SJOLOMAL 7
Mach jun sYajalil koMam Dios chiʼ?
1. Tas jun sYajalil koMam Dios chiʼ?
Tas yuʼuj syal kalani to anhej Jesús te wachʼ yakʼan yajalil? (MARCOS 1:40-42).
Haton jun Yajalil aj satchaʼanh toxo olʼoch skʼexulok hebʼ winh yajal swinakil ay tʼa yolyibʼanhkʼinal tik, anaʼ paxi olyakʼ elkʼoch tas snibʼej koMam Dios tʼa sat lum luʼum tik yetʼ tʼa satchaʼanh. Haton jun Yajalil yik koMam Dios chiʼ te yowalil tʼa hebʼ anima, yujto ha yuʼuj, jun pensarilxonhej olʼajkan masanil hebʼ anima tʼa sat lum luʼum tik. Yeltoni to te wachʼxo pax juntzanh abʼix tik? Awtej Daniel 2:44; Mateo 6:9, 10, yetʼ 24:14.
Ha tʼa junjun hebʼ winh yajal yowalil ay junok mach tzʼakʼan sjolomal, icha pax chiʼ Jehová ixyakʼoch Yuninal winh, haton Jesucristo, sjolomalok jun sYajalil aj satchaʼanh chiʼ. Awtej Apocalipsis 11:15.
2. Tas yuʼuj anhej Jesús te wachʼ yakʼan yajalil?
Te wachʼ yakʼan yajalil Yuninal Dios tik yujto te niwan swachʼkʼolal, anhej tʼa stojolal skʼulej junok tas (Mateo 11:28-30). Ay pax spoder skolwaj tʼa hebʼ anima, ha olyakʼlabʼej paxi hayik olyakʼ yajalil tʼa satchaʼan tʼa yibʼanh lum luʼum tik. Yujto hayik pitzwixi chiʼ, ixbʼatkan tʼa satchaʼanh ichato chiʼ bʼiʼan ixʼem kʼojan tʼa swachʼ kʼabʼ Dios, hataʼ ixstanhwej masanto ixsyamoch yakʼan yajalil (Hebreos 10:12, 13). Ixtaʼ bʼiʼan, ixʼakʼchaj yopisio chiʼ yuj Dios. Awtej Daniel 7:13, 14.
3. Tom ay hebʼ anima olʼakʼan yajalil yetʼ Jesús chiʼ?
Ha chʼanh Biblia tzʼalani to ay jun makanh hebʼ anima tzʼakʼan servil Dios, olʼoch hebʼ yajalil yetʼ Jesús chiʼ. Ha tʼa Daniel 7:27 syalaʼ to yikxo Dios hebʼ. Ha hebʼ bʼabʼlaj sikʼchajnakel yuj Dios haton hebʼ winh yapostol Jesús. Ha tʼa kotiempoʼal tik ha Jehová hanhejtonaʼ wan sikʼlanel hebʼ winh winak winh yetʼ hebʼ ix ix tzʼakʼanoch Dios tʼa skʼoʼol. Icha skʼulejnak Jesús chiʼ, hayik scham juntzanh anima chiʼ sbʼatkan hebʼ tʼa satchaʼanh, schaʼan pax jun sniwanil hebʼ espíritu yaji. Awtej Juan 14:1-3 yetʼ 1 Corintios 15:42-44.
Jaywanh hebʼ olbʼatkan tʼa satchaʼanh chiʼ? Ha Jesús ixʼalani to jaywannhej hebʼ (Lucas 12:32). 144.000 sbʼisulnhej hebʼ olyakʼ yajalil yetʼ Jesús tʼa yibʼanh lum luʼum tik. Awtej Apocalipsis 14:1.
4. Tas ixʼuji ha ixʼakʼchaj yopisio Jesús chiʼ?
Ha tʼa 1914 ixchakan yopisio Jesús. Haxo jun ixbʼabʼlaj skʼulej winh to ixyikʼel winh Satanas winh yetʼ hebʼ sdemonio tʼa satchaʼanh ixyumankanemta hebʼ winh tʼa sat lum luʼum tik. * Ixte kotkan yowal winh Diablo chiʼ, yuj chiʼ ixyamoch winh yakʼan chukal tʼa masanil yolyibʼanhkʼinal tik (Apocalipsis 12:7-10, 12). Hataxtontaʼ, ixsomchajkanel hebʼ anima. Ha owal, kixkabʼ, juntzanh ilyaʼ yetʼ wejel ay tiknaʼik schʼoxaneli to ha sYajalil koMam Dios chiʼ toxo olsyamoch waʼan juntzanh tzuji tʼa sat lum luʼum tik. Awtej Lucas 21:7, 10, 11, 31.
5. Tas swachʼil syikʼkot sYajalil koMam Dios chiʼ?
Wan yaljiʼel wachʼ abʼix tʼa masanil yolyibʼanhkʼinal tik, «manhxo jantakok anima» ay tʼa chʼok chʼok schonhabʼil wan smoljikot hebʼ yuj sYajalil koMam Dios. Tzijtum anima wachʼ spensar wan skʼanabʼajan winh Jesús. Masanil hebʼ tik olkolchajkani hayik olyakʼlajwok masanil tas chuk ay tʼa yolyibʼanhkʼinal tik jun sYajalil koMam Dios chiʼ. Yuj chiʼ tato skonibʼej kochaʼan juntzanh swachʼil olyikʼkot jun Yajalil chiʼ, yowalil to skokʼanabʼajej Jesús chiʼ. Awtej Apocalipsis 7:9, 14, 16, 17.
Hayik ayonhxoʼekʼ tʼa jun mil abʼil chiʼ, ha jun Yajalil chiʼ olyakʼ elkʼoch jun snibʼejnak koMam Dios tʼa yibʼanh hebʼ anima tʼa yichbʼanil chiʼ. Te wachʼtzin olʼajxikan lum luʼum tik. Ixtotaʼ bʼiʼan olyakʼxikanbʼat jun sYajalil Jesús chiʼ tʼa yol skʼabʼ winh sMam (1 Corintios 15:24-26). Tom hagana alanel yabʼixal jun Yajalil tik tʼa juntzanhxo hebʼ anima? Awtej Salmo 37:10, 11, 29.
^ párr. 6 Yik tzawachʼ ilejel juntzanh abʼix ayem tʼa chʼanh Biblia slolon tʼa yibʼanh jun abʼil 1914, say il sbʼisulal 217 hato tʼa 218 yik chʼanh huʼum ¿Qué nos enseña la Biblia?
