Hatax yalannak jun bʼabʼel es winh Satanás chiʼ hatax taʼ kʼenakan waʼan juntzanh chukal tʼa sat lum luʼum tik. Ha jun ángel tik malaj jabʼok spaltaʼil tʼa pekatax chiʼ, palta maj stekʼbʼejlaj sbʼa yajekʼ tʼa yelal chiʼ (Juan 8:44). Snibʼejnak winh to syakʼem sbʼa hebʼ anima tʼay, palta anhej tʼa winh koBʼoʼumal syal kakʼanem kobʼa. Yesejnak winh tʼa ix Eva, yik smontej ix winh yik ha winh skʼanabʼajax yuj ix manhoklaj koMam Dios. Ixʼoch lokan pax winhaj Adán yetʼ ix yetbʼeyum chiʼ yik max skʼanabʼajej hebʼ. Ha yuj tas skʼulejnak hebʼ chiʼ kotnakkan yaʼelal yetʼ chamel tʼa kibʼanh. Awtej Génesis 3:1-6, 19.

Ha ixyalan winh Satanás to max skʼanabʼajejlaj koMam Dios ix Eva chiʼ, hatax taʼ ixyamchajoch jun ajkʼolal tʼa koMam Dios yuj winh. Max chalaj skʼoʼol winh to anhej Jehová ay yalan yik yakʼan yajalil. Yujto manh jantakok hebʼ anima ixʼoch yetʼ winh Diablo yik schakel sYajalil koMam Dios hebʼ. Ha tiknaʼik ha winh wan yakʼan yajalil tʼa yolyibʼanhkʼinal tik. Awtej Juan 14:30 yetʼ 1 Juan 5:19.

Masanil tas sbʼo koMam Dios malaj jabʼok spaltaʼil. Ha hebʼ bʼabʼel anima bʼochajnak yuj Dios yetʼ hebʼ ángel, yalnak skʼanabʼajan masanil tas yalnak Dios chiʼ tʼa hebʼ (Deuteronomio 32:4, 5). Ha winh tzʼakʼan kosikʼlej tas olkokʼulej tom ha tas wachʼ mato ha tas chuk. Tato skoxajanej koMam Dios olkokʼanabʼajej tas syal winh. Awtej Santiago 1:13-15 yetʼ 1 Juan 5:3.

Kennhej tiempo wan yakʼan techaj juntzanh hebʼ ajkʼoʼol chiʼ Jehová. Tas yuʼuj? Yik schʼoxel winh to max yal-laj yakʼan yajalil hebʼ tʼa yibʼanh hebʼ anima (Eclesiastés 7:29; 8:9). Tas schʼoxel juntzanh seis mil  abʼil ixʼekʼbʼat tik? To ha hebʼ winh yajal swinakil max yal-laj satanel juntzanh tas manh tojolok hebʼ winh, icha elkʼal, milwal, owal yetʼ juntzanh ilyaʼ. Awtej Jeremías 10:23 yetʼ Romanos 9:17.

Palta tato skakʼoch kobʼa tʼa yol skʼabʼ Dios, olkocha syaxil skʼabʼ winh (Isaías 48:17, 18). Toxowal olsatel hebʼ yajal swinakil yuj Jehová. Anhej hebʼ syakʼoch sbʼa tʼa yol skʼabʼ koMam Dios olʼajekʼ tʼa sat lum luʼum tik (Isaías 11:9). Awtej Daniel 2:44.

Ha winh Satanás yalnak winh to ha hebʼ anima syakʼ servil Dios yujnhej juntzanh tastak tzʼakʼchaj tʼa hebʼ. Yujto te niwan skʼoʼol koMam Dios ketʼok, masanil onh syal kochʼoxanel yetʼ kobʼeybʼal to te esalwum winh Diablo to yuj chiʼ anhej tʼa sYajalil koMam Dios skakʼoch kobʼa. Awtej Job 1:8-12 yetʼ Proverbios 27:11.

Bʼabʼel, to skosay kilaʼ chajtil skutej kakʼan servil winh. Ixtotaʼ bʼiʼan skakʼoch tʼa yopisio tas skokʼaybʼej tʼa jun kuynabʼil tʼa walyel chiʼ, yujto ha tʼa chʼanh Biblia tzʼelta juntzanh skʼaybʼubʼal chiʼ (Juan 4:23). Anaʼ paxi, tato skobʼeybʼalej sbʼeybʼal Jesús max kekochlaj kobʼa tʼa política yetʼ tʼa juntzanh owal syikʼchaʼanh hebʼ yajal swinakil. Ixtaʼ jun wan kochakanel jun yajalil winh Satanás. Awtej Juan 17:14.

Ha winh Satanás tzʼikʼanchaʼanh juntzanh tas malaj swachʼil icha ajmulal yik ha jun chiʼ skʼulej hebʼ anima. Ha skochakanel juntzanh tik, ay bʼajtil tzonhsbʼuchej hebʼ kamigo yetʼ hebʼ kokʼabʼ kok mato ay bʼajtil malaj swachʼil tzonhajekʼ yuj hebʼ (1 Pedro 4:3, 4). Tato icha chiʼ tzuji, yowalil ha hebʼ sxajanan koMam Dios skosayekʼiʼ skokʼanabʼajan pax tas syal sLolonel winh. Icha chiʼ, olkochʼoxeli to ha winh Satanás ixyesejkʼe winh ha ixyalani to malaj mach olkʼanabʼajan koMam Dios tato te ay owal skot tʼa kibʼanh. Awtej 1 Corintios 6:9, 10 yetʼ 15:33.

Ha sxajanil Dios syakʼ tʼayonh ha schʼoxaneli to olyakʼlajwok masanil yaʼelal yetʼ chukal. Machtak hebʼ tzʼoch yetʼ Dios chiʼ syakʼanpaxoch hebʼ tʼa skʼoʼol olʼajekʼ hebʼ tʼa junelnhej tʼa sat lum luʼum tik. Awtej Juan 3:16.