1. ¿Achike chʼonïk xtqatzʼët qa?

PA MILLÓN chi winäq ronojel Ruwachʼulew ketaman ri padrenuestro. Ri Jesús xukʼüt re chʼonïk reʼ richin xuyaʼ kan jun tzʼetbʼäl chi rij rubʼanik yojchʼon rikʼin ri Dios. Re chʼonïk reʼ kʼo ruqʼij. Tqatzʼetaʼ oxiʼ nabʼey taq naʼoj ri yeqïl chupam re chʼonïk reʼ richin nqʼax chi qawäch ri nukʼüt ri Biblia.

2. ¿Achike xubʼij ri Jesús chi ütz nqakʼutuj chi re ri Jehová toq yojchʼon rikʼin?

² Ri Jesús xubʼij: «Toq rïx nibʼän orar, tibʼanaʼ jun oración achiʼel reʼ: Qatataʼ Dios ri at kʼo chi laʼ chi kaj, xtbʼanatäj ta kʼa chi konojel ta ri winäq nkiyaʼ ta aqʼij, y man ta xtkixolqʼotij ri loqʼoläj abʼiʼ. Y xtpe yan ta kʼa ri awajawaren. Y kan ja ta kʼa ri nawajoʼ rat ri xtbʼanatäj waweʼ chuwäch re ruwachʼulew, achiʼel nbʼanatäj chi laʼ chi kaj» (Mateo 6:9-13, CO). ¿Achike nkajoʼ nkibʼij re oxiʼ naʼoj reʼ?

3. ¿Achike ütz nqetamaj chi rij Rajawaren ri Dios?

³ Wakami, kʼïy chik qetaman chi rij rubʼiʼ ri Dios, chuqaʼ xojchʼon yan chi rij ri nrajoʼ rijaʼ. Achiʼel ri xubʼän yan chuqaʼ ri xtubʼän chi qawäch apo pa kiwiʼ ri winäq. Ruma riʼ ¿achike xrajoʼ xubʼij ri Jesús toq xubʼij «xtpe yan ta kʼa ri awajawaren»? ¿Achike ri Rajawaren ri Dios? ¿Achike xtubʼän ri Ajawaren richin xtuchʼajchʼojrisaj rubʼiʼ ri Dios? ¿Achike rubʼanik nuxïm riʼ ri Ajawaren rikʼin ri nbʼanatäj ri nrajoʼ ri Dios?

4. ¿Achike ri Rajawaren ri Dios chuqaʼ achike ri Ruqʼatöy Tzij?

⁴ Ri Ajawaren, nel chi tzij, jun qʼatbʼäl tzij ri ruyaʼon ri Jehová. Kan ja rijaʼ xchaʼon ri Ruqʼatöy Tzij. ¿Achike ri Ruqʼatöy Tzij? Ja ri Jesucristo. Rijaʼ qʼaxnäq ruqʼij chi kiwäch ri qʼatöy taq tzij chi Ruwachʼulew. Ruma riʼ nbʼïx chi rijaʼ ri «kʼo pa kiwiʼ konojel rey y ajaw richin ronojel ajawaren» (Apocalipsis 17:14). Chi kiwäch konojel ri qʼatöy taq tzij, ja ri Jesús kʼo más ruchuqʼaʼ richin yerubʼän utziläj taq samaj pa kiwiʼ ri winäq.

5. ¿Akuchi (apeʼ) kʼo Rajawaren ri Dios, chuqaʼ achoj pa ruwiʼ xtqʼaton pe tzij?

⁵ Ri Rajawaren ri Dios chi kaj xtqʼaton pe tzij. ¿Achike ruma nqabʼij riʼ? Ruma ri Jesús chi kaj kʼo wakami. Achiʼel xqetamaj yan kan, toq xa kʼa reʼ tkamisäx ri Jesús chuwäch ri cheʼ chuqaʼ xkʼasöx chik, rijaʼ xbʼe chi kaj (Hechos 2:33). Ruma riʼ ri Biblia «ruqʼatbʼäl tzij» ri Dios «chi laʼ chi kaj» nubʼij chi re (2 Timoteo 4:18). Stapeʼ ri Ajawaren chi kaj kʼo wi, xtqʼaton pe tzij pa ruwiʼ ri Ruwachʼulew (tasikʼij Apocalipsis 11:15).

6, 7. ¿Achike ruma ri Jesús jun nimaläj Qʼatöy Tzij?

