CHUPAM ri Biblia xa xe kayoxiʼ texto nawïl ri nkibʼij Miguel chi re jun taqoxel. Toq yeʼasikʼij, natzʼët chi ri Miguel ronojel mul kʼo achike nubʼän. Achiʼel chupam ruwuj ri Daniel, ri Miguel nchʼayon kikʼin ri itzel taq taqoxelaʼ; chupam ruwuj ri Judas, yechapalon kiʼ rikʼin ri Satanás; chupam ri Apocalipsis, najin nkibʼän oyowal (chʼaʼoj) rikʼin ri Satanás chuqaʼ ri itzel taq taqoxelaʼ. Ri Miguel ronojel mul nutoʼ ri ruqʼatbʼäl tzij ri Jehová, chuqaʼ nchʼayon kikʼin ri itzel yetzʼeton ri Jehová. Ja riʼ rubʼanik nubʼän ri nubʼij ri rubʼiʼ: Miguel. Re bʼiʼaj reʼ nel chi tzij: «¿Achike xtujunumaj riʼ rikʼin ri Dios?». Rikʼin ronojel reʼ, ¿achike kʼa ri Miguel?

Richin nqetamaj, nabʼey toqa pa qajolom chi e kʼo winäq kaʼiʼ kibʼiʼ. Ri Jacob, ri tataʼaj richin jun nimaläj tinamït, xubʼiniʼaj chuqaʼ Israel; ri apóstol Pedro xbʼïx chuqaʼ Simón chi re (Génesis 49:1, 2; Mateo 10:2). Ke riʼ chuqaʼ ri Miguel, ri Biblia kʼïy retal nuyaʼ chi reʼ jun chik rubʼiʼ nbʼïx ri Jesucristo toq majani tpe chi Ruwachʼulew chuqaʼ toq xtzolin chik chi kaj.  Tqatzʼetaʼ achike nubʼij ri Biblia richin nqabʼij chi kan rijaʼ wi.

Arcángel. Ri Ruchʼabʼäl ri Dios nubʼij «ri arcángel» chi re ri Miguel (Judas 9). Re tzij reʼ nubʼij «nimaläj ruqʼij taqoxel». We nqatzʼët, ri Miguel nbʼïx ri arcángel chi re, nel chi tzij xa xe jun taqoxel ri nimaläj ruqʼij. Ri Biblia majun bʼey nukusaj ta ri tzij «arcángel» toq nchʼon chi kij e kʼïy taqoxelaʼ, reʼ xa xe nukusaj toq nchʼon chi rij jun taqoxel. Chuqaʼ toq ri Biblia nchʼon chi  rij ri Jesús, nubʼän chi re chi rijaʼ nubʼän rusamaj jun arcángel. Ja reʼ nubʼij chi xtubʼän: «Ri Ajaw ri xtqa pe chi laʼ chi kaj rikʼin jun chʼabʼäl richin qʼatbʼäl tzij, rikʼin ri ruchʼabʼäl jun arcángel» (1 Tesalonicenses 4:16, CR). Re texto reʼ nubʼij chi ri Jesús xtchʼon pe rikʼin chʼabʼäl ri kan kʼo chi ninimäx. Reʼ nuqʼalajrisaj chi ja ri Jesús ri arcángel Miguel.

Ukʼwäy Bʼey. Ri Biblia nubʼij chi ri «Miguel e rachibʼilan ri ru-ángel, xkibʼän oyowal rikʼin ri itzel chiköp y ri e itzel taq ru-ángel» (Apocalipsis 12:7). Waweʼ nqʼalajin chi ri Miguel, ukʼwäy bʼey pa ruwiʼ jun molaj taqoxelaʼ. Ri wuj Apocalipsis nubʼij chuqaʼ chi ri Jesús ukʼwäy bʼey pa ruwiʼ jun molaj taqoxelaʼ (Apocalipsis 19:14-16). Ri apóstol Pablo chuqaʼ xubʼij: «Ri ajaw Jesús e rachibʼilan pe ri ángel ri kʼo janila uchuqʼaʼ kikʼin» (2 Tesalonicenses 1:7). Ke riʼ, ri Biblia nubʼij: ri Miguel chuqaʼ ri rutaqoxelaʼ, ri Jesús chuqaʼ ri rutaqoxelaʼ (Mateo 13:41; 16:27; 24:31; 1 Pedro 3:22). Chupam ri Biblia, man nawïl ta jun texto ri nubʼij chi e kʼo e kaʼiʼ molaj utziläj taq taqoxelaʼ, jun ta ri rukʼwan ri Miguel chuqaʼ jun ta ri rukʼwan ri Jesús. Ruma riʼ, nqʼalajin chi ri Miguel, rijaʼ ri Jesucristo toq nubʼän ri rusamaj chi kaj. *