Ha Jehová, koMam yaji, koBʼoʼumal paxi, ekʼxowal te jelan tʼa kichanh. Tzonhxajanej tzʼoch pax yilkʼolal kuʼuj. Maj onhsbʼolaj winh yik haʼonh munilnhej skilaʼ tas wachʼ kokʼulani (Jeremías 10:23). Kʼinalok ha hebʼ kotak unin yowalil tzʼalchaj tʼa hebʼ yuj smam snun tas wachʼ skʼulani, icha pax chiʼ yaj Dios tʼayonh (Isaías 48:17, 18). Ha juntzanh kachnabʼil aykanem tʼa yol chʼanh Biblia silabʼ koMam Dios yajkan tʼayonh. Awtej 2 Timoteo 3:16.

Ha juntzanh scheknabʼil yetʼ skachnabʼil Jehová schʼoxel tʼayonh chajtil tzʼaj kajekʼi, schʼoxpaxel tʼayonh chajtil syal kochaʼan syaxil skʼabʼ koMam Dios tʼa jun tiempoʼal toto oljawok. Yujto ha winh onhbʼojinak, to yuj chiʼ yowalil skokʼanabʼajej skachnabʼil winh. Awtej Salmo 19:7, 11 yetʼ Apocalipsis 4:11.

Ha juntzanh skachnabʼil chʼanh Biblia skolwaj tʼayonh yik skojtakejeli tas wachʼ kokʼulan tʼa kobʼeybʼal. Haxo juntzanh scheknabʼil jun, tzʼalan tʼayonh tas syal kokʼulani yetʼ pax tas max yal-laj kokʼulani (Deuteronomio 22:8). Yuj chiʼ yik snachajel kuʼuj chajtil syal kakʼanoch tʼa yopisio junok kachnabʼil chiʼ, yowalil skonaʼubʼtanhej tas wachʼ kokʼulani (Proverbios 2:10-12). Kʼinalok, ha chʼanh Biblia tzʼalani to ha kokʼinal tik silabʼ koMam Dios yaji. Ha jun tik syal skolwaj tʼayonh tʼa bʼaj tzonhmunlaji, tʼa kopat yetʼ pax tʼa bʼajtaktiʼil tzonhekʼi, yujto syekkot konaʼa to yowalil ilbʼil tzonhekʼiʼ. Awtej Hechos 17:28.

Ha Jesús yalnak mach chabʼ cheknabʼil te niwan yelkʼoch chiʼ. Ha jun bʼabʼel chiʼ schʼoxaneli tas yuʼuj bʼobʼilonhkani: to skojtakejel  koMam Dios, skoxajanej winh yik sikʼlabʼil skokʼanabʼajej pax winh. Yowalil skonakot jun tik tʼa masanil tas skokʼulej (Proverbios 3:6). Machtak sbʼeybʼalani olʼoch hebʼ yamigoʼal koMam Dios, olʼoch paxwal hebʼ tʼa tzalajkʼolal olschaʼan skʼinal hebʼ tʼa junelnhej. Awtej Mateo 22:36-38.

Ha jun schabʼil cheknabʼil skolwaj tʼayonh yik icha chiʼ junkʼolal tzonhajekʼ yetʼ hebʼ ket-animaʼil (1 Corintios 13:4-7). Tato icha chiʼ skutej kobʼa wan kochʼoxanel jun sbʼeybʼal koMam Dios. Awtej Mateo 7:12 yetʼ 22:39, 40.

Ha yuj tas syal chʼanh Biblia tik skoxajanej kobʼa, jun molannhej pax tzonhaj yetʼ kopamilia (Colosenses 3:12-14). Ay junxo kachnabʼil schʼoxani to ha hebʼ nupnajnakxo malaj bʼakʼinh olspuklan sbʼa hebʼ. Awtej Génesis 2:24.

Ha juntzanh kachnabʼil tik syakʼ wachʼil tʼayonh yetʼ tʼa juntzanhxo tas. Kʼinalok, ha sayan smunlajum hebʼ anima sgana hebʼ to munlajum syutej sbʼa hebʼ max elkʼanlaj pax hebʼ. (Proverbios 10:4, 26; Hebreos 13:18). Anaʼ paxi, ha slolonel koMam Dios tzʼalan tʼayonh to junkʼolal tzonhajekʼ yetʼ jabʼjabʼ tas tzʼilchaj kuʼuj tʼa junjun kʼu, schoʼxan pax chʼanh tʼayonh to ha kamigoʼan koMam Dios más te niwan yelkʼoch tʼa juntzanhxo tas ay tʼayonh. Awtej Mateo 6:24, 25, 33 yetʼ 1 Timoteo 6:8-10.

Ha juntzanh skachnabʼil chʼanh Biblia tik skolwajxi tʼayonh yik wachʼ tzonhajekʼi. Ichok jun cheknabʼil tʼa yibʼanh ukʼel anh, ha skolwaj tʼayonh yik max kochaʼ juntzanh ilyaʼ yetʼ juntzanh accidente tzʼikʼan kochami (Proverbios 14:30; 22:24, 25; 23:20). Ha Jehová stakʼ winh kukʼan anh anh, anhej tato jabʼnhej anh skukʼej (Salmo 104:15; 1 Corintios 6:10). Ha juntzanh skachnabʼil chʼanh Biblia tik skolwaj tʼayonh, yujto ha tzʼikʼan konaʼaʼ tas yaj kobʼeybʼal yetʼ kopensar (Salmo 119:97-100). Palta ha onhxo skakʼwal servil koMam Dios, manh tonhejok skokʼanabʼajej juntzanh chiʼ yik tzʼilchaj swachʼil kuʼuj; okxo tik skokʼulejnhej yik skikʼchaʼanh sbʼi koMam Jehová. Awtej Mateo 5:14-16.