ARUFUDAHANI 57
Kaba san asusereda ánhana adüga aban figóu wéiriti?
Íbini hínsiñe lan Heowá hun tídangiñe sun hanigi ani adüga humuti sun hiyaraati lun madügün humá lun lasandiragun lungua wuriba, ñeinbei dan hachararun lun. Ani anihein figóu wéiritimati luéi amu (1 Korintuna 6:9, 10). Anhaün hamuga adüga aban figóu le wéiriti, mabulieida huméi madügünbei lan lira lun haminsiñedun lun Heowá; aranseñu liña Heowá lun feruduna lanün luma lun líderagunün.
1. Ka lunbei wadügüni lun feruduna lániwa Heowá?
Dan le líchugun aban gürigia le hínsiñehabuti lun Heowá fe adügaali lan aban figóu le wéiriti, aba labuinchun lau íruni. Íbini ítara, ruti Heowá dǘgüdaguaü lun lau füramasei le meha ladügübei houn lumutuniña: “Anhein funá lubéi hifigoun kei lagumuhóun ífunani, náharudagüdübei kei niewe” (Isaíasi 1:18). Ánhawa asaküriha tídangiñe sun wanigi, feruduna lubadiwa Heowá sunsuinagubei. Ka mini lubéi asakürihani? Mini lan sarí wamani tídangiñe sun wanigi wuribati le wadügübei, aba madügündigia wamaali lan ani aba webegirun lun Heowá lun feruduna lániwa. Ábati wáfaagun lau sun wanarün lun wasansiruni ligaburi wasaminan o échuni le anügübaliwa afigouha luma lun wáfaagun lun wafalaruni lilurudun Heowá le harumabei lidan wabagari (aliiha huméi Isaíasi 55:6, 7).
2. Ida liña layusuruniña Heowá wéiyaaña lidan afiñeni lun híderaguniwa dan le wafigouhan?
Ariñagati Heowá lun le afigouhabei lunti lan lagúarun houn wéiyaaña lidan afiñeni (aliiha huméi Santiagu 5:14, 15). Lau sífiri sandu hiridúa wügüriña ha ani hínsiñeti Heowá houn hau sun lumutuniña. Aranseñu haña giñe lun híderaguniwa abuiduragüdei wamadagua luma (Galasiana 6:1).
Ida liña híderaguniwa wéiyaaña lidan afiñeni anhein adügaadiwa lubéi aban figóu le wéiriti? Hayusuruboun biama o ǘrüwa hádangiñe Bíbülia lun híderaguniwa arihei ka lan wuribati wadügübei. Híchugubei giñe adundehani luma dǘgüdaguaü le wemegeirubei woun lun madügündigia wamani figóu ligía. Anhein adügaali lubéi aban gürigia aban figóu le wéiriti ani masakürihanti, hasagarubei wéiyaaña lidan afiñeni lídangiñe damuriguaü lun hóunigiruniña lílana luéi hagumeserun áyeihei luriban ligaburi.
SIGÍ HUMÁ AFURENDEIRA
Gunfuranda huméi ani teinki huméi le ladügübei Heowá lun líderaguniwa ánhawa adüga aban figóu le wéiriti.
3. Íderagua lumutiwa wagufeseruni wafigoun lunya labuidurun wamadagua luma Heowá
Furumiñeguarügü figóu le wadügübei, adügati lun lasandiragun Heowá lungua wuriba, ligía lunti lubéi wagufeseruni wafigoun lun. Aliiha huméi Sálumu 32:1-5, ábameti hayanuhan luagu álügüdahani le:
-
Ka uagu buidu lubéi lun wagufeseruni wafigoun lun Heowá lubaragiñe waramuduni?
Buítimati wasandiragun woungua dan le wagufeseruni wafigoun lun Heowá, áluaha waméi hídehan wéiyaaña lidan afiñeni. Ariha huméi BIDÉU, ábameti hayanuhan luagu álügüdahani le:
-
Ida liña híderaguni wéiyaaña lidan afiñeni Canon lun lagiribudun lun Heowá?
