ARUFUDAHANI 59
Gayaraati hawanduni éibaahouni
Sun kristiánugu chülüti dan lun wéibaahouniwa. Lunti san wanufudedun luagu lira?
1. Ka uagu gayara lubéi wagurabun wéibaahouba lan?
Ariñagatu Bíbülia: “Inarüni luagu héibaahouba lan sun ha busenbaña habagaridun deregeguañu houngua lun Hesukrístu” (2 Timotéu 3:12). Éibaahouati meha Hesusu ladüga mama lan lílana ubóu le lábugiñebei lubafu Mafia ligía. Ani kei mama lan giñe lánigu ubóu le wagía, ligía maweiridun tubéi wanigi lau héibaahaniwa gumadimatiña tuma burí óundaruni tánina relihión to lídanboun ubóu le (Huan 15:18, 19).
2. Ida luba waranserun lubá weibaahóun?
Mosu wéredagüdüni wafiñen luagu Heowá guentó. Ida lubati wibihini lira? Lau wadireirun dan sagü weyu lun wafurieidun luma lun waliirunu Lererun, hechu wagíame abasiiha lidoun sun adamuridaguni. Anhein hadüga sun le, líchugubei sun erei le hemegeirubei hun lun hagagibudagun lau ganigi luma éibaahouni, íbini hiduheñu lan íchugubaña lidere dan hun. Kei meha gabügürügua lubéi leibaahóun apostolu Pábulu, abürühati: “Bungiu íderagubalina; manufudebadina” (Ebüréu 13:6).
Dan giñe le gabügürügua lan wapurichihan, adügati lira lúntima ganigi wamá. Íderagua lumutiwa apurichihani lun wafiñerun luagu Heowá luma lun manufude wamá hawéi gürigia (Ariñawagúni 29:25). Anhaün árügüda ganigi guentó, aranseñu huba lun hasigirun apurichiha íbini hálugun gumadimatiña lun hararamuni wawadigimari (1 Tesalónikana 2:2).
3. Barüti san wawanduni éibaahouni buiti woun?
Lau sun mínsiñe lan woun weibaahóun, ábatima léredun wafiñen dan le wawanduni. Yarafati giñe wasandiragun woungua lun Heowá dan le warihini ida liña lan líchugun erei woun dan le wasandirun siñá lan woun (aliiha huméi Santiagu 1:2-4). Lau sun magundan lan Heowá lau larihiniwa asufurira, gúndaati dan le larihini awanda wamá. Ariñagatu Bíbülia: “Anhaün asufurira luéigiñe hadügün katei buiti, aba hawanduni lau gurasu, buiti lira ligibugiñe Bungiu” (1 Féduru 2:20). Líchuguba Heowá hafayeiruaha houn sun ha awandutiña, úaragua hagía, lau líchugun ibagari magumuchaditi houn lidan aban iseri ubóu le ñeinba lubéi máganibei lan inarüni (Matéu 24:13).
SIGÍ HUMÁ AFURENDEIRA
Ariha waméi gayara lan warufudun úaraguni lun Heowá íbini weibaahóun ani wibihiba lan afayeiruahaü ánhawa awanda.
4. Gayaraati hawandun íbini hiduheñu lan íchugubaña lidere dan hun
Furanguti Hesusu dan le lariñagunbei ñéinbaña lan hádangiñe waduheñu ha máhatiña lun weseriwidun lun Heowá. Aliiha huméi Matéu 10:34-36, ábameti hayanuhan luagu álügüdahani le:
-
Dan le lanúadirun aban gürigia leseriwidún lun Heowá, ka gayaraabei hadügüni o hariñaguni liduheñu?
Lun hasubudirun fiu gürigia ha ásügürübaña lídangiñe le, ariha huméi BIDÉU. Lárigiñe, ábame hayanuhan luagu álügüdahani le:
-
Kaba hamuga hadüga anhein oucha aban humada o aban hiduhe lun meseriwidun humá lun Heowá?
