Dan le hama wamá wíbirigu, sandiguatiwa woungua kei urúei Dawidi le ariñagubei: “Ariha humá ida liña lan lubuidun lun haganóun íbirigu lidan aban hámagua!” (Sálumu 133:1). Mama ítaraguarügüti úarani le wádanbei, lunti lídehan kada aban wádangiñe lun meferidirun lan úarani le.

1. Ka lídangiñe katei le hádanbei lumutuniña Bungiu hínsiñetimabei hun?

Anhaün ñüdün lidoun aban adamuridaguni lidan amu ageiraü, másiñati úabei lan gunfuranda humani iñeñein, íbini ítara, buídubei hasandiragun hungua. Ka uagu? Ladüga meberesenga halía lan woudin, aturiaha wamutu, wagía gefentiña luagu Heowá, Bíbülia tau tugiaméme agumeiraguagüdüni ani áfaaguatiwa lun warufudun ínsiñeni wámagua. Meberesenga halía lan wawinwanda, lúnrügüñein Heowá wáhuduragua súngubei wagía (Sofoníasi 3:9).

2. Ida luba hídehan lun ñein lan úarani lidan damuriguaü?

“Lunti lubeiti hínsiñegua humá hungua lau sun taruman hanigi, luma lau sun here” (1 Féduru 1:22). Ida luba hafalaruni adundehani le? Lubaragiñe hetenirun lun hachara amu, teni humá lun lubuidun hagaburi. Mámarügüla hama gürigia ha unbei hínsiñe lan ligiaméme katei kei huguya hóundaragua. Áfaagua humá lun hasubudirun íbirigu ha lídangiñetiña ámuñegueinarügü ageiraü o rasa. Áfaagua wamá lun wagidaruni sun iyereehabúni tídangiñe wanigi (aliiha huméi 1 Féduru 2:17). a

3. Kaba hadüga danme gaturobulin humá hama amu íbirigu?

Inarüni lídanñadiwa lan úarani, lau sun lira, kei gafigoun wabéi, ñeinbei dan wadügün katei le íchuguti igarigu luma íruni houn amu. Ligía tariñagunbei Lererun Bungiu: “Ferudunagua humá húmagua”. Ani ariñagatu giñe: “Ítara kei feruduna lanün Bungiu” (aliiha huméi Éfesuna 4:32). Liibe-agei dan, rútiwa igarigu lun Heowá, íbini ítara, feruduna lumutiwa. Ligíati aguraba lubéi lun feruduna wamaniña wíbirigu. Anhaün íchiga fe adügaadün lan lun lasandiragun aban gürigia lungua wuriba, heiba lumoun lun haranseruni turobuli (aliiha huméi Matéu 5:23, 24). b

 SIGÍ HUMÁ AFURENDEIRA

4. Ígira huméi iyereehabúni

Busentiwa warufudun ínsiñeni houn sun wíbirigu. Íbini ítara, másiñati hénrengubei lan woun lun wánharun houn fiu gürigia ha mítaranbaña kei wagía. Ka gayaraabei líderaguniwa? Aliiha huméi Adügaü 10:34, 35, ábameti hayanuhan luagu álügüdahani burí le:

• Ánhati Heowá lun lánibaña lan Gefentiña gürigia ha lídangiñetiña sun néchani. Ida luba háyeihani Heowá lidan ligaburi harihiniña gürigia ha ámubaña huéi?

• Ka igaburi le hawagubei gürigia lidan fulasu le ñein lubéi hawinwanda mabusenrun hubéi lun háyeihan lidan ligaburi hóuseruniña gürigia ha ámubaña huéi?

Aliiha huméi 2 Korintuna 6:11-13, ábameti hayanuhan luagu álügüdahani le:

• Ka gayaraabei hadügüni lúntima hínsiñe hamá sun íbirigu hun?

5. Ferudunagua humá húmawagua ani aranseha huméi turobuli

Lau sun memegeirun lan Heowá lun feruduna wamani, feruduna lumutiwa. Aliiha huméi Sálumu 86:5, ábameti hayanuhan luagu álügüdahani burí le:

• Ka larufudahabei bérusu le woun luagu ligaburi líchugun Heowá ferudun?

• Teinki humuti san Heowá luagu feruduna lanün? Ka uagu?

• Ka burí sügǘ gayaraabei ladügün lun hénrengu lan woun wanaagun woungua buidu hama amu?

Ka lunbei wadügüni lun wáyeihani Heowá kípugua wamaamuga woungua lidan úarani hama wíbirigu? Aliiha huméi Ariñawagúni 19:11, ábameti hayanuhan luagu álügüdahani le:

• Ida luba waransehani katei anhein adügaali lubéi somu gürigia lun wagañidun?

 Anihein dan wagía adügübei lun hagañidun amu. Ka lunbei wadügüni anhein asusereda lira? Ariha huméi BIDÉU, ábameti hayanuhan luagu álügüdahani le:

• Ida liña taranseruni íbiri to lídanboun bidéu titurobulin tuma amu íbiri?

 LE HAFURENDEIRUBEI

Ánhaña feruduna humá híbirigu, arufuda huguyame ínsiñeni houn súngubei, lídehaba le lun ñein lan úarani lidan damuriguaü.

Águyuguagüdüni

• Ida luba hagidaruni iyereehabúni tídangiñe hanigi?

• Kaba hadüga danme gaturobulin humá luma somu íbiri?

• Hínsiñeti hamuga san hun lun feruduna humaniña ha híbiri kei ladügüni Heowá? Ka uagu?