⁶ Ri Jesús jun nimaläj Qʼatöy Tzij. ¿Achike ruma nimaläj? Nabʼey, ruma man nkäm ta. Ri Biblia nubʼij chi ri rukʼaslem rijaʼ «majun bʼey xtkʼis ta» (Hebreos 7:16). Ruma riʼ man junumatäl ta kikʼin ri qʼatöy taq tzij chi Ruwachʼulew. Ronojel ri utziläj taq samaj xkerubʼän man xtkʼis ta. Kʼïy na wi utziläj taq samaj xkerubʼän.

⁷ Tqatzʼetaʼ ri rubʼin pe ri Biblia chi rij ri Jesús: «Ri espíritu richin ri Jehová kan jantapeʼ kʼa xtkʼojeʼ rikʼin, richin nbʼeruyaʼ naʼoj y nojibʼäl, richin nbʼeruyaʼ uchuqʼaʼ y etamabʼäl, richin xtok pixabʼanel. [...] Rijaʼ kan xtqa chuwäch xtunimaj rutzij ri Jehová. Rijaʼ man xtuqʼät ta tzij [...] xa xe rikʼin ri nutzʼët, ni xa xe rikʼin ri nrakʼaxaj. Xtuqʼät kʼa tzij pa ruchojmilal pa kiwiʼ ri man jun kʼo kikʼin, chuqaʼ kan  pa ruchojmilal xtuqʼät tzij pa kiwiʼ ri man kinimirsan ta kiʼ» (Isaías 11:2-4). Re textos reʼ nkiqʼalajrisaj chi toq ri Jesús xtqʼaton tzij, nujoyowaj kiwäch ri winäq chuqaʼ pa ruchojmil xtubʼän chi re ronojel. ¿Nqa chawäch rat jun qʼatöy tzij ri ke riʼ runaʼoj?

8. ¿Achike winäq xkeqʼaton tzij rikʼin ri Jesús?

⁸ Jun chik retal ri Rajawaren ri Dios: ri Jesús man ruyon ta nqʼaton tzij, e kʼo más rachibʼil. Ri apóstol Pablo xubʼij chi re ri Timoteo: «We nqaköchʼ tijoj poqonal ruma rijaʼ [ri Jesús], napon na ri qʼij toq junan xtqaqʼät tzij rikʼin» (2 Timoteo 2:12). Jaʼ, ri Pablo, ri Timoteo chuqaʼ jujun chik utziläj taq winäq ri e chaʼon ruma ri Dios xkeqʼaton tzij rikʼin ri Jesús chi kaj. ¿E jaruʼ winäq e chaʼon ri Dios?

9. ¿Jaruʼ winäq xkeqʼaton tzij rikʼin ri Jesús, chuqaʼ jampeʼ xtikirisäx pe kichaʼik?

⁹ Achiʼel xqatzʼët chupam ri tanaj 7, ri apóstol Juan xkʼutumär chuwäch chi ri «Karneʼl [Jesucristo] paʼäl pa ruwiʼ ri juyuʼ Sión [ri ruqʼatbʼäl tzij chi kaj], e rachibʼilan el 144,000 winaqiʼ. Y konojel kʼa reʼ, kikʼwan ri nikʼaj kiwäch ri rubʼiʼ ri Jesucristo y ri rubʼiʼ ri Tataʼixel». ¿Achike winäq e kʼo chupam ri 144.000? Ri Juan nubʼij chi ri kitzeqelibʼen ri Jesucristo, «ja reʼ ri nabʼey ri xekol pe chi kikojöl ri winaqiʼ, richin chi yeʼok achiʼel nabʼey sipanïk chi re ri Dios y ri Karneʼl» (Apocalipsis 14:1, 4). Rijeʼ e utziläj taq tzeqelibʼey ri e chaʼon richin xkeqʼaton tzij rikʼin ri Jesús chi kaj. Toq rijeʼ yekäm y yekʼasöx, yebʼe chi kaj richin ‹xkeqʼaton tzij pa ruwiʼ ri Ruwachʼulew› rikʼin ri Jesús (Apocalipsis 5:10). Richin yetzʼaqät ri 144.000, ri Dios xutikirisaj pe kichaʼik pa kiqʼij kan ri apóstoles.

10. ¿Achike ruma ütz runaʼoj ri Jehová chi ja ri Jesús chuqaʼ ri 144.000 winäq xkeqʼaton tzij pa qawiʼ?

