¿ACHIKE noqa pa ajolom toq yeʼawakʼaxaj ri tzij alma y espíritu? E kʼïy yebʼin chi re kaʼiʼ tzij reʼ yechʼon chi rij jun peraj chi re ri qachʼakul, ri nbʼïx chi man tzʼetel ta chuqaʼ ri xa nkʼaseʼ kan toq yojkäm. Ri winäq nkibʼij chi ri jun peraj qachʼakul riʼ, nel el qikʼin toq yojkäm, ke riʼ nbʼekʼaseʼ jukʼan chik. Ruma e kʼïy winäq yebʼin riʼ, e kʼïy kʼayew nubʼän chi kiwäch nkinimaj chi ri Biblia man ja ta riʼ nubʼij chi rij ri tzij alma y espíritu. ¿Achike nubʼij ri Ruchʼabʼäl ri Dios chi kij?

Achiʼel ri qetaman pe, ri Biblia xtzʼibʼäx pa chʼabʼäl hebreo chuqaʼ griego, xa jujun ok wuj ri xetzʼibʼäx pa jun chik chʼabʼäl. Toq ri tzʼibʼanelaʼ xkajoʼ xkibʼij alma xkikusaj ri tzij hebreo néfesch chuqaʼ ri tzij griego psykjé. Re kaʼiʼ tzij reʼ más 800 mul  xetzʼibʼäx kan chupam ri Ruchʼabʼäl ri Dios. Chupam La Biblia en kaqchikel central (2003), kʼo texto nawïl ri ‹anima› bʼanon qa chi re ri tzij néfesch chuqaʼ ri tzij griego psykjé. Jun tzʼetbʼäl chi rij reʼ ja ri Salmo 16:10. Re texto reʼ nubʼij: «Jehová, rat kan man xtayaʼ ta kʼa kan ri wanima chupam ri muqubʼäl». Chupam ri Biblia pa kaxlan chʼabʼäl «alma» bʼanon qa chi re ri tzij néfesch chupam re texto reʼ. Ri tzij alma oxiʼ rubʼeyal nukusäx chupam ri Biblia. Nukusaj toq nchʼon chi kij winäq, chikopiʼ, chuqaʼ chi rij kikʼaslem winäq o chikopiʼ. Ruma oxiʼ rubʼeyal nukusäx re tzij reʼ, e kʼïy texto chi kipam ri biblias pa kaqchikel chʼabʼäl, winäq, chiköp o kʼaslem bʼanon qa chi re ri tzij alma. Tqatzʼetaʼ jujun chi ke re texto reʼ.

Winäq. «Ja winaqiʼ riʼ ri [...] man xkinimaj ta rutzij ri Dios pa ruqʼijul ri Noé [...]. Majun ri xtzolin ta pe rukʼuʼx xa kan xa xe e waqxaqiʼ winaqiʼ ri xeʼok chupam ri nima-barco riʼ y xekolotäj rikʼin yaʼ» (1 Pedro 3:20). Ri pa chʼabʼäl griego re texto reʼ nukusaj ri tzij psykjé (alma) toq nchʼon chi kij ri winäq xekolotäj: Ri Noé, ri rixjayil, ri oxiʼ rukʼajol chuqaʼ ri oxiʼ raliʼ. Ruma riʼ ri tzij alma, chi kij winäq nchʼon chupam re texto reʼ. Ri Éxodo 16:16 nubʼij ri xbʼïx chi ke ri israelitas: «Timoloʼ kʼa ri [maná] xtkʼatzin chiwe richin nitïj. [...] niwajlaj ri ix janipeʼ pa iwachoch, ja riʼ nikʼäm kan». Ri pa chʼabʼäl hebreo re texto reʼ nukusaj ri tzij néfesch (alma) toq nchʼon chi kij ri e jaruʼ winäq e kʼo pa kachoch ri israelitas. Chupam ri Génesis 46:18, Josué 11:11, Hechos 27:37 chuqaʼ Romanos 13:1, winäq bʼanon qa chi re ri tzij alma.

