SJOLOMAL 5
Tas snibʼej koMam Dios sbʼoʼan tʼa sat lum luʼum tik?
1. Tas yuʼuj sbʼonak lum luʼum tik Dios?
Sbʼonak lum luʼum tik Jehová yik masanil haʼonh anima onh tik tzonhajekʼ tʼa luʼum. Ha sbʼochajnak winhaj Adán yetʼ ix Eva yuj winh, manh yikok tzʼajekʼ hebʼ tʼa satchaʼanh, yujto bʼonakxo hebʼ ángel winh yik tzʼajekʼ hebʼ taʼ (Job 38:4, 7). Ha winh bʼabʼel winak bʼochajnak yuj Jehová chiʼ ixʼakʼchajoch winh tʼa jun lum luʼum te wachʼtzin yilji skuch Edén (Génesis 2:15-17). Ixʼakʼchaj pax tʼa yinhtilal winh to ijan tzʼajekʼ hebʼ tʼa tzalajkʼolal tʼa junelnhej tʼa sat lum luʼum tik. Awtej Salmo 37:29 yetʼ 115:16.
Ha jun lum luʼum te wachʼtzin yilji chiʼ, skuch Edén, jun oyannhej luʼum. Yik skʼibʼ sbʼisul hebʼ anima tʼa sat luʼum, yowalil tzʼalji yuninal winhaj Adán yetʼ ix Eva chiʼ, ixtaʼ bʼiʼan jabʼjabʼil wachʼ sbʼoʼel sat luʼum yuj hebʼ (Génesis 1:28). Ha tʼa sat lum luʼum tik olʼajnhejekʼ hebʼ anima, malaj bʼakʼinh olsatel luʼum. Awtej Salmo 104:5.
2. Tas yuʼuj manhxo wachʼtzinok yaj lum luʼum tiknaʼik?
Yujto maj skʼanabʼajejlaj koMam Dios winhaj Adán yetʼ ix Eva ixʼikʼjipaxelta hebʼ tʼa Edén chiʼ. Yuj chiʼ, ixsatel jun oyanh lum luʼum te wachʼtzin chiʼ, mantalaj junok mach syal sbʼoʼanxi junelxo. Yuj chiʼ, ha chʼanh Biblia tzʼalani: «Skan jun yolyibʼanhkʼinal tik tʼa yol skʼabʼ hebʼ chuk» (Job 9:24). Awtej Génesis 3:23, 24.
Yuj chiʼ jun, tom ixkʼexmaj spensar Jehová sbʼoʼan tas snibʼej yakʼan tʼa hebʼ anima? Maʼay, yujto te ay spoder winh masanil tas syalaʼ tzʼelnhejkʼochiʼ (Isaías 45:18). Ha tʼa jun tiempoʼal toto oljawok ha koMam Dios olʼakʼan skʼinal hebʼ anima icha aj snaʼannak winh tʼa yichbʼanil yolyibʼanhkʼinal tik. Awtej Salmo 37:11, 34.
3. Tas olʼaj sbʼochajxi sat lum luʼum tik?
Ha Jesús, yujto Yajal yaj tʼa Yajalil koMam Dios, manh jantak swachʼil olyutokxikan sat lum luʼum tik. Yetʼ hebʼ yangel, olyakʼlajwok jantak hebʼ yajkʼoʼol koMam Dios winh tʼa jun owal skuch Armagedón. Ixtotaʼ bʼiʼan, mil abʼil olmakchajkan winh Satanás. Ha hebʼ tzʼakʼan servil koMam Dios olkolchajkan hebʼ tʼa jun owal chiʼ, yujto ha Jesús olkolan pax hebʼ. Ixtaʼ bʼiʼan olscha skʼinal hebʼ tʼa junelnhej tʼa sat jun lum luʼum te wachʼtzin olʼajxikan chiʼ. Awtej Apocalipsis 20:1-3 yetʼ 21:3, 4.
4. Bʼakʼinhtaxlaj ol-lajwokel juntzanh yaʼelal tik?
Bʼakʼinhtaxlaj olyakʼlajwok masanil juntzanh chukal tik koMam Dios? Ha Jesús alannakkan jun yechel yik scheklaji bʼakʼinh olʼujok. Ha juntzanh wan yuji tiknaʼik te ay smay tʼa hebʼ anima. Ha jun chiʼ schʼoxaneli «to toxo pax ol-lajwokekʼ jun tiempoʼal tik». Awtej Mateo 24:3, 7-14, 21, 22.
Ha tʼa satchaʼanh ayekʼ Jesús, mil abʼilwal olyakʼ yajalil tʼa yibʼanh lum luʼum tik. Ixtaʼ bʼiʼan jabʼjabʼil olʼaj satanel juntzanh tzʼikʼanchaʼanh koyaʼelal tiknaʼik (Isaías 9:6, 7; 11:9). Yajal yaji, olʼoch pax sat sacerdoteʼal, olsatanel smul machtak hebʼ xajanan koMam Dios. Icha chiʼ jun, ha olʼakʼlabʼaj yuj Dios yik olyakʼlajwok juntzanh ilyaʼ, icham animaʼil yetʼ pax chamel. Awtej Isaías 25:8 yetʼ 33:24.
5. Machtak hebʼ olʼajekʼ tʼa jun lum luʼum tik?
Ha tʼa komolchajelal olʼilchaj hebʼ xajanan Dios huʼuj, hebʼ sgana skʼanabʼajan winh
Ha hebʼ skʼanabʼajan koMam Dios olʼajekʼ taʼ (1 Juan 2:17). Ha Jesús cheknakbʼat hebʼ skʼaybʼum yik bʼat say hebʼ anima wachʼ spensar yik skʼaybʼej hebʼ tas tzʼaj yoch hebʼ tʼa yol skʼabʼ Dios. Ha tiknaʼik, manh jantakok hebʼ anima wan stojolbʼitaj sbʼeybʼal yuj Jehová, yik tzʼajekʼ hebʼ tʼa jun lum luʼum te wachʼtzin olʼajxikan chiʼ (Sofonías 2:3). Ha hebʼ skʼoch tʼa bʼaj smolbʼej sbʼa hebʼ testigo yik Jehová, skʼaybʼej hebʼ chajtil wachʼ syutej sbʼa hebʼ tʼa hebʼ yetbʼeyum yetʼ tʼa yalyuninal, yujto hataʼ olyil hebʼ to jun molannhej tzʼaj hebʼ pamilia yakʼan servil koMam Dios. Scha pax juntzanh swachʼilal hebʼ taʼ juntzanh wachʼ abʼix ayem tʼa chʼanh Biblia. Awtej Miqueas 4:1-4.
