1, 2. a) ¿Achike nyaʼon rejqalem jun sipanïk? b) ¿Achike ruma ja ri tojbʼäl xuyaʼ ri Jehová ja riʼ ri sipanïk más rejqalem yaʼon chi qe?

¿ACHIKE sipanïk ri nimaläj ruqʼij yaʼon chawe rat? Jun sipanïk man ja ta ri rajïl nyaʼon rejqalem. Ruma riʼ ri jotöl o qajnäq rajïl, man ja ta riʼ ri qitzij rejqalem. Jun sipanïk kʼo rejqalem chuwäch jun winäq ruma ütz xutzʼët o ruma xtkʼatzin chi re.

² Chi re ronojel sipanïk e yaʼon chi qe, kʼo jun ri majun achike ta nilon rejqalem. Ja ri sipanïk ruyaʼon ri Dios chi qe qonojel. Xuyaʼ ri sipanïk riʼ toq xutäq pe ri Rukʼajol richin xkäm quma röj (tasikʼij Mateo 20:28). Chupam re tanaj reʼ xtqetamaj chi ri tojbʼäl xuyaʼ ri Dios, ja riʼ ri sipanïk más rejqalem qakʼulun pa qakʼaslem. Ruma nuyaʼ qitzij kikotem pa qanima chuqaʼ nubʼän chi xtqïl ri nkʼatzin pa qakʼaslem. Richin xukʼüt ri Jehová chi qitzij yojrajoʼ chi qajujunal, xuyaʼ pe ri nimaläj sipanïk chi qe; ri Jesucristo, ri Rukʼajol.

3. ¿Achike ri tojbʼäl, chuqaʼ achike kʼo chi nqʼax chi qawäch richin nqatzʼët chi re sipanïk reʼ kʼo ruqʼij?

³ Ri tojbʼäl ja riʼ ri tojïk xubʼän ri Jehová richin yeruköl ri winäq chuwäch ri mak chuqaʼ ri kamïk (Efesios 1:7). Richin nqʼax chi qawäch achike nukʼüt ri Biblia chi rij reʼ, nkʼatzin nqetamaj achike xbʼanatäj chuwäch ri kotzʼijaläj ulew pa Edén. We nqʼax chi qawäch achike ri xritzelaj ri Adán toq xuqʼäj rutzij ri Dios, xtqʼalajin chi qawäch rajïl ri utzil xubʼän ri Jehová pa qawiʼ.

4. ¿Achike nel chi tzij chi tzʼaqät rubʼanik ri Adán?

⁴ Toq ri Jehová xubʼän ri Adán, xuyaʼ jun nimaläj sipanïk chi re, ja ri tzʼaqät rubʼanik xubʼän chi re. Nel chi tzij chi tzʼaqät ri ruchʼakul chuqaʼ ri runaʼoj. Ke riʼ man nyawäj ta, man nrijïx ta chuqaʼ man nkäm ta. Man xa xe ta riʼ, rijaʼ ütz wi rukʼwan riʼ rikʼin ri Jehová. Ri Biblia nubʼij chi ri Adán «ralkʼwal [wi] ri Dios» (Lucas 3:38, CO). Ruma riʼ ri Dios chuqaʼ ri Adán yetzijon wi chi kiwäch, achiʼel nubʼän jun utziläj tataʼaj rikʼin jun ralkʼwal. Ri Dios xubʼij chi re ri Adán ri nqa chuwäch rijaʼ chuqaʼ xuyaʼ jun utziläj rusamaj richin nkikot pa rukʼaslem (Génesis 1:28-30; 2:16, 17).

5. ¿Achike nrajoʼ nubʼij ri Biblia toq nubʼij chi ri Adán «achiʼel rubʼanik» ri Dios?

⁵ Ri Adán «achiʼel rubʼanik» ri Dios xbʼan chi re (Génesis 1:27). Reʼ man nel ta chi tzij, chi ri Adán achiʼel ruchʼakul chuqaʼ achiʼel ntzuʼun ri Dios. Achiʼel xqetamaj kan chupam ri tanaj 1, ri Jehová xa jun espíritu ri man tzʼetel ta (Juan 4:24). Ri ruchʼakul rijaʼ man achiʼel ta ri qachʼakul röj. Ri Adán achiʼel rubʼanik ri Dios nbʼïx chi re, ruma xbʼan chi re chi ntikïr nukʼäm apo runaʼoj ri Dios. Achiʼel ri ajowabʼäl, ri etamabʼäl, ri chojmilal chuqaʼ más chik naʼoj. Jun chik rubʼanik ri junan ri Adán rikʼin  ri Dios chi rijaʼ ntikïr nuchaʼ achike nrajoʼ nubʼän. Ruma riʼ ri Adán man achiʼel ta jun samajibʼäl, ri xa xe nubʼän ri samaj bʼanon chi re chi nubʼän. Rijaʼ ntikïr wi ruyon nuchaʼ achike nubʼän, nubʼän ri ütz o ri man ütz ta. Xa ta rijaʼ xuyaʼ rikʼin ranima chi man nuqʼäj ta rutzij ri Dios, xkʼojeʼ ta rukʼaslem man kʼisel ta chuwäch ri Kotzʼijaläj Ulew.