¹⁰ Ruma ri Jehová yojrajoʼ, ja ri Jesús chuqaʼ ri 144.000 xeruchaʼ richin xkeqʼaton tzij pa qawiʼ. Ri Jesús ruma xkʼojeʼ chi Ruwachʼulew retaman ri tijoj poqonal nkinaʼ  ri winäq. Toq ri Pablo xchʼon chi rij ri Jesús, xubʼij: «Ri qanimaläj sacerdote retaman ri nqanaʼ toq majun quchuqʼaʼ, ruma toq xkʼojeʼ re waweʼ [...] xtojtobʼëx rikʼin ronojel ruwäch mak, achiʼel yojtojtobʼëx röj; xa xe rijaʼ man xmakun ta» (Hebreos 4:15; 5:8). Ri xkeqʼaton tzij rikʼin ri Jesús, kinaʼon chuqaʼ ri tijoj poqonal chi Ruwachʼulew. Rijeʼ e ajmakiʼ chuqaʼ xeyawäj achiʼel röj. Rijeʼ jebʼël xtqʼax chi kiwäch ri kʼayewal kʼo pa kiwiʼ ri winäq.

11. ¿Achike ruma ri Jesús xubʼij chi ke ri tijoxelaʼ chi tkikʼutuj chi tbʼanatäj ri nrajoʼ ri Jehová chi kaj?

¹¹ Ri Jesús man xa xe ta xubʼij chi ke ri rutijoxelaʼ chi tkikʼutuj chi tpe ri Rajawaren ri Dios. Chuqaʼ xubʼij chi tkikʼutuj chi tbʼanatäj ri nrajoʼ ri Jehová chi Ruwachʼulew «achiʼel nbʼanatäj chi laʼ chi kaj». Ri chi kaj, ri utziläj taq ángeles man kiyaʼon ta kan rubʼanik ri nrajoʼ ri Jehová. Chupam ri tanaj 3, xqetamaj chi kʼo jun ángel man xubʼän ta chik ri nrajoʼ ri Jehová. Rijaʼ xbʼanon chi ri Adán y Eva xemakun. Chupam ri tanaj 10 xtqetamaj achike más nukʼüt ri Biblia chi rij re ángel reʼ, ri nbʼïx Satanás chi re. Ri Dios xuyaʼ qʼij chi ri Satanás chuqaʼ ri ángeles ri xetzeqelibʼen richin, kʼa xekʼojeʼ na chi kaj. Ke riʼ toq ri Jesús xkʼojeʼ chi Ruwachʼulew, man konojel ta ri ángeles nkibʼän wi ri nrajoʼ ri Dios chi kaj. Reʼ xchojmirisatäj toq ri Jesús xutikirisaj rusamaj pa Rajawaren ri Dios chuqaʼ toq xrelesaj pe ri Satanás chi kaj (tasikʼij Apocalipsis 12:7-9).

12. ¿Achike kaʼiʼ nimaläj taq bʼanobʼäl nutzijoj ri Apocalipsis 12:10?

¹² Ri Biblia nubʼij ri xbʼanatäj: «Rïn ri Juan xinwakʼaxaj kʼa jun chʼabʼäl chi laʼ chi kaj y rikʼin ruchuqʼaʼ nubʼij kʼa: Wakami xoqa yan ri kolotajïk, ri uchuqʼaʼ y ri rajawaren ri Dios. Y ke riʼ chuqaʼ xoqa yan ri qʼij chi nqʼalajin ri ruqʼatbʼäl tzij ri Jesucristo ri chaʼon pe ruma ri Dios. Ruma ri nosujun chi kij ri qachʼalal chuwäch ri Dios chi pa qʼij chi chaqʼaʼ,  xkʼaq yan el» (Apocalipsis 12:10, CO). Re texto reʼ nutzijoj kaʼiʼ nimaläj taq bʼanobʼäl. Nabʼey, ri Jesús nutikirisaj rusamajixik ri Rajawaren ri Dios. Rukaʼn, ri Satanás nelesäx pe chi kaj, ke riʼ nkʼaq pe chi Ruwachʼulew.

13. ¿Achike xbʼanatäj chi kaj toq xelesäx pe ri Satanás?

