Sbʼonak jun chonhabʼ koMam Dios; ha hebʼ yinhtilal winhaj Abrahán ixmoloch tʼay ixyakʼ pax juntzanh scheknabʼil tʼa hebʼ. Ha hebʼ aj chonhabʼ Israel akʼchaj yopisio hebʼ yilani tato wan skanabʼajax koMam Dios icha wal snibʼej winh. Haton wal tʼa hebʼ chiʼ bʼaj yakʼnak sLolonel Dios (Salmo 147:19, 20). Yuj chiʼ, hebʼ anima tʼa junjun chonhabʼ syal schaʼan swachʼil hebʼ yuj hebʼ Israel chiʼ. Awtej Génesis 22:18.

Ha koMam Dios sikʼlannakel hebʼ aj Israel yik icha chiʼ tzʼoch hebʼ testigoʼok winh. Ha yuj tas skʼulejnak jun chonhabʼ chiʼ, ha schʼoxaneli to tato skokʼanabʼajej scheknabʼil koMam Dios syakʼ swachʼil tʼayonh (Deuteronomio 4:6). Ha yuj jun chonhabʼ Israel chiʼ syal yojtakanel koMam Dios juntzanhxo anima. Awtej Isaías 43:10, 12.

Hayik ixchakjiʼel jun chonhabʼ Israel yuj Dios, haxo hebʼ skʼaybʼum winh Kajal Jesús ixyakʼoch Jehová skʼexulok (Mateo 21:43; 23:37, 38). Yuj chiʼ ha tʼa kotiempoʼal tik haton hebʼ skʼaybʼum Jesús, ha hebʼ skʼanabʼajan koMam Dios tʼa walyel, ha hebʼ chiʼ tzʼoch testigoʼalok winh, manhxoʼoklaj hebʼ aj Israel. Awtej Hechos 15:14, 17.

Ha Jesús alannak tʼa hebʼ skʼaybʼum tas tzʼaj yalanel wachʼ abʼix hebʼ yetʼ chajtil tzʼaj skʼaybʼan hebʼ anima hebʼ tʼa smasanil yolyibʼanhkʼinal tik (Mateo 10:7, 11; 24:14; 28:19, 20, Traducción del Nuevo Mundo). Ha tʼa jun lajwubʼ kʼuʼal tik, ha jun munlajel tik wan sbʼochaj tʼa sikʼlabʼil. Haxo Jehová manh jantakok anima wan smolbʼankot tʼa junjun chonhabʼ yik tzʼoch hebʼ tʼa jun kuynabʼil te yel (Apocalipsis 7:9, 10). Yujto ha tʼa stzolal smunlaj hebʼ tzʼakʼan servil koMam Dios, syal skolwaj hebʼ tʼay junjun syakʼlanxi stekʼanil hebʼ. Masanil hebʼ jun  lajannhej tas skʼaybʼej hebʼ tʼa yibʼanh chʼanh Biblia tʼa smolchajelal. Awtej Hebreos 10:24, 25.

Ha jun makanh hebʼ anima tik scheklajnakelta hebʼ tʼa juntzanh abʼil yik 1870. Jun makanhtzin hebʼ kʼaybʼannak tas syal chʼanh Biblia ixyaman och hebʼ sayan yil juntzanh yelal ayem tʼa yol chʼanh. Yojtakxo hebʼ to ha Jesús chʼoxannak yil jun makanh anima chiʼ yik syalel wachʼ abʼix hebʼ, yuj chiʼ ixyamoch hebʼ yalanel yabʼixal sYajalil koMam Dios tʼa masanil bʼaj. Haxo tʼa jun abʼil 1931 testigo yik Jehová ixʼakʼji och sbʼiʼok hebʼ. Awtej Hechos 1:8; 2:1, 4, 11, yetʼ 5:42.

Ha tʼa pektiʼ ay jaywanh hebʼ winh winak satil yaj tʼa skal hebʼ skʼaybʼum winh Kajal Jesús. Junjun makanh hebʼ skʼanabʼajej hebʼ winh satil yaj chiʼ hebʼ. Ha hebʼ tik scha hebʼ to ha Jesús jolomal yaj tʼa hebʼ tzʼakʼan servil koMam Dios (Hechos 16:4, 5). Icha pax chiʼ tiknaʼik, ay pax jun makanh hebʼ winh winak ay sjelanil satil yaj tʼa skal hebʼ testigo yik Jehová. Smunlaj hebʼ yilan juntzanh syopisina hebʼ Testigo. Hataʼ sbʼochaj juntzanh chʼanh huʼum tʼa másto seiscientos tiʼal. Ha chʼanh Biblia syakʼlabʼej hebʼ, yik syakʼ stekʼanil yetʼ kachnabʼil tʼa juntzanh másto cien mil makanh hebʼ Testigo tʼa masanil yolyibʼanhkʼinal tik. Ha tʼa junjun makanh ay hebʼ winh winak ayxo sjelanil skolwaj hebʼ yetʼ smasanil skʼoʼol tʼa hebʼ yikxo Dios chiʼ. Awtej 1 Pedro 5:2, 3.

Ha hebʼ Testigo ha tʼa stzolal syalel hebʼ juntzanh wachʼ abʼix yik chʼanh Biblia yik skʼaybʼej pax hebʼ anima hebʼ. Icha hebʼ winh skʼaybʼum Jesús, syalel wachʼ abʼix hebʼ tʼa junjun te pat (Hechos 20:20). Skʼaybʼej pax hebʼ snibʼan yilaneli. Palta manh oknhejlaj jun chiʼ, yujto icha junok pamilia yaj hebʼ icha yukʼtak yanabʼ sxajanej sbʼa junjun hebʼ, stzalaj pax hebʼ yujto skolwaj koMam Dios yetʼ hebʼ (2 Tesalonicenses 1:3). Yujto ha hebʼ tzʼakʼan servil koMam Dios tik syakʼwal yip hebʼ skʼanabʼajani, skolwaj pax hebʼ tʼa hebʼ yet-animaʼil, yuj chiʼ te tzalajkʼolal yajekʼ hebʼ tʼa sat lum luʼum tik. Awtej Salmo 33:12 yetʼ Hechos 20:35.