Winhaj Adán yetʼ ix Eva chiʼ ajnak yuninal hebʼ, ixtaʼ aj skibʼ sbʼisul hebʼ anima tʼa sat lum luʼum tik. Ay juntzanhxo ángeles lajan ixyutej sbʼa icha winh Diablo chiʼ, ixʼoch hebʼ yenemigoʼal Komam Dios.

Ixʼemta hebʼ tʼa satchaʼanh ixʼoch hebʼ animaʼil. Ixʼoch hebʼ yetbʼeyumok juntzanh hebʼ ix ix. Hebʼ ix ix chiʼ ixʼaj yune hebʼ ix. Te chaʼanh steʼel hebʼ, te ay yip hebʼ, manh wachʼoklaj sbʼeybʼal hebʼ.

Ixbʼutʼjiʼel lum luʼum yuj hebʼ anima manh wachʼoklaj. Ha chʼanh Biblia syala «to axonhej tas malaj swachʼil ayekʼ tʼa spensar hebʼ».

Winhaj Noé te wachʼ spensar winh. Yuj chiʼ ixʼalji tʼa winh yuj Komam Jehová, to olsatel hebʼ anima manh wachʼoklaj spensar yuj jun niwan nhabʼ.

Ixʼalji tʼa winh to sbʼo jun te barco, ma arca. Ataʼ syakʼoch spamilia winh yetʼ junjun makan nokʼ nokʼ.

Winhaj Noé ixyalel winh tʼa hebʼ anima to olja jun niwan nhabʼ. Maj smaklejlaj yabʼ hebʼ. Ay mach ixteʼ tzetzan winh, axo juntzanhxo hebʼ ixkot yowal tʼa winh.

Ha ixbʼoʼel teʼ arca chiʼ yuj winhaj Noé, ixyakʼanoch nokʼ nokʼ chiʼ winh tʼa yol teʼ.