SJOLOMAL 15
Tas yuʼuj te yowalil to max aktej hakʼaybʼan tas syal chʼanh Biblia?
1. Tas olʼaj skolwaj tʼayach tato max aktej hakʼaybʼan tas syal chʼanh Biblia?
Ha juntzanh skʼaybʼubʼal chʼanh Biblia toxo ixʼilel tik, ha ixʼikʼan swachʼ kʼibʼ haxajanil tʼa yibʼanh Jehová. Yuj chiʼ te yowalil to max aktej ha kʼibʼtzitan haxajanabʼil tʼa winh (1 Pedro 2:2). Olʼach ajnhejekʼ tʼa stzʼey koMam Jehová chiʼ tato tzakʼaybʼejnhej tas syal chʼanh Biblia yik icha chiʼ olyal hachaʼan hakʼinal tʼa junelnhej. Awtej Juan 17:3 yetʼ Judas 21.
Tato max aktej ilanel sLolonel koMam Dios, olhawachʼ akʼejoch winh yipok hakʼoʼol. Ixtaʼ bʼiʼan olʼakʼan tzalajbʼok skʼoʼol winh (Hebreos 11:1, 6). Ha skakʼanoch koMam Dios tʼa kokʼoʼol, skonawal kobʼa skowachʼ tojolbʼitan kobʼeybʼal. Awtej Hechos 3:19.
2. Chajtil syal hakolwaj tʼa juntzanhxo anima?
Ha hach tik syal och tʼa skal spamilia koMam Dios
Tekanto tzanibʼej alanel tʼa juntzanhxo anima juntzanh tas toxo ixʼilel tik, yujto masanil onh skonibʼej kalanel wachʼ abʼix. Hayik olʼikʼan ha jelanil tʼa sLolonel chiʼ, olyal hakʼanan chʼanh Biblia ixtaʼ bʼiʼan olyal alanel yabʼixal Jehová yetʼ juntzanh wachʼ abʼix syal winh tʼa hebʼ anima. Awtej Romanos 10:13-15.
Syal hayamanoch alanel tʼa hebʼ hapamilia yetʼ hebʼ hawachʼ kʼoʼol. Palta, akʼankʼolal tzʼaj alaneli. Manh komonok tzal tʼa hebʼ to ha juntzanh skʼaybʼubʼal hebʼ chiʼ manh wachʼoklaj, más wachʼ to ha juntzanh syaltej koMam Dios tzal tʼa hebʼ. Nakoti to tato wachʼ tzutej habʼeybʼal chiʼ te wachʼ olʼaj yilanoch hebʼ tʼa yichanh tʼa tas tzal chiʼ. Awtej 2 Timoteo 2:24, 25.
3. Tas wachʼil syal hachaʼani?
Tato max aktej hakʼaybʼan tas syal chʼanh Biblia olhawachʼ akʼejoch koMam Dios yipok hakʼoʼol. Te niwan pax olʼajyelkʼoch winh koMam Jehová chiʼ tʼayach. Icha junok spamilia koMam Dios olhach-ajok. Awtej 2 Corintios 6:18.
4. Tas jun syal skolwaj chiʼ tʼayach yik tzawachʼ ojtakejel koMam Dios?
Tato tzakʼaybʼej tas syal chʼanh Biblia tik olʼilel habʼeybʼalan tas syal chʼanh (Hebreos 5:13, 14). Kʼan tʼa junok testigo yik Jehová to tzachskʼaybʼej yetʼ jun chʼanh huʼum ¿Qué nos enseña la Biblia? Ha olhawachʼ ilanel chiʼ, te tzalajkʼolal olhach-ajok. Awtej Salmo 1:1-3 yetʼ 73:27, 28.
Nakoti to ha juntzanh wachʼ abʼix ay tʼa yol chʼanh Biblia chiʼ ha tʼa koMam Jehová skoti, haton jun Dios te tzalajkʼolal yaji. Ha hachxo tik jun olyal hanitzanoch habʼa tʼa stzʼey winh tato tzamolbʼej habʼa yetʼ hebʼ skʼanabʼajan winh (Hebreos 10:24, 25). Yuj chiʼ tato ha hach tik tzakʼwal ip habʼoʼan icha sgana Jehová chiʼ, olhachawal jun kʼinal tʼa walyel: haton jun kʼinal tʼa junelnhej. Tʼa walyel ha jun más te wachʼ hakʼulan chiʼ ha wal hanitzanoch habʼa tʼa stzʼey koMam Dios. Awtej 1 Timoteo 1:11 yetʼ 6:19.
Syal pax hilan jun tik
SPECIAL CAMPAIGN
Tas yuʼuj yowalil skawtej chʼanh Biblia?
Manh jantakok hebʼ anima tʼa masanil yolyibʼanhkʼinal tik, ilchajnak yuj hebʼ tʼa chʼanh Biblia juntzanh skʼanbʼej ste sayejekʼ chiʼ. Agana ilanel pax achtik?
