SJOLOMAL 13
Tas wachʼ abʼix syal chʼanh Biblia tʼa yibʼanh juntzanh kuynabʼil?
1. Tom wachʼ masanil juntzanh kuynabʼil chiʼ?
Tʼa masanil juntzanh kuynabʼil, ay hebʼ anima wachʼ spensar. Te wachʼ tzʼaj kabʼaneli to te niwan yelkʼoch hebʼ tʼa sat koMam Dios ay pax och yilkʼolal winh yuj hebʼ. Palta, manh jantakok chukal skʼulej juntzanh komon kuynabʼil tik (2 Corintios 4:3, 4; 11:13-15). Ha tʼa juntzanh bʼaj tzʼelta abʼix ha taʼ skabʼi to ay juntzanh kuynabʼil ayoch lokan hebʼ yetʼ hebʼ milumcham anima yetʼ taʼ juntzanh owal syakʼ hebʼ winh yajal yetʼ hebʼ tzʼixtan hebʼ unin. Yuj juntzanh skʼulej hebʼ tik, sjawiwal schabʼkʼolal hebʼ anima wachʼ spensar. Awtej Mateo 24:3-5, 11, 12.
Ha jun kuynabʼil te yel chiʼ tzʼikʼanchaʼanh sbʼi koMam Jehová. Max chalaj skʼoʼol winh juntzanh komon kuynabʼil chiʼ, yujto ha juntzanh tik tzʼalan juntzanh es tʼa yibʼanh koMam Dios, tʼa tas yaj hebʼ chamnak, yetʼ juntzanh komon pensar max ilchajlaj tʼa yol chʼanh Biblia. Palta ha Jehová snibʼejwal winh to ha hebʼ anima tzʼojtakanel jun yelal chiʼ tʼa yibʼanh winh. Awtej Ezequiel 18:4 yetʼ 1 Timoteo 2:3-5.
2. Tas juntzanh wachʼ abʼix syal chʼanh Biblia tʼa yibʼanh juntzanh kuynabʼil?
Ha koMam Dios max yal-laj yakʼchaj musansatil yuj juntzanh komon kuynabʼil tzʼalani to sxajanej winh hebʼ, yujto ha jun yolyibʼanhkʼinal tik yik winh Satanás ha sxajanej hebʼ (Santiago 4:4). Ha chʼanh Biblia tzʼalani to masanil juntzanh komon kuynabʼil chiʼ haton jun skuch «niwan Babilonia». Ha jun bʼi tik elnakkankot tʼa jun pekaʼ chonhabʼ bʼajtil pakʼnakkʼe juntzanh komon kuynabʼil tik; ayik toxo ixʼekʼbʼat jun Niwan Yaxnhabʼ tʼa stiempoʼal winhaj Noé. Toxowal olyakʼlajwok koMam Dios masanil juntzanh kuynabʼil tzʼakʼan musansatil yetʼ sjuʼanel hebʼ anima. Awtej Apocalipsis 17:1, 2, 5, 16, 17 yetʼ 18:8.
Ha hebʼ anima wachʼ spensar aykanbʼat tʼa skal juntzanh komon kuynabʼil tʼa smasanil yolyibʼanhkʼinal tik naʼan hebʼ yuj Jehová. To yuj chiʼ wan smolchajkot hebʼ yuj winh. Chajtil syutej winh? Ha schʼoxchajel jun yelal tʼa hebʼ. Awtej Miqueas 4:2, 5.
3. Tas yowalil skʼulej hebʼ anima wachʼ spensar?
Yuj jun kuynabʼil scha skʼoʼol Dios, jun molanh tzʼajekʼ hebʼ anima
Ha Jehová aywal yilkʼolal tʼa yibʼanh hebʼ anima sxajanan juntzanh yelal yetʼ tas wachʼ. Yuj chiʼ syal winh to syaktejkan jun komon kuynabʼil chiʼ hebʼ. Tato tʼa walyel sxajanej winh hebʼ junkʼolal olʼaj skʼanabʼajan masanil tas syal koMam Dios chiʼ hebʼ yik icha chiʼ oltzalajanh winh yetʼ hebʼ. Awtej Isaías 52:11.
Ha tʼa stiempoʼal hebʼ winh skʼaybʼum Kajal Jesús, ha hebʼ anima wachʼ spensar tzalajkʼolal ixchaʼ yabʼ hebʼ jun wachʼ abʼix. Ha Jehová schʼoxannak tʼa juntzanh hebʼ anima chiʼ jun wachʼ bʼeybʼal tzʼakʼan sjunkʼolal hebʼ yetʼ tas syal yakʼanoch hebʼ yipok skʼoʼol. Icha hebʼ chiʼ, haʼonh tik paxi yowalil skochaʼ kabʼ tas syal sLolonel winh skakʼanoch winh tʼa yibʼanh masanil tas skokʼulej Awtej 1 Tesalonicenses 1:8, 9 yetʼ 2:13.
Ha hebʼ tzʼaktankan juntzanh komon kuynabʼil chiʼ, haxo tzʼoch hebʼ tʼa jun kuynabʼil te yel, te tzalajkʼolal schachaj hebʼ yuj Jehová. Masanil hebʼ ste tzalaj yoch yamigoʼalok winh, yujto tzʼoch hebʼ tʼa skal hebʼ anima sxajanan sbʼa olcha pax skʼinal hebʼ tʼa junelnhej. Tom tzanibʼej ha chaʼan juntzanh syaxil skʼabʼ koMam Dios tik? Awtej Marcos 10:29, 30 yetʼ 2 Corintios 6:17, 18.
4. Tas olʼaj yikʼankot tzalajkʼolal koMam Dios tʼa sat lum luʼum tik?
Ayik olyakʼlajwok juntzanh komon kuynabʼil tik Jehová, olyikʼkot junkʼolal winh tʼa yolyibʼanhkʼinal tik. Ha juntzanh kuynabʼil tik manhxo olyakʼlaj musansatil hebʼ anima, manhxo olyal-laj spojchaj snanhal hebʼ yuj hebʼ. Haxo hebʼ anima smasanil anhej koDiosal tʼa walyel olyakʼ servil hebʼ. Yeltoni to te wachʼ jun abʼix tik? Awtej Apocalipsis 18:20, 21 yetʼ 21:3, 4.
