Ha koMam Dios snibʼejwal winh to ha hebʼ anima tzalajkʼolal tzʼajekʼ hebʼ. Yuj sxajanabʼil winh tʼa hebʼ anima, sbʼonak lum luʼum tik yetʼ masanil tas ay tʼay. Toxo olyakʼlajwok yaʼelal. Te wachʼxo pax olʼaj skʼoʼol masanil hebʼ anima yalnhej bʼajtil ay hebʼ, tʼa jun tiempoʼal toto oljawok chiʼ. Awtej Jeremías 29:11.

Mantalaj junok hebʼ winh yajal swinakil syal yakʼanlajwok juntzanh chukal, icha juntzanh ilyaʼ yetʼ chamel. Palta ay juntzanh wachʼ abʼix: toxowal olsatel hebʼ yajal swinakil yuj winh koMam Dios, ixtaʼ bʼiʼan olyakʼoch tʼa yopisio jun sYajalil aj satchaʼanh winh. Haxo schonhabʼ winh te tzalajkʼolal olʼajok, manhxo olpenaʼayaxlaj hebʼ. Awtej Isaías 25:8; 33:24, yetʼ Daniel 2:44.

Yik ol-lajwokel juntzanh yaʼelal tik, yowalil olsatjokel masanil hebʼ anima chuk sbʼeybʼal yuj koMam Dios (Sofonías 2:3). Palta, bʼakʼinh olsbʼo jun chiʼ jun? Ha tʼa chʼanh Biblia tzʼibʼabʼilkan juntzanh tas tzʼikʼanchaʼanh juntzanh yaʼelal tʼa hebʼ anima tiknaʼik. Masanil juntzanh tik schʼoxani to ha koMam Dios toxo olyakʼlajwok juntzanh tik winh. Awtej 2 Timoteo 3:1-5.

Yowalil skokʼaybʼej tas syal chʼanh Biblia tʼa yibʼanh koMam Dios, yujto icha junok chʼanh huʼum syakʼbʼat junok winh mamabʼil tʼa hebʼ yuninal icha chiʼ yaj chʼanh tʼayonh. Ha chʼanh tzʼalan tʼayonh chajtil tzalajkʼolal tzonhaj tiknaʼik yetʼ pax tas wachʼ kokʼulani yik syal kochaʼan kokʼinal tʼa junelnhej tʼa sat lum luʼum tik. Wachʼxom manh masaniloklaj mach oltzalajok yujto wan hakʼaybʼan tas syal chʼanh Biblia. Palta manh yujoklaj jun chiʼ sjawi hachabʼkʼolal, yujto ha junhtzanh yaxil olhacha chiʼ te niwanxo pax yelkʼochi. Awtej Proverbios 29:25 yetʼ Apocalipsis 14:6, 7.