RI Jehová kʼïy retal ri Mesías xuyaʼ chi kiwäch ri profetas ri xetzʼibʼan ri Ruchʼabʼäl. Man kʼayew ta nawetamaj ruwäch ruma bʼin pe achike rubʼanik xtaläx, ri samaj xtubʼän chuqaʼ ri rukamik. Ronojel ri bʼin pe chi rij ri Mesías xbʼanatäj chi rij  ri Jesucristo. Toq natzʼët ri bʼin pe chi rij ri ralaxik chuqaʼ toq rijaʼ kʼa akʼwal na, ronojel xtzʼaqät.

Ri profeta Isaías xubʼij chi ri Mesías xtaläx rikʼin rijatzul ri David (Isaías 9:7). Kan ke riʼ xbʼanatäj, ri Jesús rijatzul ri David (Mateo 1:1, 6-17).

Ri Miqueas, jun chik ru-profeta ri Dios, xubʼij chi xtaläx pa «Belén Efrata» chuqaʼ chi xtbʼeʼok qʼatöy tzij (Miqueas 5:2). Toq  xaläx ri Jesús e kʼo wi kaʼiʼ tinamït Belén kibʼiʼ pa Israel. Jun ri kʼo wi chunaqaj ri Nazaret; ja kʼa ri jun chik, pa Judá, chunaqaj ri Jerusalén. Ri Belén chunaqaj ri Jerusalén, nbʼïx wi Efrata chi re ri rubʼanon kan. Kan chupam kʼa ri tinamït riʼ xaläx ri Jesús, ke riʼ xbʼanatäj ri profecía bʼin pe chi rij (Mateo 2:1).

Ri Biblia rubʼin pe chuqaʼ chi ri Dios xtroyoj (xtusikʼij) ri Rukʼajol richin xtel pe «pa Egipto». Qitzij na wi, ja riʼ xbʼanatäj. Toq kʼa neneʼ ri Jesús xukʼwäx pa Egipto, xtzolin chik pe pa Israel kʼa toq xkäm na ri Herodes, ri qʼatöy tzij. Ke riʼ xbʼanatäj ri profecía bʼin pe (Oseas 11:1; Mateo 2:15).

Chupam ri tzijonem « Profecías ri bʼin pe chi ri Mesías», kʼo jun cholaj rubʼiʼ «Profecías», reʼ yerusikʼij ri textos ri nkibʼij achike xkebʼanatäj chi rij ri Mesías. Keʼajunumaj re textos reʼ kikʼin ri e kʼo chupam ri cholaj «Toq xbʼanatäj». Ke riʼ jebʼël xtqʼalajin chawäch chi ri Ruchʼabʼäl ri Dios kan qitzij wi ri nubʼij.

Toq xkeʼasikʼij re profecías reʼ man tamestaj chi xetzʼibʼäx toq kʼa nrajoʼ na cientos chi junaʼ richin naläx ri Jesús. Ri Jesús xubʼij chi, chi rij rijaʼ xkebʼanatäj «ronojel ri e tzʼibʼatäl kan [...] chupam ri ruchʼabʼäl ri Dios, achiʼel ri e tzʼibʼatäl kan ruma ri Moisés, ri xeqʼalajrisan ruchʼabʼäl ri Dios ojer kan, y ri e tzʼibʼatäl kan chupam ri wuj richin bʼix» (Lucas 24:44). Achiʼel natzʼët chupam ri Biblia, ronojel ri bʼin pe xebʼanatäj.