Ha jun wachʼ abʼix to olonhajekʼ tʼa junelnhej tʼa sat lum luʼum tik aykanem tʼa chʼanh Biblia (Salmo 37:29). Ha jun chʼanh huʼum tik makkixtak yaj yol chʼanh 66 wal sbʼisulal chʼanh. 40 hebʼ winh winak sikʼbʼilel yuj koMam Dios stzʼibʼannak chʼanh. Ha oyeʼ makanh chʼanh ixbʼabʼlaj stzʼibʼchaji, ha winhaj Moisés stzʼibʼannak chʼanh hatax tres mil quinientos abʼil. Haxo jun makanh chʼanh slajwubʼ, ayxoʼam mil novecientos abʼil slajwi tzʼibʼchajkan chʼanh yuj winhaj apóstol Juan. Ha tʼa Dios skot juntzanh ayem tʼa yol chʼanh Biblia tik. Ha yespíritu santo winh yakʼlabʼejnak yik slolonkot tʼa hebʼ winh tzʼibʼannak chʼanh Biblia tik (2 Samuel 23:2). Ha spensar koMam Dios stzʼibʼejnak hebʼ winh winak tik manhok spensar hebʼ. Yuj chiʼ jun, ha tʼa Jehová skot chʼanh. Awtej 2 Timoteo 3:16 yetʼ 2 Pedro 1:20, 21.

Yujto ha tʼa koMam Dios skot chʼanh. Yuj chiʼ ha tas syal chʼanh to olʼujok tzʼelnhejkʼochi; haxo hebʼ anima jun max yal-laj jun tik yuj hebʼ (Josué 23:14). Anhej Dios syal sbʼoʼan jun tik yujto te ay spoder winh. Awtej Isaías 42:9 yetʼ 46:10.

Ha junok chʼanh huʼum skot tʼa koMam Dios yowalil chʼok yel chʼanh tʼa juntzanhxo chʼanh huʼum. Te tzijtumxo tiʼal bʼaj pukbʼilxo chʼanh. Wachʼxom pektitaxxo chʼanh maj tzʼibʼchajlaj chʼanh yik tzʼakʼlabʼaj tʼa escuela, palta ha tas syal chʼanh tʼa yibʼanh lum luʼum tik te yel. Hanhejtonaʼ 40 hebʼ winh winak stzʼibʼannakkan chʼanh, te wachʼ tzʼaj yikʼan sbʼa tas stzʼibejnakkan hebʼ chiʼ. * Haxo tʼa junjun sbʼisulal chʼanh scheklajelta sxajanil koMam Dios. Yetʼ pax tiknaʼik syal skʼexan sbʼeybʼal hebʼ anima. Yuj chiʼ jun, manh jantakok hebʼ anima syakʼoch hebʼ tʼa skʼoʼol to ha chʼanh Biblia tik tʼa walyel sLolonel koMam Dios yaj chʼanh. Awtej 1 Tesalonicenses 2:13.

Ha tʼa chʼanh Biblia ayem jun abʼix te wachʼ. Syal chʼanh tʼayonh tas snibʼejwal Dios yakʼan tʼa hebʼ anima. Syal paxi to ha tʼa yichbʼanil yolyibʼanhkʼinal tik, ha jun winh bʼabʼel winak ixyaktejel jun skʼinal winh ixʼakʼchaj tʼa jun lum luʼum te wachʼtzin. Syalanxi chajtil olyutok koMam Dios sbʼoʼanxi. Awtej Apocalipsis 21:4, 5.

Ha tʼa sLolonel koMam Dios tik ayem juntzanh scheknabʼil yetʼ juntzanh skachnabʼil. Syal pax chʼanh tʼayonh chajtil syutej sbʼa Jehová tʼa hebʼ anima, haton jun chiʼ schʼoxanelta smodoʼal winh. Yuj chiʼ jun, ha chʼanh Biblia skolwaj tʼayonh yik skowachʼ ojtakejel winh. Anaʼ paxi schʼox chʼanh tʼayonh chajtil tzʼaj koch yamigoʼok winh. Awtej Salmo 19:7, 11; Santiago 2:23, yetʼ4:8.

Yik snachajnakel tas syal chʼanh Biblia, ha Kajal Jesús yawtejnak chʼanh ixtaʼ bʼiʼan syamoch winh yalani tas tzʼelkʼoch syal chʼanh. Icha pax chiʼ tzʼaj chʼoxanel jun chʼanh huʼum tik tʼayonh yik wachʼ snachajel tas tzʼelkʼoch juntzanh skʼaybʼubʼal chʼanh Biblia tik kuʼuj. Awtej Lucas 24:27, 45.

Kojtakwal to te tzalajkʼolal olhach-aj hawachʼ ilanel juntzanh wachʼ abʼix syakʼ koMam Dios tik tʼayonh. Palta, ay juntzanh hebʼ anima malaj yelkʼoch juntzanh tik tʼay, ay pax mach skot yowal yujto tzʼalchaj tʼay. Palta manh akʼ chabʼax hakʼoʼol yuj tas syal hebʼ anima chiʼ. Yujto ha chʼanh Biblia tzʼalani, to ha hebʼ skʼaybʼan tas syal sLolonel koMam Dios olʼajekʼ hebʼ tʼa junelnhej. Awtej Juan 17:3.