Lunti furangu wamá hama wéiyaaña lidan afiñeni ani ariñaga wameime sun inarüni houn; lugundun lun híderaguniwa añaha lubéi ñein. Aliiha huméi Santiagu 5:16, ábameti hayanuhan luagu álügüdahani burí le:
-
Afiñetün san ménrenguntimabei lan houn wéiyaaña lidan afiñeni lun híderaguniwa ánhawa ayanuha houn furangu? Ka uagu?
Gúfese huméi hifigoun ani ayanuha humá furangu hama wéiyaaña lidan afiñeni, anha huguyame lun lídehan Heowá le líchugubei hun lau ínsiñehabuni.
4. Arufudati Heowá gudemehabu houn afigouhatiña
Anhein adügaali lubéi aban gürigia aban figóu le wéiriti ani máhati gaganbadi lan lun lilurudun Heowá, sagawati lídangiñe damuriguaü. Ábati másügürünhaña lan íbirigu dan luma gürigia ligía. Aliiha huméi 1 Korintuna 5:6, 11, ábameti hayanuhan luagu álügüdahani le:
-
Ítara kei résigüda lanu lébini fein, ka gayaraabei lasuseredun ánhaña ásügüra lílana damuriguaü dan luma aban afigouhati le masakürihanti?
Kei áyeiha hamani lugudemehabu Heowá houn gürigia ha héiguaañabaña lidoun figóu, áluaha hamutiña wéiyaaña lidan afiñeni gürigia ha sagawaañabaña lídangiñe damuriguaü lun háfaagun lun híderaguniña. Ani giribuhaña saragu hágangiñe ladüga, lau sun gari lan abeichúni le heresibirubei, íderagua lumutiña lun hasakürihan (Sálumu 141:5).
Ida liña larihíniwa lugudemehabu luma línsiñehabu Heowá lidan ligaburi lahandilihani hakesin gürigia ha afigouhabaña?
5. Feruduna lumutiwa Heowá dan le wasakürihan
Íderagua lumutiwa hénpulu le labahüdagubei Hesusu lun gunfuranda wamani ida liña lan lasandiragun Heowá lungua dan le lasakürihan aban gürigia. Aliiha huméi Lúkasi 15:1-7, ábameti hayanuhan luagu álügüdahani le:
-
Ka larufudahabei abahüdaguni le woun luagu Heowá?
Aliiha huméi Esekiéli 33:11, ábameti hayanuhan luagu álügüdahani le:
-
Kátima katei lunbei wadügüni lun warufuduni asakürihaadiwa lan?
Ítara liña Heowá kei aban hóuniri mudún, bereseti hau lánigu.
LE HARIÑAGUBEI FIU GÜRIGIA: “Hanufudetina nabahüdaguni houn wéiyaaña lidan afiñeni ka lan nadügübei, lueime hasagarunina lídangiñe damuriguaü”.
-
Kaba hamuga hariñaga lun aban gürigia le asaminarubei ítara?
LE HAFURENDEIRUBEI
Ánhawa asaküriha tídangiñe sun wanigi dan le afigouhaadiwa lan ani aranseñu waña lun madügündigia wamani figóu ligía, feruduna lubadiwa Heowá.
Águyuguagüdüni
-
Ka uagu buidu lubéi lun wagufeseruni wafigoun lun Heowá?
-
Ka lunbei wadügüni lun feruduna lani Heowá wafigoun?
-
Ka uagu lunti lubéi wamuriahan hama wéiyaaña lidan afiñeni lun híderaguniwa anhein adügaadiwa lubéi aban figóu le wéiriti?
FURENDEI HUMÁ LANWOUN
Ariha huméi ida liña lan lasagarun aban wügüri buiti lídangiñe lugudemehabu Heowá le uágubei layanuhóua lidan Isaíasi 1:18.
Ka hadügübei wéiyaaña lidan afiñeni lun híderagun aban gürigia le adügübei aban figóu wéiriti?
Ariha huméi ida liña lan larufudún ínsiñeni luma gudemehabu houn afigouhatiña ha masakürihanbaña.
Lidan abahüdaguni luáguti ibagari le gíribei “Necesitaba volver a Jehová”, aliiha humá luagu aban wügüri le meha asandirubei megei lan lagiribudun lun Heowá.
“La Biblia les cambió la vida” (La Atalaya, to lánina 1 lidan gádürü-hati, irumu 2012)
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
