¿ACHIKE noqa pa ajolom rat toq nbʼïx: ri Qʼij toq Xtqʼat Tzij pa kiwiʼ ri winäq? E kʼo yebʼin chi toq xtbʼanatäj riʼ pa millón ri winäq xkeqʼax apo chi kijujunal chuwäch ri Dios richin xtqʼat tzij pa kiwiʼ. Ke riʼ e kʼo ri xkebʼe chi kaj, chuqaʼ e kʼo ri xkebʼe pa qʼaqʼ. Ri Biblia nubʼij chi ri Qʼij riʼ man richin ta xibʼirïk, riʼ jun qʼij richin kikotem chuqaʼ richin xtchojmirisatäj ri kʼaslem.

Ri apóstol Juan ja reʼ nubʼij chi rij ri Qʼij riʼ: «Xintzʼët kʼa jun tzʼuyubʼäl richin qʼatbʼäl tzij ri kan nrepelun, y xintzʼët ri tzʼuyül chupam, ri achoj chuwäch xeʼanimäj wi ri kaj y ri ruwachʼulew y majun bʼey chik xetzʼetetäj. Y xentzʼët ri kaminaqiʼ, chi chʼutiʼq chi nimaʼq e paʼäl apo chuwäch ri tzʼuyül chupam ri tzʼuyubʼäl riʼ. Xejaqalöx kʼa ri wuj, y xjaq chuqaʼ ri jun wuj ri richin kʼaslem. Konojel kʼa re kaminaqiʼ reʼ kan xqʼat tzij pa kiwiʼ, achiʼel ri kibʼanobʼal ri e tzʼibʼatäl chupam ri wuj riʼ» (Apocalipsis 20:11, 12). ¿Achike ri Qʼatöy Tzij kʼo chupam ri tzʼuyubʼäl?

Ri Jehová rijaʼ ri nimaläj Qʼatöy Tzij ri kʼo pa kiwiʼ ri winäq. Stapeʼ ke riʼ rijaʼ ruyaʼon pa ruqʼaʼ jun chik winäq ri qʼatoj tzij. Chupam ri Hechos 17:31, ri apóstol Pablo nubʼij chi ri Dios «ruchaʼon jun qʼij richin toq xtuqʼät tzij pa kiwiʼ konojel winaqiʼ.  Ruchaʼon chik kʼa Jun ri kan choj xtqʼaton tzij». Ri qʼatöy tzij riʼ ja ri Jesucristo, ri xkʼasöx ruma ri Dios (Juan 5:22). ¿Jampeʼ xtitikïr chuqaʼ jampeʼ xtbʼekʼis ri Qʼij toq Xtqʼat Tzij pa kiwiʼ ri winäq?

Ri Apocalipsis nubʼij chi ri Qʼij toq Xtqʼat Tzij, xtitikïr chi rij ri Armagedón, ri xtkʼison ruwäch ruqʼatbʼäl tzij ri Satanás (Apocalipsis 16:14-16, 19:19-20:3). * Chi rij ri Armagedón, xtitzʼapïx ri Satanás chuqaʼ ri rutaqoxelaʼ pa jun qʼequmaläj jül, mil junaʼ. Chupam ri mil junaʼ riʼ ri 144.000 xkeqʼaton tzij junan rikʼin ri Cristo pa kiwiʼ ri winäq (Apocalipsis 14:1-3; 20:1-4; Romanos 8:17). Ruma riʼ ri Qʼij toq Xtqʼat Tzij, man choj ta jun samaj ri nbʼanatäj pa jun qʼij, reʼ mil junaʼ xtukʼwaj.

Chupam ri mil junaʼ riʼ ri Jesucristo «xtuqʼät tzij pa kiwiʼ ri e kʼäs y ri [...] kaminaqiʼ» (2 Timoteo 4:1). Ri tzij «e kʼäs» nchʼon chi kij ri «man e ajlatäl ta» chi winäq xkekʼaseʼ kan pa Armagedón (Apocalipsis 7:9-17). Ri apóstol Juan xerutzʼët chuqaʼ ri «kaminaqiʼ [...] e paʼäl apo chuwäch ri Dios». Ri Jesús xubʼij: ‹Xtapon kʼa ri qʼij chi konojel ri kaminaqiʼ [...] xtkakʼaxaj ri nuchʼabʼäl›, ke riʼ «xkebʼeyakatäj kʼa pe» (Juan 5:28, 29; Hechos 24:15). ¿Achike mak xtitzʼetöx chi kij ri winäq toq xtqʼat tzij pa kiwiʼ?