Aliiha huméi Sálumu 27:10 luma Márükosu 10:29, 30. Lárigiñe haliihani kada bérusu, ayanuha humá luagu álügüdahani le:
-
Ida luba líderagunün füramasei le danme le louchun somu hiduhe o humada lun hararamuni heseriwidun lun Heowá?
5. Sigí humá áhuduragua lun Heowá íbini heibaahóun
Mosu ganigi wamá lun wasigirun eseriwida lun Heowá dan le houchun amu lun hararamuniwa. Ariha huméi BIDÉU, ábameti hayanuhan luagu álügüdahani le:
-
Ka hénpulu lídangiñeti bidéu le íchugubei ganigi hun?
Aliiha huméi Adügaü 5:27-29 luma Ebüréu 10:24, 25. Lárigiñe haliihani kada bérusu, ayanuha humá luagu álügüdahani le:
-
Ka uagu lunti lubéi wasigirun eseriwida lun Heowá íbini maha hamá gumadimatiña lun wapurichihan o wadamuridagun?
6. Líderagubadün Heowá awanda
Ibihaaña saragu gefentiña luagu Heowá ha ámuñegueinarügüti harumudiri luma hageira lun úaragua hamá lun Heowá íbini héibaahouña lan. Lun hasubudiruni ida liña lan habihini, ariha huméi BIDÉU. Ábameti hayanuhan luagu álügüdahani le:
-
Ka íderagubaliña gefentiña luagu Heowá ha lun hawanduni éibaahouni?
Aliiha huméi Rómana 8:35 luma 37-39, aliiha huméi giñe 2 Korintuna 4:7. Lárigiñe haliihani kada bérusu, ayanuha humá luagu álügüdahani le:
-
Ida liña lachoururagüdüni bérusu le hun gayara lan hawandun furumiñeguarügü lénrengunga?
Aliiha huméi Matéu 5:10-12, ábameti hayanuhan luagu álügüdahani le:
-
Ka uagu gayara lubéi gunda humá íbini héibaahouña lan?
Ibihaaña saragu míñunu lubúeingu Heowá hawanduni éibaahouni. Gayaraati giñe hibihini!
LE HARIÑAGUBEI FIU GÜRIGIA: “Násiñarubei éibaahouni awanda”.
-
Ka burí bérusu tídangiñeti Bíbülia gayaraabei líderaguniña ha asaminarubaña ítara?
LE HAFURENDEIRUBEI
Lun Heowá, wéiriti lebegi áfaaguni le wadügübei lun weseriwidun lun, íbini weibaahóun. Lau lídehan, gayaraabei wawandun!
Águyuguagüdüni
-
Ka uagu moun lumuti lubéi taweiridun hanigi kristiánugu lau heibaahóun?
-
Ida luba haranserun guentó lubá heibaahóun?
-
Ka achoururagüdübalin hun gayara lan heseriwidun lun Heowá meberesenga le asusereduti?
FURENDEI HUMÁ LANWOUN
Ariha huméi ida liña lan líderagun Heowá aban íbiri nibureingili dan le ladarúnbei furisunrugun ladüga mádaragun lan lungua lidoun katei le lánina ubóu.
Ariha huméi ka lan íderagubaliña aban feru maríeitiña lun hasigirun eseriwida lau úaraguni lun Heowá luagu saragu irumu íbini meha héibaahouña lan.
Furendei huméi ida luba lan ganigi humá lun hagagibudagun luma éibaahouni.
“Aranse wamá guentó lubá éibaahouni” (Garüdia Awisahatu, sedü-hati, irumu 2019)
Ida luba warihini éibaahouni le ñǘbuinbei hámagiñe waduheñu ani ida luba wídehan lun ñein lan darangilaü sun awanha lan arufuda úaraguni lun Heowá?
“Manügünti inarüni gálumaü, ‘wuribu’ lanügübei” (Garüdia Awisahatu, diisi-hati, irumu 2017)
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
