Ha Jesús chʼokyel tʼa hebʼ anima yujto espíritu yaj winh tʼa satchaʼanh hayik manto kotlaj tʼa sat lum luʼum tik (Juan 8:23). Ha winh ixbʼabʼlaj bʼochaj yuj Jehová haxo winh ixkolwaj yetʼ Jehová chiʼ yik sbʼoʼan masanil tas. Anhejwal Yuninal Dios yujto anhej koMam Dios bʼoʼannak, malaj junok mach ixkolwaj yetʼok (Juan 1:14). Ha tʼa chʼanh Biblia «sLolonel Dios» tzʼalchaj pax tʼa wihn, yujto yalnakel slolonel sMam winh. Awtej Proverbios 8:22, 23, 30 yetʼ Colosenses 1:15, 16.

Yakʼnakkot yuninal koMam Dios tʼa sat lum luʼum tik. Palta yik syal sjawi, ha tʼa jun ix kobʼes unin skuch María ixʼakʼchajoch skʼinal winh. Ixtaʼ bʼiʼan, ixkuchkanoch yuneʼ ix, yuj chiʼ jun, manh animaʼoklaj smam winh Jesús chiʼ (Lucas 1:30-35). Ay oxeʼ tas nabʼil yuj winh ha skotnak tʼa sat lum luʼum tik: 1) to tzul schʼoxel jun yelal winh tʼa yibʼanh koMam Dios, 2) ul schʼoxnakel yetʼ sbʼeybʼal chajtil skutej kokʼanabʼajan tas snibʼej koMam Dios, wachʼxom tʼa skal yaʼelal ayonh, 3) ixja yakʼcham sbʼa kuʼuj yik tzonhskolkanelta. Awtej Mateo 20:28.

Ay bʼaj stupchaj stojol junok anima yik skolchajkani (Éxodo 21:29, 30). Ha koMam Dios malaj sgana winh to tzonhichamaxi ma tzonhchami. Kojtak jun tik yujto ha koMam Jehová yalnak winh tʼa winhaj Adán chiʼ tobʼ tato tzʼoch smul winh olcham winh. Yuj chiʼ jun, okwalto maj ochlaj smul winh, maj chamlaj winh (Génesis 2:16, 17; 5:5). Ha chʼanh Biblia tzʼalani, to ha jun chamel tik kotnakkan tʼa yolyibʼanhkʼinal tik yuj winhaj Adán. Ha yuj winh ochnakkan smul hebʼ  yuninal chiʼ kotnak pax chamel tʼa yibʼanh hebʼ. Yuj chiʼ, yowalil stupchajkanel stojol jun yikʼnakkankot winhaj Adán chiʼ tʼa kibʼanh. Awtej Romanos 5:12 yetʼ 6:23.

Ha tiknaʼik jun, mach syal stupani yik syal onhskolankanel tʼa chamel chiʼ? Ha tzonhchami anhej komul skotupkaneli. Yujto anima onh ay kopaltaʼil, malaj junok mach syal stupanel smul junok yet-animaʼil. Awtej Salmo 49:7-9.

Yujto chʼokyel tʼayonh, ha Jesús tik malaj jabʼok smul winh. Yuj chiʼ manh chamnakoklaj winh yuj smul, ha yujto stupel yik hebʼ anima winh. Ha koMam Dios schʼoxnakwalel sxajanil tʼa hebʼ anima ha yakʼannakkot Yuninal yakʼcham sbʼa kuʼuj. Ixchʼox paxel Jesús to tzonhxajanej yujto skʼanabʼajej sMam, ha yakʼannak skʼinal kuʼuj yik tzonhskolkanel tʼa komul yetʼ chamel. Awtej Juan 3:16 yetʼ Romanos 5:18, 19.

Hilnab’ jun video tik Tas yuj chamnak winh Jesús?

Ha ekʼnak winh tʼa sat lum luʼum tik, ixyanhtej hebʼ penaʼay, ixpitzwixi hebʼ chamnak yuʼuj ixkolwaj pax tʼa hebʼ tzʼabʼan syaʼil. Ixtaʼ ixʼaj schʼoxaneli tastak olskʼulej tʼa jun tiempoʼal toto oljawok yuj hebʼ tzʼakʼan servil koMam Dios (Mateo 15:30, 31; Juan 5:28). Ha ixscham Jesús chiʼ, ixʼikʼchajkʼe waʼanh yuj koMam Dios, ixʼakʼchajxi skʼinal yuj winh icha espíritu tʼa satchaʼanh (1 Pedro 3:18). Ixtaʼ bʼiʼan, ixʼem kʼojan Jesús chiʼ tʼa swachʼ kʼabʼ Dios yik stanhwej yakʼchaj yopisio yik tzʼoch yajalil tʼa yibʼanh lum luʼum tik (Hebreos 10:12, 13). Tʼa kotiempoʼal tik ha Jesús wan yakʼan yajalil tʼa satchaʼanh, haxo hebʼ skʼaybʼum winh wan yalanel yabʼixal hebʼ tʼa masanil yolyibʼanhkʼinal tik. Awtej Daniel 7:13, 14 yetʼ Mateo 24:14.

Yujto akʼbʼilxo yopisio yuj Dios ha jun yajal te ayxo spoder tik, toxo olsatel hebʼ anima chuk yuj winh yetʼ juntzanh yaʼelal syikʼchaʼanh hebʼ. Masanil mach tzʼakʼanoch Jesús tʼa skʼoʼol, skʼanabʼajan paxi te tzalajkʼolal olʼajxi hebʼ tʼa sat lum luʼum tik hayik te wachʼtzin olʼajxikan luʼum. Awtej Salmo 37:9-11.