6. ¿Achike xukʼäm pe pa ruwiʼ ri Adán ri xuqʼäj rutzij ri Dios, chuqaʼ pa kiwiʼ ri ralkʼwal?

⁶ Toq ri Adán xuqʼäj rutzij ri Dios, man choj ta ke riʼ xkʼis qa, reʼ xukʼäm pe kamïk pa ruwiʼ. Rikʼin ri rumak xritzelaj ri rukʼaslem chuqaʼ ronojel ri urtusanïk yaʼon wi pa ruwiʼ (Génesis 3:17-19). Man xa xe ta kʼa ri rukʼaslem rijaʼ xritzelaj chuqaʼ kikʼaslem ri ralkʼwal. Ri Biblia nubʼij: «Ri mak xa xe kʼa ruma jun achin rubʼiniʼan Adán toq xok kan chuwäch re ruwachʼulew. Y ri mak kan ja riʼ kʼa ri xkʼamon pe ri kamïk. Ruma riʼ kan qonojel kʼa winaqiʼ ri kʼo chi yojkäm, ruma xa kan qonojel oj ajmakiʼ» (Romanos 5:12). Qonojel röj qakʼamon kan rumak ri Adán. Ruma riʼ ri Biblia nubʼij chi junan rikʼin ri Adán, oj ximïl «pa ruqʼaʼ ri mak» chuqaʼ ri kamïk (Romanos 7:14). Ri Adán y Eva majun chik kikolotajik ta ruma rikʼin ronojel kanima xkiqʼäj rutzij ri Dios. ¿Achike xtbʼanatäj qikʼin röj ri oj kalkʼwal kan rijeʼ?

7, 8. ¿Jampeʼ toq nyaʼöx jun tojbʼäl?

⁷ Ri Jehová richin yeruköl ri winäq xuyaʼ jun tojbʼäl. ¿Jampeʼ toq nyaʼöx jun tojbʼäl? Kʼo mul ri winäq nkitöj richin nbʼekikoloʼ pe ri achike na jun ri xeleqʼäx el kikʼin o toq nkiköl jun kachʼalal pa kiqʼaʼ eleqʼomaʼ. Chuqaʼ nyaʼöx jun tojbʼäl toq kʼo jun achike nitzelatäj. Achiʼel toq jun winäq kʼo jun xritzelaj, kʼo chi nutöj ri rajïl ri xritzelaj kan.

⁸ Achiʼel xqetamaj kan, ri Adán xuyaʼ kan jun nimaläj kʼas pa qawiʼ. ¿Achike rubʼeyal xtqatöj ri kʼas richin  xkojkolotäj chuwäch ri mak chuqaʼ ri kamïk? Tqatzʼetaʼ achike tojbʼäl xuyaʼ ri Jehová chuqaʼ achike rubʼeyal nukʼäm pe utzil chi qe.

9. ¿Achike nkʼatzin richin ntojtäj ri mak?

⁹ Ri xitzelatäj, jun kʼaslem ri tzʼaqät rubʼanik. Ruma riʼ rukʼaslem jun winäq aj mak man ntikïr ta nutöj ri kʼaslem tzʼaqät rubʼanik (Salmo 49:7, 8). Nkʼatzin wi jun kʼaslem ri junan rajïl rikʼin ri kʼaslem xitzelatäj. Ri Biblia nubʼij chi ja riʼ wi rubʼeyal pa ruchojmil ntojöx jun mak. Nubʼij chi ri winäq «xtkamisan, nkäm chuqaʼ rijaʼ» (Deuteronomio 19:21). Ruma riʼ, ¿achike nkʼatzin richin ntojtäj ri tzʼaqät kʼaslem xritzelaj ri Adán? Najowatäj wi jun winäq ri tzʼaqät rubʼanik rukʼaslem (1 Timoteo 2:6).