Chikopiʼ. Toq xebʼan ri chikopiʼ, ri Dios xubʼij: «Kekʼojeʼ kʼa pa rukʼiyal ronojel kiwäch chikopiʼ ri pa taq yaʼ, chuqaʼ kekʼojeʼ ajxikʼ taq chikopiʼ ri yexikʼan pa kaqʼiqʼ». Ri Dios xubʼij chik: «Kekʼojeʼ jalajöj kiwäch taq chikopiʼ richin kʼechelaj y ri yeʼawajïx y ri chikopiʼ ri e jebʼejäq [...]. Y kan ke ri kʼa xbʼanatäj» (Génesis 1:20, 24). Ri pa chʼabʼäl hebreo re texto reʼ néfesch (alma) nubʼij chi ke ri chikopiʼ. Chupam ri Génesis 9:10, Levítico 11:46 chuqaʼ Números 31:28, nukusäx ri tzij chiköp pa rukʼexel alma.

Kikʼaslem winäq. Ri Lucas 17:33 nubʼij: «Ri kan yalan nupoqonaj ri rukʼaslem [...], man xtrïl ta jun qitzij rukʼaslem. Ja kʼa ri man nupoqonaj ta [...], rijaʼ kan xtrïl wi kʼa ri qitzij rukʼaslem». Ri pa chʼabʼäl griego re texto reʼ nukusaj ri tzij psykjé (alma) chi  rij ri rukʼaslem nupoqonaj jun winäq. Ri 1 Reyes 17:22 nchʼon chuqaʼ chi rij rukʼaslem jun winäq. Ja reʼ nubʼij: «Ri Jehová kan xrakʼaxaj kʼa ri ruchʼabʼäl ri Elías y ri akʼwal xtzolin pe ri ranima rikʼin y xkʼastäj chik». Ri pa chʼabʼäl hebreo re texto reʼ nukusaj ri tzij néfesch toq nchʼon chi rij rukʼaslem ri akʼwal, ri xtzolin chik pe rikʼin. Chuqaʼ ri Juan 10:11, pa chʼabʼäl griego, nukusaj ri tzij psykjé chi rij ri rukʼaslem xuyaʼ ri Jesús kuma ri winäq. Ri Biblia pa qachʼabʼäl, re texto reʼ nubʼij: «Ja rïn kʼa ri utziläj yuqʼunel, y ri jun utziläj yuqʼunel nuyaʼ ri rukʼaslem richin ütz yekʼojeʼ ri rukarneʼl». Rikʼin reʼ nqʼalajin chi ri tzij «alma» nchʼon chi kij kikʼaslem winäq. Chupam ri Mateo 10:39, Juan 15:13 chuqaʼ Hechos 20:10 chi rij kikʼaslem winäq nchʼon ri tzij alma.

We man nayaʼ ta kan atijonïk chi rij ri Ruchʼabʼäl ri Dios xtqʼalajin chawäch chi majun texto nbʼin, chi ri tzij alma nchʼon chi rij jun peraj chi re ri qachʼakul, ri nbʼïx chi man nkäm ta. Pa rukʼexel riʼ ri Biblia nubʼij chi ri alma nkäm (Ezequiel 18:4, 20).

Wakami, tqatzʼetaʼ achike nubʼij ri Biblia chi rij ri «espíritu» o «uxlaʼ». E kʼo yebʼin chi re tzij reʼ junan rikʼin ri alma. Ja kʼa ri Biblia nuqʼalajrisaj chi man e junan ta. Tqatzʼetaʼ achike ruma.

Ri achiʼaʼ ri xetzʼibʼan ri Biblia, xkikusaj ri tzij hebreo rúaj chuqaʼ ri tzij griego pnéuma toq xkajoʼ xkibʼij «espíritu» o «uxlaʼ». Ri Biblia nuqʼalajrisaj achike nkibʼij re tzij reʼ. Achiʼel ri Salmo 104:29 nubʼij chi rij ri Jehová: «Toq nawelesaj ri uxlaʼ [rúaj] kikʼin, rijeʼ xa kan yekäm qa. Y xa kan yetzolöj chik pa poqolaj». Chuqaʼ ri Santiago 2:26 nubʼij chi «jun chʼakulaj ri man kʼo ta chik ri espíritu [pnéuma] rikʼin xa kaminäq chik». Re texto reʼ nkiqʼalajrisaj chi ri tzij «espíritu» ja riʼ ri nyaʼon rukʼaslem ri chʼakul, toq man kʼo ta ri espíritu rikʼin, nkäm qa. Ruma riʼ chupam ri Biblia, ri tzij rúaj man xa xe ta chi rij «espíritu» nchʼon wi, chuqaʼ nchʼon chi rij uchuqʼaʼ; nel chi tzij, ruchuqʼaʼ ri kʼaslem. Ri «espíritu» jun uchuqʼaʼ man tzʼetel ta, ri nyaʼon kikʼaslem ri winäq chuqaʼ ri chikopiʼ.