¹³ Ri chi qawäch apo xtqetamaj chi re kaʼiʼ bʼanobʼäl reʼ xebʼanatäj yan. ¿Achike xkikʼäm pe riʼ? Tqasikʼij ri xbʼanatäj: «Rïx ri ix kʼo chi laʼ chi kaj tkikot ri iwanima» (Apocalipsis 12:12). Jaʼ, toq ri Satanás chuqaʼ ri rachibʼil xeʼelesäx pe chi kaj, ri utziläj taq ángeles xekikot ruma xa xe chik xekʼojeʼ kan ri nkibʼän ri nrajoʼ ri Jehová. Chi kiwäch rijeʼ majun oyowal ta, ütz kikʼwan kiʼ konojel. Ruma riʼ ri chi kaj najin chik nbʼanatäj ri nrajoʼ ri Dios.

14. ¿Achike xukʼäm pe pa kiwiʼ ri winäq ri xkʼaq pe ri Satanás chi Ruwachʼulew?

¹⁴ Ja kʼa, ¿achike xbʼanatäj chi Ruwachʼulew? Ri Biblia nubʼij: «Kan toqʼëx iwäch rïx ri ix kʼo chuwäch ri ruwachʼulew y ri pa ruwiʼ taq yaʼ. Ruma ri Itzel Winäq xxuleʼ qa iwikʼin rïx rikʼin janila royowal, ruma rijaʼ retaman chi man kʼïy ta chik qʼij ri yaʼon chi re» (Apocalipsis 12:12). Ri Satanás xyakatäj royowal ruma xelesäx pe chi kaj chuqaʼ ruma man kʼïy ta chik qʼij yaʼon chi re. Ruma yakatajnäq royowal ruyaʼon kʼayewal pa kiwiʼ ri winäq. Chupam ri jun chik tanaj, xtqetamaj más chi kij ri kʼayewal e ruyaʼon. Ja kʼa, ¿achike xtubʼän ri Ajawaren richin xtbʼanatäj ri nrajoʼ ri Dios chi Ruwachʼulew?

15. ¿Achike nrajoʼ ri Dios pa ruwiʼ ri Ruwachʼulew?

¹⁵ Toqa pa ajolom ri nrajoʼ ri Jehová pa ruwiʼ ri Ruwachʼulew. Achiʼel xqetamaj chupam ri tanaj 3, chuwäch ri kotzʼijaläj ulew pa Edén, ri Jehová xukʼüt ri nrajoʼ pa ruwiʼ ri Ruwachʼulew. Rijaʼ xrajoʼ chi xkotzʼijäx ta ruwäch ronojel, chuqaʼ xekʼojeʼ ta utziläj taq winäq chuwäch, ke riʼ majubʼey ta yekäm. Ri nrajoʼ ri Dios pa ruwiʼ ri Ruwachʼulew xitzelatäj, toq ri Satanás xubʼän chi ri Adán y Eva xemakun.  Ja kʼa man ruma ta riʼ xjalatäj ri nrajoʼ ri Jehová. Rijaʼ nrajoʼ chi nbʼanatäj reʼ: «Ri choj kikʼaslem chuwäch ri Jehová, xtkichinaj ri ruwachʼulew. Y kan xkekʼaseʼ kʼa chi riʼ richin jantapeʼ» o chi jumul (Salmo 37:29). Ja riʼ xtubʼän ri Rajawaren ri Dios. ¿Achike rubʼanik?

16, 17. ¿Achike nubʼij ri Daniel 2:44 chi rij ri Rajawaren ri Dios?

¹⁶ Chupam ri Daniel 2:44 nqïl re profecía reʼ: «Chupam kʼa ri qʼij toq ri winaqiʼ richin chi jun ruwachʼulew kʼo chik ri qʼatbʼäl tzij kikʼin, ja riʼ kʼa toq ri Dios xtoruyaʼ qa jun qʼatbʼäl tzij ri kan richin rijaʼ ri majun xtwulan richin. Ri qʼatbʼäl tzij riʼ kan man xtyaʼöx ta kʼa pa kiqʼaʼ ri winaqiʼ. Kan xkerukʼïs kʼa ronojel ri qʼatbʼäl taq tzij ri e kʼo chuwäch ri ruwachʼulew, y ja ri qʼatbʼäl tzij richin rijaʼ ri xtkʼojeʼ jantapeʼ». ¿Achike nubʼij re profecía reʼ chi rij ri Rajawaren ri Dios?

¹⁷ Nabʼey, nubʼij chi ri Rajawaren ri Dios xtkʼojeʼ toq kʼa e kʼo na ri kiqʼatbʼal taq tzij ri winäq. Rukaʼn, nubʼij chi ri Ajawaren riʼ majun jun ta qʼatbʼäl tzij chi Ruwachʼulew xtwulan chuqaʼ xtjalon el richin. Rox, nubʼij chi ri qʼatbʼäl taq tzij chi Ruwachʼulew xtkibʼän oyowal rikʼin ri Rajawaren ri Dios. Y chi ja ri Rajawaren ri Dios ri xtchʼakon. Ke riʼ xa xe re utziläj qʼatbʼäl tzij reʼ, ri xtkʼojeʼ pa kiwiʼ ri winäq.

