Dan le ladügünbaliwa Heowá, aba líchugun aban lubuidun idewesei woun: iyaraani lun wayanuhan. Bereseti san Heowá lau ligaburi wayusuruni idewesei le? Anha, ítara liña (aliiha huméi Santiagu 1:26). Ida lubati wayusuruni iyaraani le lánina gayara lan wayanuhan lidan aban igaburi le auti lagundaara Heowá?

1. Ida luba buidu lan wayusuruni idewesei lúmagiñeti Heowá le lánina gayara lan wayanuhan?

Ariñagatu Bíbülia woun: “Rúmeme humá lubéi gurasu luma erei húniwagua” (1 Tesalónikana 5:11). Anihein san somu hasubudirágun le mégeiti dǘgüdaguaü? Ka gayaraabei hadügüni lun lasandiragun lungua buidu? Chóurugüda huméi lun gürigia ligía berese humá lau. Gayaraati hariñaguni lun ka lan hínsiñebei hun luagu. Gayaraati san hasaminarun luagun somu bérusu le gayaraati líchugun dǘgüdaguaü lun somu hasubudirágun? Anihein saragu bérusu le ídangiñebei gayara lan hanúadahan. Haritagua huméi giñe gayara lan líchugun ligaburi hariñaguni katei saragu dǘgüdaguaü houn amu. Ligíati, áfaagua humá lun hayanuhan lau gálumaü luma gamadóuni súnwandan (Ariñawagúni 15:1).

2. Ka ligaburi ayanuhani lunbei máyeihan wamani?

Ariñagatu Bíbülia: “Manabaha humá” (aliiha huméi Éfesuna 4:29). Mini lan le moun lumuti lan wariñagun bulagiadi ni dimurei le abuleseirutu hanigi amu. Moun lumuti giñe wachurahan ni lun wariñagun iyeeni hawagu amu (aliiha huméi Ariñawagúni 16:28).

3. Kaba íderaguawa ayanuha lidan aban igaburi le ruti dǘgüdaguaü houn amu?

Liibe-agei dan, arufuda lumuti le wariñagubei ka lan wasaminarubei luma ka lan tídanbei wanigi (Lúkasi 6:45). Ligíati mosu lubéi wéchudun asaminara luagu katei buiti: katei le richabei, le harumabei, le gúndaawabei lau luma le gadünabei uéiriguni (Filipuna 4:8). Lun wibihini katei le, mosu wanúadiruni wisebáhari buidu, áluaha wagíame umadagu buítiña (Ariñawagúni 13:20). Líderagubadiwa giñe wasaminarun lubaragiñe wayanuhan. Houcha humá hasaminarun luagu ida liña lan hadügün lun hasandiragun amu houngua lau le hariñagubei. Ariñagatu Bíbülia: “Añahein gürigia, abuleseihatiña láurügü hererun, gama lumoun ha chúbaña aau, areidaguagüdatiña lau hadimurehan” (Ariñawagúni 12:18).

 SIGÍ HUMÁ AFURENDEIRA

4. Góunigi huméi ligaburi hayanuhan

Sun wagía, ariñagaadiwa somu katei le uágubei wasaküriha lárigiñe (Santiagu 3:2). Aliiha huméi Galasiana 5:22, 23, ábameti hayanuhan luagu álügüdahani burí le:

• Kaba hamuga lídangiñe igaburi le hamuriaha luma Heowá lun líderagunün óunigirei le hariñagubei luma ligaburi hariñaguni? Ida luba líderagunün igaburi burí le?

Aliiha huméi 1 Korintuna 15:33, ábameti hayanuhan luagu álügüdahani le:

• Ka hánibei umadagu luma isebáhari le wanúadahabei lidan ligaburi wayanuhan?

Aliiha huméi Apurichihati 3:1, 7, ábameti hayanuhan luagu álügüdahani le:

• Ka hamuga dan buídutimabei lun wámanichun o wagurabuni dan le buídutimabei lubá wariñagun aban katei?

 5. Ayanuha humá buidu hawagu amu

6. Ayanuha humá houn hiduheñu lau ínsiñehabuni

 LE HAFURENDEIRUBEI

Wéiriti lubafu dimurei. Mosu wasaminaruni buidu kaba lan wariñaga, ídaba lan wariñagei ani ida luba lan wariñaguni.

Águyuguagüdüni

• Ida luba wíderaguniña amu lau ligaburi wayanuhan?

• Ka ligaburi ayanuhani lunbei máyeihan wamani?

• Ida luba gamadoun wamá, ru wagíame dǘgüdaguaü dan le wayanuhan?