Ha Jehová haton jun Dios te tzalajkʼolal yaji. Ha tʼay skot jantak abʼix te wachʼ, snibʼej winh to te tzalajkʼolal tzʼajekʼ junjun pamilia (1 Timoteo 1:11). Ha jun nupnajel chiʼ skot tʼa winh Jehová. Ha jun nupnajel tʼa yichanh hebʼ winh yajal swinakil tik te wachʼ, yujto ixtaʼ syal kʼibʼtzitan yuninal hebʼ schawanhil, skolwaj paxi yik tzalajkʼolal tzʼajekʼ hebʼ. Ha hebʼ tzʼakʼan servil koMam Dios yowalil skʼanabʼajej juntzanh scheknabʼil hebʼ bʼaj syalaʼ to sbʼochaj yuʼumal juntzanh nupnajel chiʼ. Awtej Lucas 2:1, 4, 5.

Tas tzʼaj yilanoch jun nupnajel chiʼ koMam Dios? Ha winh snibʼejwal to tʼa junelnhej syikʼlaj sbʼa junok winh winak yetʼ junok ix ix. Snibʼej pax winh to ha hebʼ ayxo yetbʼeyum anhej tʼa yetbʼeyum hebʼ chiʼ syakʼoch spensar (Hebreos 13:4). Ha Jehová schakel jun puklajbʼaʼil chiʼ winh (Malaquías 2:16). Palta, syal spuklan sbʼa junok anima syal pax yochxi yetbʼeyum, anhej tato ay junok hebʼ tzʼem ajmulal. Awtej Mateo 19:3-6, 9.

Ha Jehová bʼoʼannak winh winak yetʼ ix ix yik skol-laj sbʼa hebʼ hayik nupnajnakxo hebʼ (Génesis 2:18). Ha winh etbʼeyumabʼil jolomal yaj winh, yuj chiʼ ha winh ay yalan yik sayanekʼ chajtil tzʼaj yekʼ yibʼanh kʼinal yuj spamilia. Schʼoxpaxel sLolonel koMam Dios winh tʼa hebʼ yalyuninal. Tzʼochwal yilkʼolal winh yuj ix yetbʼeyum chiʼ yujto sxajanej ix winh. Hebʼ yetbʼeyumxo sbʼa yowalil sxajanej sbʼa hebʼ, niwanokabʼ pax yelkʼoch junjun hebʼ tʼay. Yujto ay spaltaʼil hebʼ, yowalil syilel hebʼ yakʼlan niwankʼolal sbʼa yik icha chiʼ tzalajkʼolal tzʼajekʼ hebʼ. Awtej Efesios 4:31, 32; 5:22-25, 33, yetʼ 1 Pedro 3:7.

Tato ha chawanh anima chiʼ ay yowal, yowalil syakʼwal yip hebʼ sxajanan sbʼa (1 Corintios 13:4, 5). Ha tʼa sLolonel koMam Dios malaj bʼaj syalkani to syal spukan sbʼa hebʼ yik sbʼoyaj juntzanh yowal hebʼ. Awtej 1 Corintios 7:10-13.

Ha Jehová snibʼejwal winh to te tzalajkʼolal tzʼajekʼ hebʼ uninabʼil. Yuj chiʼ schʼoxel winh tas wachʼ skʼulan hebʼ yakbʼan unin animato hebʼ. Snibʼej winh to sbʼeybʼalej jun wachʼ sbʼeybʼal smam snun hebʼ (Colosenses 3:20). Snibʼej pax winh to tzalajkʼolal tzʼaj hebʼ yakʼan servil winh yetʼ winh Yuninal. Awtej Eclesiastés 11:9–12:1; Mateo 19:13-15, yetʼ 21:15, 16.

Ha hebʼ mamabʼil yowalil sayekʼ hebʼ tas olyabʼlej yalyuninal, spat hebʼ yetʼ spichul hebʼ (1 Timoteo 5:8). Palta manhoknhejlaj jun chiʼ. Yowalil skʼaybʼaj pax hebʼ yuj hebʼ yik sxajanej Dios hebʼ, syojtakanel winh hebʼ (Efesios 6:4). Hayik schʼoxel hebʼ mamabʼil to sxajanejwal Dios hebʼ syakʼwal wachʼil tʼa yalyuninal hebʼ. Tato ha tʼa yik sLolonel koMam Dios skʼaybʼaj hebʼ olwachʼ tojolbʼok spensar hebʼ yuʼuj. Awtej Deuteronomio 6:4-7 yetʼ Proverbios 22:6.

Ha hebʼ uninabʼil yowalil tzʼalchaj wachʼ lolonel tʼa hebʼ yuj tas wachʼ skʼulej hebʼ. Yowalil skachchajxi hebʼ, yik icha chiʼ max kʼulejlaj juntzanh tas manh wachʼoklaj tʼa hebʼ (Proverbios 22:15). Manh komonnhej olkʼe kowal tʼa hebʼ mato olkokomon makʼej hebʼ yetʼ chichonkʼolal. Awtej Colosenses 3:21.

Ha hebʼ testigo yik Jehová te ayxo chʼanh huʼum ixsbʼo hebʼ yik skolwaj chʼanh tʼa hebʼ mamabʼil yetʼ hebʼ uninabʼil. Masanil chʼanh ha tʼa yol chʼanh Biblia tzʼikʼchajelta tas syalaʼ. Awtej Salmo 19:7, 11.