Snibʼejwal koMam Dios to masanil hebʼ anima slesalwi hebʼ tʼay (Salmo 65:2). Palta manh yujok chiʼ smaklej yabʼ masanil juntzanh lesal chiʼ. Ha chʼanh Biblia tzʼalani to ha junok winh winak malaj yelkʼoch ix yetbʼeyum tʼay, max chachajlaj yabʼ slesal winh yuj koMam Dios (1 Pedro 3:7). Ha koMam Dios maj schanaklaj yabʼ slesal hebʼ aj Israel winh, yujto te xikan skʼulejnak juntzanh chukal hebʼ. Palta, smaklej yabʼ slesal hebʼ tzʼoch smul tʼa winh tato snaʼ sbʼa hebʼ tʼa sikʼlabʼil. Awtej Isaías 1:15 yetʼ 55:7.

Anhej tʼa koMam Dios tzonhlesalwi yujto anhej tʼa winh syal kakʼanem kobʼa (Mateo 4:10; 6:9). Yujto ay kopaltaʼil, yowalil ha tʼa sbʼi Jesús tzonhlesalwi, yujto yakʼnakcham sbʼa yuj komul (Juan 14:6). Ha Jehová malaj sgana winh to ha junok lesal toxo ixkʼabʼeli anhej xikan skal tʼa winh ma tzʼibʼabʼil juntzanh skal chiʼ tʼay, yujto snibʼej winh to tʼa smasanil kokʼoʼol tzonhlesalwi. Awtej Mateo 6:7 yetʼ Filipenses 4:6, 7.

Ha winh koBʼoʼumal smaklej pax yabʼ winh juntzanh lesal manh chaʼanhoklaj skalaʼ (1 Samuel 1:12, 13). Ha winh tzʼalani to tʼa masanil tiempo syal kolesalwi tʼay, kʼinalok ayik skʼinhibʼi, tzʼem kʼu, ayik tzonhwaʼi mato ha sjawi juntzanh chukal tʼa kibʼanh. Awtej Salmo 55:22 yetʼ Mateo 15:36.

Ha tiknaʼik manh sekojtakoklaj konitzanoch kobʼa tʼa koMam Dios yujto ayonhekʼ tʼa skal hebʼ anima max akʼanochlaj Dios tʼa skʼoʼol. Sbʼuchbʼaj pax hebʼ tʼa jun bʼaj yakʼnakkan stiʼ koMam Dios to olyikʼkot junkʼolal winh tʼa sat lum luʼum tik (2 Timoteo 3:1, 4; 2 Pedro 3:3, 13). To yuj chiʼ yowalil skomolbʼej kobʼa yetʼ hebʼ kukʼtak kanabʼ yik icha chiʼ skokʼibʼtzitej kobʼa junjun onh. Awtej Hebreos 10:24, 25.

 Ha skomolbʼan kobʼa yetʼ hebʼ anima sxajanan koMam Dios ichalajto skowachʼ snitzejoch kobʼa tʼa stzʼey winh. Ha tʼa smolchajelal hebʼ testigo yik Jehová syal kojtakanel hebʼ anima tzʼakʼanwaloch koMam Dios tʼa skʼoʼol. Awtej Romanos 1:11, 12.

Olyal huʼuj tato tzanaʼubʼtanhej tʼa yibʼanh juntzanh tas ixʼilel chiʼ tʼa yibʼanh winh tʼa yol chʼanh Bilbia. Naʼubʼtanhej tastak sbʼonakxo winh, juntzanh skachnabʼil yetʼ tʼa tas bʼaj yakʼnakkan stiʼ winh to olyakʼ tʼayonh. Ha bʼaj tzanaʼubʼtanhej tik yetʼ bʼaj tzachlesalwi olkolwaj tʼayach yik tzanaʼeli to te niwan yelkʼoch sxajanil koMam Dios yetʼ sjelanil winh. Awtej Josué 1:8 yetʼ Salmo 1:1-3.

Anhej tato tzakʼwaloch Dios yipok hakʼoʼol, olyal hanitzanoch habʼa tʼa stzʼey winh. Icha junok te teʼ tzʼakʼchajoch yalil yik skʼibʼ teʼ, icha pax chiʼ tzʼaj ha skakʼanoch koMam Dios tʼa kokʼoʼol, yuj chiʼ te yowalil to skonaʼubʼtanhej tas yuʼuj syal kakʼanoch koMam Dios tʼa kokʼoʼol. Awtej Mateo 4:4 yetʼ Hebreos 11:1, 6.

Aywal yilkʼolal Jehová tʼa yibʼanh hebʼ xajanani. Skolwaj pax winh tʼa hebʼ yik max yaktejlaj hebʼ yakʼanoch tʼa skʼoʼol to olscha skʼinal hebʼ tʼa junelnhej (Salmo 91:1, 2, 7-10). Tzʼalchaj tʼa hebʼ yuj winh tas juntzanh tzʼikʼan spenaʼayax hebʼ yetʼ juntzanh sbʼeybʼal hebʼ yik max och hebʼ tʼa tzalajkʼolal. Schʼox pax winh tʼa hebʼ tas jun wachʼ sbʼeybʼalan hebʼ chiʼ. Awtej Salmo 73:27, 28 yetʼ Santiago 4:4, 8.