SJOLOMAL 2
Mach koMam Dios?
1. Tas yuʼuj te yowalil skakʼ servil koMam Dios chiʼ?
Ha Dios bʼoʼannak masanil tas. Aytaxonekʼ winh malaj bʼakʼinh olsatelok (Salmo 90:2). Ha tʼa winh skot juntzanh wachʼ abʼix aykanem tʼa chʼanh Biblia (1 Timoteo 1:11). Yujto ha winh akʼannak kokʼinal, anhej winh syal kakʼan servil, anhej tʼay syal kakʼanem kobʼa. Awtej Apocalipsis 4:11.
2. Tas syal chʼanh Biblia tʼa yibʼanh koMam Dios?
Mantalaj junok anima ilannakxo yujto espíritu yaj winh, te niwanxo pax yelkʼoch tʼa kichanh, yujto anima onh (Juan 4:24, 6:46). Palta syal kilanel tas smodoʼal winh yuj masanil tas sbʼonak. Kʼinalok ha jantak sat te teʼ yetʼ sxumakil te teʼ sbʼonak winh ha schʼoxaneli to tzonhxajanej winh te ay pax sjelanil winh. Anaʼ paxi ha skilani to te niwakil satchaʼanh yetʼ sat lum luʼum tik ha schʼoxaneli to te ayxo pax spoder winh. Awtej Romanos 1:20.
Ha junxo tas syal skolwaj tʼayonh yik skojtakejel koMam Dios: ha kawtan chʼanh Biblia. Ha chʼanh tzʼalan tʼayonh chajtil syutej sbʼa koMam Dios tʼa hebʼ anima, tas juntzanh scha skʼoʼol yetʼ juntzanh max chalaj skʼoʼol. Yetʼ pax tas tzʼaj snaʼan tʼa yibʼanh juntzanh tas tzuji. Awtej Salmo 103:7-10.
3. Tom ay sbʼi Dios chiʼ?
Ha Jesús alannakkani: «Hach koMam ay hach ekʼ tʼa satchaʼanh. Niwanokabʼ yelkʼoch habʼi» (Mateo 6:9). Wachʼxom koMam ma Kajal tzʼalchaj tʼa winh, palta junnhejwal sbʼi winh. Yalnhej tʼa tas tiʼal tzʼalchaj jun sbʼi chiʼ, chʼok chʼok tzʼaj yalchaji. Jehová tzʼalchaj tʼa kotiʼ, ay pax mach Yavé tzʼalan tʼay. Awtej Salmo 83:18.
Tʼa juntzanhxo chʼanh Biblia, ha jun bʼi te niwan yelkʼoch tik ixkʼexchaji, haxo Dios ma Kajal ixyakʼoch hebʼ skʼexulok. Palta, hatax tzʼibʼchajnakkan chʼanh Biblia tik aytaxonem sbʼi Dios chiʼ tʼa yol chʼanh, 7 mil wal sbʼisulal scheklaji. Ha skʼaybʼannak hebʼ anima Jesús chiʼ tʼa yik koMam Dios, xikan yalnak sbʼi koMam Dios winh tʼa hebʼ. Awtej Juan 17:26.
4. Tom ay kelkʼoch tʼa sat koMam Dios chiʼ?
Icha jun mamabʼil tik, koMam Dios yojtak tas wachʼ chiʼ tʼayonh
Tato tʼa walyel tzonhsxajanej winh, tas yuʼuj tonhej tzʼoch kʼelan tʼa juntzanh yaʼelal tzuji tik? Ay juntzanh hebʼ tzʼalani to ha winh, tzonhakʼan proval ha sjawi juntzanh yaʼelal tʼa kibʼanh. Palta ha jun chiʼ manh yeloklaj. Awtej Santiago 1:13.
Ha Jehová tzʼakʼan kosikʼlej tas kobʼeybʼalej tʼa kokʼinal. Más wachʼ to skosikʼlej kakʼan servil koMam Dios (Josué 24:15). Palta te tzijtum hebʼ anima anhej juntzanh chukal skʼulej hebʼ, yuj chiʼ te ayxo pax yaʼelal. Palta haxo Jehová tzʼokʼwal skʼoʼol yilanoch juntzanh chukal tik. Awtej Génesis 6:5, 6.
Yujto tzonhstexajanej Jehová, snibʼejwal winh to te tzalajkʼolalnhej tzonhaji, toxowal olyakʼlajwok yaʼelal tik winh yetʼ juntzanh chukal. Palta jun, aywal yuʼuj tonhej tzʼoch kʼelan tʼa juntzanh yaʼelal tzuji tik. Ha tʼa sbʼisulal wajxakeʼ olwachʼ alchajok tas yuʼuj. Awtej Salmo 37:10, 11 yetʼ Proverbios 2:21, 22.
5. Tas tzʼaj konitzanoch kobʼa tʼa stzʼey Dios chiʼ?
Syal konitzanoch kobʼa tʼa stzʼey koMam Jehová chiʼ ha tzonhlesalwi. Ay yilkʼolal winh kuʼuj (Salmo 65:2; 145:18). Anaʼ paxi, snibʼejwal winh onhyakʼan niwankʼolal yujto yojtak winh to skakʼwal kip kobʼoʼan icha sgana, wachʼxom manh masanilok tiempo syal kuʼuj. Yuj chiʼ, wachʼxom ay kopaltaʼil, syal kamigoʼan winh. Awtej Salmo 103:12-14 yetʼ Santiago 4:8.
Yujto ha winh akʼannak kokʼinal, yuj chiʼ jun yowalil ekʼalto skotexajanej winh tʼa yichanh juntzanhxo tas (Marcos 12:30). Skochʼoxeli to skoxajanej winh ayik skojtakanel winh yetʼ skokʼanabʼajan scheknabʼil winh. Ha skokʼulan jun tik, skowachʼ nitzoch kobʼa tʼa stzʼey winh. Awtej 1 Timoteo 2:4 yetʼ 1 Juan 5:3.
