ARUFUDAHANI 50
Ida luba gunda hamá iduheñu? (Fánreinti 2)
Aban idewesei lúmagiñetiña Heowá isaanigu. Agurabati lun hóunigiruni agübürigu idewesei le buidu. Ani ruti Heowá adundehani buiti houn lun gayara lan habihini. Ruti giñe adundehani houn isaanigu lun hídehan lun gunda lan habagari keisi iduheñu.
1. Ka adundehani líchugubei Heowá houn agübürigu?
Agurabati Heowá lun hínsiñe hamá isaanigu houn hagübürigu luma lun hásügürüni sun dan le hayaraati hama. Busenti giñe lun hóunigiruniña luéi lasuseredun somu katei wuribati houn luma lun hayusuruni adundehani le tídanbei Bíbülia lun harufudahan houn (Ariñawagúni 1:8). Ariñagatu Lererun Bungiu: “Huguya agübürigu, magañidagüda humaña hisaanigu, agüriaharügü humaña [...] arufudaheina houn kei labusenruni Wabureme” (aliiha huméi Éfesuna 6:4). Hínsiñeti lun Heowá larihiniña agübürigu agüriahaña hasaanigu según adundehani le líchugubei houn ani míchugun hamuti dasi le houn amu gürigia.
2. Ka adundehani líchugubei Heowá houn isaanigu?
Ariñagati Heowá: “Isaanigu, aganba humaña hagübürigu lidan sun katei” (aliiha huméi Kolosana 3:20). Ánhaña inebe lagübürigu aban isaani lun ani gaganbadi ligía houn, gúndaabaña ani gúndaabei giñe Heowá (Ariñawagúni 23:22-25). Ruti meha Hesusu aban buiti hénpulu dan meha irahügili. Lau sun meha mafigoun lan, gaganbaditi meha houn lagübürigu inebe hagía lun íbini gafigoun hamá (Lúkasi 2:51, 52).
3. Ka gayaraabei hadügüni iduheñu lun hasandiragun houngua yarafa lun Heowá?
Anhein gasaanigu hubéi, chóuruti busén humá lun línsiñedun Heowá houn kei línsiñe hun. Ida luba hibihini? Lau hafalaruni adundehani tídangiñeti Bíbülia le: “Arufudahabei [lererun Heowá] houn birahüñü súnwandan; adimurehabá houn luagu, dandu búbiñe kei luagu béibuguniwagu” (2 Lúrudu 6:7). Lau dimurei “súnwandan”, mini lan lira mosu lan háguyuguagüdüni agübürigu katei houn harahüñü saragu wéiyaasu. Chóuruti luagu subudi humani mosu lan háguyuguagüdüni katei houn hisaanigu saragu wéiyaasu lun haritaguni. Mini lan le mosu lan háluahan chansi, eibu lásügürün weyu, lun hayanuhan luagu Heowá houn hisaanigu. Buiti giñe lun hadireirun iduheñu dan sagü dimaasu lun háhuduragun lun Heowá lau haturiahanu Bíbülia úara. Íbini masaanigu humá, líderagubadün haturiahanu Bíbülia hábuguarügü sagü dimaasu.
SIGÍ HUMÁ AFURENDEIRA
Ariha wamá fiu adundehani le huuti lun chouru lan hasandiragun iduheñu houngua ani gunda hagíame.
4. Arufudaha humá houn hisaanigu lau ínsiñeni
Gayaraati hénrengu lan larufudahóun lun aban isaani. Ida luba tíderagunün Bíbülia? Aliiha huméi Santiagu 1:19, 20, ábameti hayanuhan luagu álügüdahani burí le:
-
Ida luba harufudun agübürigu ínsiñeni houn hasaanigu dan le hayanuhan hama?
-
Ka uagu moun lumuti lubéi hererehan agübürigu houn hasaanigu dan le gañi hamá?
5. Góunigi humaña hisaanigu
Lun hóunigiruniña hisaanigu, wéiriti lisudinin hayanuhan luagu agamariduni luma kada aban hádangiñe. Gayaraati hénrengu lan ladügǘniwa lira. Ariha huméi BIDÉU, ábameti hayanuhan luagu álügüdahani burí le:
-
Ka uagu añahein lubéi agübürigu ha únbaña hénrengu lan hayanuhan luagu agamariduni hama hasaanigu?
-
Ka íderagubaliña fiu agübürigu lun hayanuhan luagu agamariduni hama hasaanigu?
Kei lariñaguni profesía, wuribatimarügaali ubóu le lábugiñebei lubafu Satanási. Aliiha huméi 2 Timotéu 3:1, 13, ábameti hayanuhan luagu álügüdahani burí le:
-
Añahein hádangiñe gürigia wuribatiña ha uágubaña layanuha bérusu 13, adügatiña iwiyei hau irahüñü. Ligíati, ka uagu lunti lubéi harufudahan agübürigu houn hasaanigu luagu agamariduni? Ani ka gayaraabei hadügüni lun hóunigiruniña hasaanigu luéi ladügǘniwa iwiyei hau?
