Ha tʼa junel, ayik aytoʼekʼ Jesús tʼa sat lum luʼum tik, ixcham winhaj Lázaro winh yamigo winh. Aj Betania winh, ha jun chonhabʼ tik lakʼan ay tʼa Jerusalén. Ha ixkʼoch Jesús taʼ, chanhilxo kʼuʼal scham winhaj Lázaro chiʼ. Yetʼnak ix Marta yetʼ ix María winh, hebʼ ix yanabʼ winh chamnak chiʼ. Ixbʼat winh tʼa bʼaj mukan chiʼ; totowal chiʼ ixkʼoch nhilnaj hebʼ anima yilaʼ. Tom tzanaʼ jun stzalalkʼolal ix Marta yetʼ ix María ha ixpitzwixi winh snulej hebʼ ix chiʼ yuj winh Jesús? Awtej Juan 11:21-24, 38-44.

Tʼa skal juntzanh wachʼ abʼix ayem tʼa chʼanh Biblia aykanem pax taʼ to olpitzwokxi hebʼ chamnak. Ha ix Marta yojtakxo ix to ha koMam Jehová syalaʼ to ha hebʼ chamnakxo olpitzwokxi hebʼ yik tzʼajxekʼ hebʼ tʼa sat lum luʼum tik. Awtej Job 14:14, 15.

Haʼonh anima onh tik ha tʼa lum pokok ixʼonhbʼochaji (Génesis 2:7; 3:19). Manh espirituʼokonhlaj, komon anima onh, malaj junok tas pitzan yaj tzʼelkan tʼayonh ha tzonhchami. Ha tzonhchami, satkanel masanil tas konaʼaʼ. Ha hebʼ chamnakxo manhxalaj tas yojtak hebʼ. Yuj chiʼ ha winhaj Lázaro, ha spitzwinakxi winh, malaj tas ixʼul yal winh tʼa yibʼanh chamel chiʼ. Awtej Eclesiastés 9:5, 6, 10.

Ay hebʼ snaʼani to ay jun yaʼelal tʼa junelnhej bʼaj tzʼixtaj hebʼ anima yuj koMam Dios ha scham hebʼ, palta manh yeloklaj jun chiʼ. Icha wan kilan tik, ha hebʼ chamnak manhxalaj jawok tas yojtak hebʼ. Yuj chiʼ ha jun kʼaybʼubʼal yik jun yaʼelal tʼa junelnhej chiʼ manh yeloklaj, yiknhej smikej sbʼi Jehová jun tik. Ha winh  max ekʼlaj jabʼok tʼa spensar winh yakʼan jun yaʼelal chiʼ, yujto schakel winh sikʼlabʼil. Awtej Jeremías 7:31.

Ha hebʼ chamnak maxtzak yal-laj slolon hebʼ maxtzak yabʼlaj pax hebʼ (Salmo 115:17). Palta, ay juntzanh hebʼ ángel te chuk sbʼeybʼal syal slolon hebʼ yetʼ hebʼ anima; syesejoch sbʼa hebʼ animaʼil lajan syutej sjaj hebʼ icha hebʼ chamnak chiʼ (2 Pedro 2:4). To yuj chiʼ, ha koMam Jehová yajbʼentak yilanoch winh tato skakʼlej kawajbʼat tʼa hebʼ chamnak. Awtej Deuteronomio 18:10, 11.

Manh jantakok hebʼ anima chamnakxo olpitzwokxi yik tzʼajxekʼ hebʼ tʼa sat lum luʼum tik. Olkʼex pax waʼanh hebʼ anima manh wachʼoklaj yutejnak sbʼa yujto maj yojtakejel-laj Jehová hebʼ. Awtej Hechos 24:15.

Ha hebʼ olpitzwokxi chiʼ olyal skʼaybʼan jun yelal hebʼ tʼa yibʼanh koMam Dios. Olyal pax yakʼanoch Jesús hebʼ tʼa skʼoʼol yetʼ olskʼanabʼajej pax hebʼ (Apocalipsis 20:11-13). Tato icha chiʼ skʼulej hebʼ, olscha skʼinal hebʼ tʼa junelnhej tʼa sat lum luʼum tik. Awtej Juan 5:28, 29.

Ha jun bʼaj olpitzwokxi hebʼ chamnak chiʼ schʼoxel sxajanil koMam Jehová yetʼ swachʼkʼolal winh. Yujto ixyakʼkot Yuninal winh yakʼcham sbʼa kuʼuj, syal kakʼanoch jun bʼaj olpitzwokxi hebʼ chamnak chiʼ yipok kokʼoʼol. Xal hach jun, mach tzanibʼej ilan tʼa jun tiempoʼal ha olpitzwokxi hebʼ chamnak chiʼ? Awtej Juan 3:16 yetʼ Romanos 6:23.