: “Hínsiñeta lúmari wügüri lun” (Éfesuna 5:25). Ka mini lubéi le? Lunti lan lóuserunu wügüri maríeiti lani weiriou buidu dandu múnada kei hagibugiñe amu gürigia. Góunigi lumutu ani adüga lumuti sun liyaraati lun gunda tan luma lun líchuguni le temegeirubei tun (1 Timotéu 5:8). Lóugiñe sun katei, íderagua lumutu lun buidu lan tumadagua luma Heowá (Matéu 4:4). Kei hénpulu, gayaraati hafurieidun ani aliiha hamounme Bíbülia úara. Dan le lóunigirunu wügüri maríeiti lani weiriou lau ínsiñehabuni, kipu lumuti lumadagua luma Heowá (aliiha huméi 1 Féduru 3:7).

2. Ka adundehani tíchugubei Bíbülia tun würi maríeitu?

Ariñagatu Bíbülia lunti lan “inebe lan túmari würi tun” (Éfesuna 5:33). Ida luba tibihini? Gayaraati tasaminarun luagun lubuidun ligaburi tani weiriei luma luagun áfaaguni le ladügübei lun lóunigirunu hau sun harahüñü. Gayaraati tarufudun inebesei lun lau tíderaguni lidan le lanúadirubei luma lau tayanuhan buidu lun, ayanuha tuguyame buidu luagu houn amu, íbini anhein meseriwidun lubéi lun Heowá.

3. Ida luba hederebudagüdüni bián gürigia habagari keisi maríeitiña?

Ariñagatu Bíbülia hawagu maríeitiña: “Ábame herederun kei ábanrügü gürigia” (Matéu 19:5). Mini lan le, mosu lan hóunigiragun houngua luéi furumiñeguarügü katei le gayaraabei ladügün lun hadisedagun hawariuagua. Ligía hásügürünbei dan hámagua, ayanuha hagía furangu lau ínsiñehabuni luagu le hasaminarubei luma le hasandirubei. Ani bóugudin luéi Heowá, mígiruntiña lun ñein lan amu katei o amu gürigia árügüdüti ubaraü le yuubei lun o tun hámari. Mosu lóunigiragun wügüri maríeiti lungua luéi wéiriya lan lumadagua tuma aban würi to mama lúmari ani ligiaméme giñe lunbei tadügüni lani weiriou.

 SIGÍ HUMÁ AFURENDEIRA

4. Maríeiti, hínsiñeta hani weiriou hun ani góunigi humóun

5. Maríeitu, hínsiñela hani weiriei hun ani inebe ligíame hun

Ínchaha tumutu Bíbülia maríeitu lun inebe lan tani weiriei tun íbini anhein meseriwidun lubéi lun Heowá. Aliiha huméi 1 Féduru 3:1, 2, ábameti hayanuhan luagu álügüdahani burí le:

• Anhein meseriwidun lubéi hani weiriei lun Heowá, chóuruti busén humá lun ladügüni. Ida luba san hibihini katei le? Lau hapurichihan lun súnwandan o lau harufudun aban lubuidun igaburi, inebe ligíame hun? Ka uagu hasaminara ítara?

Buiti lidin houn maríeitiña dan le úara lan tuma lani weiriou lanúadirei wügüri kaba lan ladüga. Íbini ítara, ñeinbei dan múaran tan würi luma tani weiriei. Anhein asusereda le, gayaraati  tariñaguni le tasaminarubei lun lau gálumaü luma inebesei. Lau sun lira, lunti taritaguni Heowá lan íchugubalin buligasion lun wügüri lun ligíaba lan anúadirei le buídutimabei houn liduheñu. Ani mosu tadügüni sun tiyaraati lun tíchuguni tídehan lun. Dan le tadügüni le, ídehatu lun gunda lan habagari. Aliiha huméi 1 Féduru 3:3-5, ábameti hayanuhan luagu álügüdahani le:

• Ka lasandirubei Heowá dan le tarufuduni würi maríeitu inebe lan tani weiriei tun?

6. Gayaraati hiñuragun maríeitiña lídangiñe turobuli le úmabei hagagibudagua lidan habagari

 LE HAFURENDEIRUBEI

Gayaraati gunda hamá maríeitiña ánhaña hínsiñegua hámagua, inebegua hagíame hámagua ani falá hameime adundehani le tídanbei Bíbülia.

Águyuguagüdüni

• Ka gayaraabei ladügüni maríeiti lúntima gunda lan libagari tuma lani weiriou?

• Ka gayaraabei tadügüni maríeitu lúntima gunda lan tibagari luma tani weiriei?

• Anhein maríeihadün lubéi, ka adundehani tídangiñeti Bíbülia gayaraabei líderagunün lun lederebugudun hibagari keisi maríeitiña?