Ri alma man junan ta rikʼin ri uxlaʼ. Ri chʼakul nrajoʼ ri uxlaʼ richin nsamäj. Reʼ achiʼel jun radio ri nrajoʼ luz richin nqʼajan. Chuqaʼ jun radio ri ütz nakʼwaj pa aqʼaʼ, nqʼajan ruma ruchuqʼaʼ  ri batería ri nyaʼöx qa chupam. Ri radio man xtqʼajan ta we majun ruchuqʼaʼ ta ri batería. Ke riʼ chuqaʼ ri radio ri nkajoʼ luz, man xkeqʼajan ta we man xkeyaʼöx ta rikʼin ri luz. Ke riʼ chuqaʼ ri chʼakul, nrajoʼ ri uxlaʼ o ri uchuqʼaʼ richin kʼo rukʼaslem. Ri uxlaʼ achiʼel ruchuqʼaʼ ri batería, majun nunaʼ ta chuqaʼ majun nchʼobʼon (nnukun) ta. Ruma riʼ ri espíritu man achiʼel ta jun winäq. Toq ri qachʼakul nel el ri uxlaʼ rikʼin nkäm qa. Ri salmista xubʼij chi rij reʼ: «Toq nawelesaj ri uxlaʼ kikʼin, rijeʼ xa kan yekäm qa. Y xa kan yetzolöj chik pa poqolaj».

Ri Eclesiastés 12:7 nubʼij achike nubʼän jun winäq toq nkäm. Ja reʼ nubʼij: «Man kʼa tamestaj ri kʼiytisanel awichin rokik majani nok chik ulew ri achʼakul y rokik chuqaʼ majani ntzolin rikʼin ri Dios ri awanima ri kan richin wi kʼaslem ri yaʼon pe chawe ruma rijaʼ». Ri pa chʼabʼäl hebreo re texto reʼ nukusaj ri tzij rúaj pa rukʼexel ri tzij awanima. Achiʼel ri qetaman pe, ri tzij rúaj nchʼon ri rij ri espíritu o ri uxlaʼ. Ruma riʼ, ja ri espíritu ri xtitzolin chik rikʼin ri Dios, man ja ta ri alma. Ri chʼakul nkäm qa toq nel el ri uxlaʼ rikʼin, ke riʼ nbʼeʼok chik ulew. Ja kʼa ri uxlaʼ, ntzolin chik rikʼin ri Dios, ri achike yayon pe (Job 34:14, 15; Salmo 36:9). Reʼ man nel ta chi tzij, chi kan qitzij nbʼe el chi kaj ri uxlaʼ. Reʼ xa nrajoʼ nubʼij chi toq nkäm jun winäq, pa ruqʼaʼ ri Jehová nkʼojeʼ kan we xtkʼastäj chik o manäq. Nel chi tzij, rijaʼ xtbʼin. Xa xe ri Jehová ntikïr nbʼanon chi ntzolin chik pe ri ruxlaʼ o ruchuqʼaʼ rukʼaslem jun winäq, ke riʼ nkʼastäj chik pe.

¡Kan nukuqubʼaʼ qakʼuʼx nqetamaj chi ri Jehová xtuyaʼ chik kikʼaslem ri kaminaqiʼ! (Juan 5:28, 29). Toq xtapon ri qʼij richin xkekʼasöx, ri Jehová xtubʼän chik jun kʼakʼaʼ kichʼakul. Xtuyaʼ chik kuxlaʼ, ke riʼ xtunaʼ chik pe kiwäch. ¡Jun nimaläj kikotem xtkʼojeʼ!

We nawajoʼ nawetamaj más chi rij ri nubʼij ri Ruchʼabʼäl ri Dios chi rij ri «alma» chuqaʼ «espíritu», ütz nasikʼij ri wuj  ¿Qué nos sucede cuando morimos?, ruxaq 32 kʼa 36. Chuqaʼ ri wuj Razonamiento a partir de las Escrituras, ruxaq 136 kʼa 140. Reʼ kiwuj ruqʼalajrisanelaʼ ri Jehová.