Subuditi san hun?
Adügaaña gefentiña luagu Heowá saragu agumeiraguagüdüni to gayaraaboun tíderaguniña agübürigu lun hayanuhan luagu agamariduni houn hasaanigu gayara láamuga hóunigiruniña luéi ladügǘn iwiyei hau. Anuhán fiu tídangiñe:
-
Góunigi humaña hisaanigu (bidéu)
-
“Cómo hablar de sexo con su hijo” (¡Despertad!, núm. 5 2016)
6. Inebe hamá bagübürigu bun
Lunti inebe hamá hagübürigu irahüñü hama nibureintiña houn ani arihúati inebesei ligía lau ligaburi hayanuhan houn hagübürigu. Ariha huméi BIDÉU, ábameti hayanuhan luagu álügüdahani burí le:
-
Ka uagu lunti lubéi layanuhan aban nibureinti lau inebesei houn lagübürigu?
-
Ida luba lóuseruniña aban nibureinti lagübürigu lau inebesei?
Aliiha huméi Ariñawagúni 1:8, ábameti hayanuhan luagu álügüdahani le:
-
Ida luba lóunabun aban nibureinti dan le hariñaguni lagübürigu lun ka lan lunbei ladügüni?
7. Hudugua humá lun Heowá kei iduheñu
Díreitiña gefentiña luagu Heowá dan sagü dimaasu lun háhuduragun lun Bungiu kei iduheñu. Ka hadügübei dan le haturiahanu Bíbülia úara? Ariha huméi BIDÉU, ábameti hayanuhan luagu álügüdahani burí le:
-
Ka gayaraabei líderagunün lun háhuduragun lun Bungiu kei iduheñu sagü dimaasu?
-
Ka gayaraabei hadügüni agübürigu lun hínsiñe lan áhuduraguni kei iduheñu houn sun tílana haban? (Ariha humóun iyawaü to lídanboun lagumeseha arufudahani le).
-
Ka gayaraabei ladügün lun hénrengu lan hun haturiahan kei iduheñu?
Lidan meha binadu Ísüraeli, agurabati meha Heowá lun hayanuhan sun iduheñu hámagua luagu le tariñagubei Lererun. Aliiha huméi 2 Lúrudu 6:6, 7, ábameti hayanuhan luagu álügüdahani le:
-
Ka gayaraabei hadügüni lun hafalaruni adundehani le?
Le gayaraabei wadügüni lidan wáhuduragun lun Bungiu keisi iduheñu:
-
Aturiaha humá lubá adamuridaguni.
-
Aliiha humá aban abahüdaguni tídangiñeti Bíbülia le hínsiñebei houn sun hiduheñu ani ayanuha humá luagu.
-
Anhein añahein lubéi irahüñü ñǘbürigiña huma, rarigüda huméi o imprimírü huméi dasi hounti isaanigu le lídanbei jw.org.
-
Anhein añahein lubéi irahüñü wéinamuraühaña huma, anúadira humá aban lídangiñe ariñahani hounti nibureintiña le lídanbei jw.org.
-
Adüga humá aban dürama úara le lídangiñeti aban abahüdaguni tídangiñeti Bíbülia.
-
Ariha humá aban bidéu lídangiñe jw.org ani ayanuha humá luagu.
LE HARIÑAGUBEI FIU GÜRIGIA: “Hénrenguti houn irahüñü gunfuranda hamanu Bíbülia”.
-
Kaba hamuga hariñaga?
LE HAFURENDEIRUBEI
Busenti Heowá lun hínsiñe hamá isaanigu houn agübürigu, lun harufudahan houn luma lun hóunigiruniña; busenti giñe lun gaganbadi hamá isaanigu houn agübürigu ani inebe hagíame houn luma lun háhuduragun sun iduheñu lun.
Águyuguagüdüni
-
Ida luba harufudahan agübürigu houn hasaanigu ani góunigi hamañame?
-
Ida luba harufuduni isaanigu inebe hamá hagübürigu houn?
-
Ka buiti ibihúbei dan le wadireirun dan sagü dimaasu lun wáhuduragun lun Bungiu kei iduheñu?
FURENDEI HUMÁ LANWOUN
Kaba arufudahani aranserei hisaani lubá danme le wéiriaali?
“6 arufudahani le hemegeirubei isaanigu” (Agaguduabá! núm. 2 2019)
Aliiha humá fiu adundehani le huuti houn ha óunigirubaliña hagübürigu ha derebuguhaña.
Ariha huméi ida liña lan lafurendeirun aban wügüri lun aban lan úguchili buiti lau sun meha ibidiñe lan lun ida luba lan lagüriaruniña lisaanigu.
Arufudahati Heowá woun ida luba lan wagüriaruniña wasaanigu (5:58)
Furendei huméi ka lan gayaraabei ladügüni aban úguchili lun buídutima lan lanaagun lungua hama lisaanigu.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