Ri apóstol Juan xkʼutumär chuwäch chi «xejaqalöx kʼa ri wuj, y xjaq chuqaʼ ri jun wuj ri richin kʼaslem. Konojel kʼa re kaminaqiʼ reʼ kan xqʼat tzij pa kiwiʼ, achiʼel ri kibʼanobʼal ri e tzʼibʼatäl chupam ri wuj riʼ» (Apocalipsis 20:12). ¿Nel chi tzij reʼ chi e tzʼibʼatäl chi kiwäch re wuj reʼ ri xkibʼän ri winäq pa kikʼaslem? Manäq. Ri qʼatoj tzij xtbʼan pa kiwiʼ ri winäq man xtbʼerelesaj ta pe ri xkibʼän pa kikʼaslem. ¿Achike ruma qetaman riʼ? Ruma ri Biblia nubʼij chi toq jun winäq nkäm nkʼis chi riʼ ri rumak (Romanos 6:7, TNM). Ri winäq xkekʼastäj, kʼa riʼ chik xtitikirisäx el rutzʼetik ri achike xtkibʼän pa kikʼaslem. Ruma riʼ ri wuj xejaqalöx nchʼon chi kij ri kʼakʼaʼ taq pixaʼ xkeruyaʼ ri Dios. Richin man xkekäm ta chik ri winäq xkekʼastäj chuqaʼ ri xkekʼaseʼ kan pa Armagedón, nkʼatzin xtkibʼän pa kikʼaslem ri xtubʼij ri Jehová.  Chuqaʼ nkʼatzin xketaqen rikʼin xa bʼa achike chik jun kʼakʼaʼ pixaʼ xtuyaʼ pe ri Jehová chupam ri mil junaʼ. Ke riʼ chi kijujunal ri winäq, xtqʼat tzij pa kiwiʼ rikʼin ri xtkibʼän chupam ri mil junaʼ.

Chupam ri mil junaʼ, pa millón ri winäq kʼa riʼ xtketamaj nabʼey mul achike nrajoʼ ri Dios nkibʼän ri winäq. Ke riʼ xtkibʼän kʼa ri nrajoʼ rijaʼ. Ruma riʼ ronojel Ruwachʼulew xketijöx ri winäq richin nkibʼän ri nqa chuwäch ri Jehová. Ri winäq xtketamaj chi ri Jehová pa ruchojmil nqʼaton tzij (Isaías 26:9). Man rikʼin ta riʼ konojel ta ri winäq xtkibʼän ri nrajoʼ rijaʼ. Ri Isaías 26:10 nubʼij: «Stapeʼ rat nakʼüt ri ajowabʼäl chi kiwäch ri winaqiʼ ri itzel kikʼaslem, rijeʼ kan man xtketamaj ta xkebʼiyin pa ruchojmilal. Stapeʼ kan pa ruchojmilal xtbʼan kikʼin, rijeʼ xa kan nkibʼän itzelal, y xa kan pa rubʼanik nkibʼän chi man nkitzʼët ta chi rat Jehová kan kʼo wi aqʼij». Ri itzel taq winäq riʼ jumul xtchupüx kiwäch chupam ri mil junaʼ.

Toq xtbʼekʼis ri mil junaʼ, ri winäq tzʼaqät chik kibʼanik kibʼanon, achiʼel chik ri Adán y Eva ri pa nabʼey (1 Corintios 15: 24-28). Chi rij reʼ xketojtobʼëx chik ri winäq richin xttzʼetetäj we qitzij nkajoʼ ri Jehová o manäq. Ruma riʼ xtyaʼöx chik qʼij chi re ri Satanás richin xkeruqʼol chik rukʼisibʼäl mul ri winäq (Apocalipsis 20:3, 7-10). Ri man xketzaq ta pa ruqʼaʼ ri Satanás, xtkitzʼët achike rubʼeyal xtbʼanatäj ri nubʼij re texto reʼ: «Ri choj kikʼaslem chuwäch ri Jehová, xtkichinaj ri ruwachʼulew. Y kan xkekʼaseʼ kʼa chi riʼ richin jantapeʼ» (Salmo 37:29). Ruma riʼ ri Qʼij toq Xtqʼat Tzij, xa kikotem xtukʼäm pe pa kiwiʼ ri utziläj taq winäq.