18. ¿Achike rubʼiʼ ri oyowal (chʼaʼoj) xtkibʼän ri qʼatbʼäl taq tzij rikʼin ri Rajawaren ri Dios?

¹⁸ Ri Biblia jebʼël nuqʼalajrisaj ri oyowal xtkibʼän ri kiqʼatbʼal taq tzij ri winäq rikʼin ri Rajawaren ri Dios. Nubʼij chi toq naqaj chik kʼo re oyowal reʼ, ri itzel taq espíritus xtkitaluj tzʼukun taq tzij richin xkekiqʼol ri qʼatbʼäl taq tzij chi Ruwachʼulew. ¿Achike ruma ke riʼ xtkibʼän? Richin «yekimöl apo» ri qʼatbʼäl taq tzij chi re «ri qʼij toq xtkibʼän oyowal rikʼin ri Dios ri kan kʼo ronojel uchuqʼaʼ pa ruqʼaʼ». Ri qʼatbʼäl taq tzij xkemolöx pa jun ulew «ri nbʼïx Harmagedón chi re pa chʼabʼäl hebreo» (Apocalipsis 16:14-16). Achiʼel nkibʼij re textos reʼ, ri oyowal xtkibʼän ri qʼatbʼäl taq tzij rikʼin ri Rajawaren ri Dios, oyowal richin Armagedón nbʼïx chi re.

19, 20. ¿Achike nbʼanon chi ri nrajoʼ ri Dios man nbʼanatäj ta wakami?

 ¹⁹ ¿Achike samaj xtubʼän Rajawaren ri Dios ruma ri Armagedón? Toqa chi qe chi ri Jehová xrajoʼ chi xkotzʼijäx ta ruwäch ri Ruwachʼulew chuqaʼ xekʼojeʼ ta utziläj taq winäq chuwäch, ke riʼ xkiyaʼ ta ruqʼij rijaʼ. ¿Achike nbʼanon chi ri xrajoʼ ri Dios man bʼanatajnäq ta wakami? Jun, ruma xa oj ajmakiʼ, ruma riʼ yojyawäj chuqaʼ yojkäm. Chupam ri tanaj 5 xqetamaj chi ri Jesús xuyaʼ rukʼaslem pa kamïk quma röj, richin nqïl ri kʼaslem man kʼisel ta. Ruma riʼ ri Biblia nubʼij: «Ri Dios kan janila [...] yerajoʼ konojel ri winaqiʼ, y ruma riʼ kan xutäq kʼa pe ri juney rukʼajol, richin chi xa bʼa achike kʼa ri xtukuqubʼaʼ rukʼuʼx rikʼin, man kʼa xtapon ta chupam ri kamïk ri richin jantapeʼ, xa kan xtkʼojeʼ kʼa rukʼaslem» man kʼisel ta (Juan 3:16).

²⁰ Jun chik ruma ri man bʼanatajnäq ta ri nrajoʼ ri Dios, ja ri e kʼïy winäq man ütz ta ri najin nkibʼän. Yetzʼukun tzij, yekiqʼöl ri winäq chuqaʼ ruyon tzʼiläj taq bʼanobʼäl yekibʼän. Man nkajoʼ ta nkibʼän ri nrajoʼ ri Jehová. Ri winäq yebʼanon reʼ xkekäm pa Armagedón, ri oyowal xtukʼäm pe ri Dios (tasikʼij Salmo 37:10). Ri rukʼisibʼäl ruma, ri qʼatöy taq tzij man nkibʼij ta chi ke ri winäq chi tkibʼanaʼ ri nrajoʼ ri Dios. Kʼïy chi ke rijeʼ majun ruchuqʼaʼ ta ri kiqʼatbʼal tzij, itzel kinaʼoj chuqaʼ man pa ruchojmil ta yeqʼaton tzij. Ruma riʼ ri Biblia nubʼij: «Toq ri achin nkʼojeʼ ruchuqʼaʼ [xa xe] richin nubʼän itzel chi re ri ruwinaq» (Eclesiastés 8:9).

21. ¿Achike rubʼanik ri Ajawaren xtubʼän chi xtbʼanatäj ri nrajoʼ ri Dios chi Ruwachʼulew?

