SJOLOMAL 10
Chajtil syal kilaneli mach jun kuynabʼil tʼa walyel chiʼ?
1. Tom junnhej jun kuynabʼil tʼa walyel chiʼ?
«Ay hebʼ niwanok syaloch sbʼa schekabʼok Dios, tzeyilwal hebʼa tʼa hebʼ». (MATEO 7:15)
Ha jun kuynabʼil tʼa walyel chiʼ haton sbʼeybʼalejnak Kajal Jesús yetʼ hebʼ skʼaybʼum. Ixlajbʼej jun chiʼ winh icha junok bʼe tzʼikʼanbʼat tʼa jun kʼinal tʼa junelnhej, palta jaywannhej hebʼ anima tzʼilchaj yuʼuj (Mateo 7:14). Ha jun kuynabʼil scha koMam Dios, anhej jun sbʼeybʼalan tas syal sLolonel winh. Machwal hebʼ skʼanabʼajan icha syal chʼanh chiʼ junxonhej pensaril tzʼaj hebʼ. Awtej Juan 4:23, 24; 14:6, yetʼ Efesios 4:4, 5.
2. Tas yalnakkan Jesús tʼa yibʼanh hebʼ tonhej stzʼakoch sbʼa schekabʼok Dios?
Syal hebʼ to yojtakwal Dios hebʼ, palta ha tʼa sbʼeybʼal hebʼ scheklajeli to manh yojtakok Dios chiʼ hebʼ. (TITO 1:16)
Yalnak Jesús chiʼ to olkʼe waʼanh juntzanh hebʼ syaloch sbʼa schekabʼok Dios, yik sjuʼel jun skʼaybʼubʼal Jesús chiʼ hebʼ. Ha hebʼ anima tik yetʼ juntzanh yiglesia hebʼ syaloch sbʼa hebʼ schekabʼok Dios. Wachʼxom syal hebʼ to ha yelal sbʼeybʼalej hebʼ, tonhej syakʼ musansatil hebʼ anima hebʼ. Palta, syal kilaneli mach jun kuynabʼil tʼa walyel chiʼ yuj tas sbʼeybʼalej hebʼ ayoch chiʼ tʼay. Awtej Mateo 7:13-23.
3. Machtak hebʼ sbʼeybʼalan jun kuynabʼil tʼa walyel chiʼ?
Kileknabʼ oyeʼ tas schʼoxaneli machtak hebʼ:
-
Skʼanabʼajej chʼanh Biblia hebʼ yujto sLolonel koMam Dios yaj chʼanh tʼa hebʼ. Manhoklaj skʼaybʼubʼal hebʼ anima sbʼeybʼalej hebʼ, syakʼwal yip hebʼ skʼanabʼajan tas syal chʼanh Biblia (Mateo 15:7-9). Sbʼeybʼalan pax tas tzekʼ yalel hebʼ. Awtej Juan 17:17 yetʼ 2 Timoteo 3:16, 17.
-
Syikʼchaʼanh sbʼi koMam Dios hebʼ, haton Jehová. Skʼulejnak jun tik Jesús ha yakʼannakkan yojtakejel sbʼi sMam winh. Yalnakel yabʼixal Jehová winh tʼa hebʼ anima. Chʼoxnak pax winh chajtil olʼaj skʼanan hebʼ tʼa slesal to tzʼikʼchajchaʼanh jun bʼi chiʼ (Mateo 6:9). Mach junok kuynabʼil ay bʼaj ayach chiʼ schʼoxanel sbʼi koMam Dios? Awtej Juan 17:26 yetʼ Romanos 10:13, 14.
-
Syalpaxel yabʼixal jun sYajalil Dios hebʼ. Ixʼakʼjikot Jesús tʼa sat lum luʼum tik yik syalel yabʼixal jun Yajalil chiʼ. Skʼulejnhej jun chiʼ winh masanto ixchami. Yujto anhej jun chiʼ syal yakʼanoch hebʼ anima yipok skʼoʼol (Lucas 4:43; 8:1; 23:42, 43). Yalnak paxi to ha hebʼ skʼaybʼum olyalel yabʼixal jun Yajalil chiʼ hebʼ. Nanabʼ jun tik: Tato ay mach skʼoch yalel yabʼixal jun sYajalil koMam Dios chiʼ tʼayach, machtaxlaj jun kuynabʼil bʼaj ayoch chiʼ? Awtej Mateo 24:14.
-
Manh yikok yolyibʼanhkʼinal tik hebʼ. Ha hebʼ skʼaybʼum Kajal Jesús max yekochlaj sbʼa hebʼ tʼa skal política yetʼ tʼa tas skʼulej juntzanhxo hebʼ anima smolchaʼanh sbʼa yakʼan owal (Juan 17:16; 18:36). Max sbʼeybʼalej paxlaj juntzanh tas manh wachʼoklaj hebʼ ay tʼa yolyibʼanhkʼinal tik. Awtej Santiago 4:4.
-
Scheklajwalelta to sxajanej sbʼa hebʼ. Ha tʼa sLolonel koMam Dios ixkʼaybʼej hebʼ to yowalil ay yelkʼoch hebʼ anima tʼa sat hebʼ, yalnhej tas chonhabʼil bʼaj ay hebʼ. Ha juntzanh komon kuynabʼil xikan syekoch sbʼa hebʼ tʼa juntzanh niwak owal yik hebʼ yajal, palta haxo hebʼ skʼanabʼajan koMam Dios max skʼulejlaj jun chiʼ hebʼ (Miqueas 4:1-3). Okxo tik, tʼa smasanil skʼoʼol hebʼ syakʼwal stiempo, stumin hebʼ yik skolwaj hebʼ yakʼan stekʼanil hebʼ yet-animaʼil. Awtej Juan 13:34, 35 yetʼ 1 Juan 4:20.
4. Tom syal ilanelta mach jun kuynabʼil tʼa walyel chiʼ?
Machtaxlaj jun makanh hebʼ anima anhej tʼa yol chʼanh Biblia syikʼkʼeta juntzanh skʼaybʼej hebʼ yetʼ syikʼanpaxchaʼanh sbʼi Dios hebʼ? Machtaxlaj hebʼ tzʼalanxi to anhej jun sYajalil koMam Dios syal yakʼanoch hebʼ anima yipok skʼoʼol? Machtaxlaj jun kuynabʼil bʼajtil ha hebʼ ayoch chiʼ tʼay sxajanejwal sbʼa hebʼ, max kolwajpaxlaj hebʼ tʼa juntzanh niwak owal tzuji tʼa yolyibʼanhkʼinal tik? Tas tzʼaj hanaʼani? Awtej 1 Juan 3:10-12.