²¹ Toq xtqʼax ri Armagedón, xa xe ri Rajawaren ri Dios xtqʼaton tzij pa kiwiʼ ri winäq. Ja Ajawaren reʼ xtbʼanon chi xtbʼanatäj ri nrajoʼ ri Dios chuqaʼ xtukʼäm pe nimaläj taq urtusanïk. Jun chi ke ri samaj xtubʼän ri Ajawaren, ja ri xtuyüt ri Satanás y ri itzel taq rachibʼil mil junaʼ (Apocalipsis 20:1-3). Xtubʼän chi xtyaʼöx urtusanïk pa kiwiʼ ri winäq ruma  ri Jesús xuyaʼ rukʼaslem pa kamïk. Ke riʼ ri utziläj taq winäq man xkeyawäj ta chik chuqaʼ man xkekäm ta chik, xa xtkïl kikʼaslem man kʼisel ta (tasikʼij Apocalipsis 22:1-3). Chuqaʼ xtkotzʼijäx ruwäch ronojel Ruwachʼulew. Ja riʼ rubʼanik ri Ajawaren xtubʼän chi xtbʼanatäj ri nrajoʼ ri Dios chi Ruwachʼulew y xtuchʼajchʼojrisaj rubʼiʼ ri Dios. ¿Achike nel chi tzij riʼ? Nel chi tzij chi ri Ajawaren xtubʼän chi konojel winäq xtkiyaʼ ruqʼij rubʼiʼ ri Jehová.

22. ¿Achike ruma qetaman chi ri Ajawaren man xkʼojeʼ ta toq ri Jesús kʼo wi chi Ruwachʼulew chuqaʼ kan xa xe toq xkʼasöx?

²² Toq ri Jesús xubʼij chi ke ri rutijoxelaʼ chi tkikʼutuj chi tpe ri Rajawaren ri Dios, ri Ajawaren riʼ kʼa majani wi kʼo ta. ¿Xkʼojeʼ toq ri Jesús xbʼe chi kaj? Manäq. Ruma riʼ ri Pedro chuqaʼ ri Pablo xkibʼij chi toq ri Jesús xkʼasöx yan, ja riʼ toq xbʼanatäj chi rij ri Jesús ri nubʼij ri Salmo 110:1: «Ri Jehová xubʼij chi re ri wajaw: Katzʼuyeʼ pe re pa wijkiqʼaʼ y [kʼa] xkenyaʼ [na] pa aqʼaʼ ri yeʼitzelan awichin» (Hechos 2:32-35; Hebreos 10:12, 13). Jaʼ, ri Jesucristo kʼo chi xroyobʼej na.

23. a) ¿Jampeʼ xutikirisaj rusamaj ri Jesús? b) ¿Achike xtqetamaj chupam ri jun chik tanaj?

²³ ¿Jaruʼ junaʼ kʼo chi xroyobʼej ri Jesús? Jun 40 junaʼ toq majani tapon ri junaʼ 1914, jun molaj winäq ri nkitijoj wi kiʼ chi rij ri Biblia, xqʼax chi kiwäch chi ri junaʼ xtroyobʼej ri Jesús, xtbʼekʼis pa 1914. (We nawajoʼ nawetamaj más  chi rij re junaʼ reʼ, chupam ri tzijonem «1914, jun junaʼ ri kʼo rejqalem chupam ri Biblia»). Rikʼin ri bʼanatajnäq pe chi Ruwachʼulew, kan xa xe pe pa 1914 nqʼalajin chi qitzij xkibʼij ri tijoxelaʼ chi rij ri Biblia. Ri xebʼanatäj ri profecías, nqʼalajin chi chupam ri junaʼ 1914, ri Jehová xubʼän chi ri Jesús xok qʼatöy tzij pa Rajawaren. Y ke riʼ xutikirisaj ri rusamaj. Ruma riʼ, wakami oj kʼo chupam ri kayoxiʼ chik qʼij yaʼon chi re ri Satanás (Apocalipsis 12:12; Salmo 110: 2). Chuqaʼ qetaman chi ri Ajawaren xa xtubʼän yan ri nrajoʼ ri Dios chi Ruwachʼulew. ¿Man nukuqubʼaʼ ta qakʼuʼx riʼ? ¿Qitzij xtbʼanatäj riʼ nabʼij rat? Chupam ri jun chik tanaj xtqetamaj achike nukʼüt ri Biblia chi rij riʼ.