10. ¿Achike rubʼeyal xuyaʼ pe ri Jehová ri tojbʼäl?

¹⁰ ¿Achike rubʼeyal xuyaʼ pe ri Jehová ri tojbʼäl? Xutäq pe jun ralkʼwal ri tzʼaqät rubʼanik rukʼaslem chi Ruwachʼulew. Kan ja ri Jesús, ri Rukʼajol ri más nrajoʼ rijaʼ ri xutäq pe (tasikʼij 1 Juan 4:9, 10). Ri Jesús rikʼin ronojel ranima xuyaʼ kan ri rachoch chi kaj (Filipenses 2:7). Achiʼel xqatzʼët chupam ri jun kan tanaj, ri Jehová xuqʼasaj pe rukʼaslem ri Rukʼajol chi rupam ri María. Ruma ri loqʼoläj ruchuqʼaʼ ri Dios, ri Jesús man xukʼäm ta apo ri mak (Lucas 1:35).

11. ¿Achike rubʼanik xa jun winäq ntojon kimak konojel winäq?

¹¹ ¿Achike rubʼanik xa jun winäq ntojon kimak konojel ri winäq? Chuqaʼ, ¿achike rubʼanik xok pe ri mak pa qawiʼ qonojel? Toqa pa qajolom chi toq ri Adán xmakun, xritzelaj ri kʼaslem tzʼaqät rubʼanik. Ke riʼ toq xekʼojeʼ ri ralkʼwal, man e tzʼaqät ta chik xeʼel. Xa xe chik ri mak chuqaʼ ri kamïk xuyaʼ kan pa kiwiʼ. Ri Jesús, ri «jun chik  Adán», tzʼaqät wi rubʼanik chuqaʼ majun bʼey xmakun ta (1 Corintios 15:45). Ri Jesús xkʼojeʼ kan pa rukʼexel ri Adán richin xojruköl. Rijaʼ xubʼän ronojel ri xubʼij ri Rutataʼ chuqaʼ xuyaʼ ri chojmiläj rukʼaslem pa kamïk. Ke riʼ ri Jesús xutöj ri nkʼatzin chi rij rumak ri Adán chuqaʼ xeruköl ri ralkʼwal chuwäch ri mak chuqaʼ ri kamïk (Romanos 5:19; 1 Corintios 15:21, 22).

12. Ri Jesús xuköchʼ ronojel ri xbʼan chi re, ¿achike xukʼüt rikʼin riʼ?

¹² Ri Biblia nutzijoj ronojel ri xuköchʼ ri Jesús toq xa nkamisäx yan. Kʼïy mul xchʼay chuqaʼ xbʼajïx kʼa chuwäch jun cheʼ. Ke riʼ kan itzel rubʼanik xkäm (Juan 19:1, 16-18, 30; chupam ri tzijonem, «¿La ütz nqakusaj ri cruz?»). ¿Achike ruma janila tijoj poqonal xuqʼasaj? Chupam ri jun chik tanaj xtqetamaj chi ri Satanás rubʼin chi majun winäq ta ntikïr nubʼän ri nrajoʼ ri Jehová toq nyaʼöx tijoj poqonal pa ruwiʼ. Rikʼin ri xubʼän ri Jesús, ri xuköchʼ ronojel ri xbʼan chi re, xukʼüt chuwäch ri Satanás chi man qitzij ta ri nubʼij. Xukʼüt chi xa bʼa achike na ri kʼayewal nuyaʼ pe ri Satanás pa ruwiʼ jun winäq tzʼaqät rubʼanik, ntikïr nubʼän ri nqa chuwäch ri Jehová. ¡Ri Jehová kan xkikot na wi toq xutzʼët chi ri Rukʼajol man xtzaq ta! (Proverbios 27:11).

13. ¿Achike rubʼanik xyaʼöx ri tojbʼäl?

¹³ ¿Achike rubʼanik xyaʼöx ri tojbʼäl? Ri qʼij 14 chi re ri nisán, jun ikʼ judío, ri junaʼ 33, ri Dios xuyaʼ qʼij chi ri itzel taq winäq xkikamisaj ri Rukʼajol, ri tzʼaqät rubʼanik chuqaʼ majun rumak ta. Ja riʼ rubʼanik ri «Jesucristo xa jun bʼey [...] xuyaʼ ri ruchʼakul pa kamïk richin [...] ronojel tiempo» (Hebreos 10:10, CO). Oxiʼ qʼij tkamisäx ri Jesús, ri Jehová xukʼasoj achiʼel jun espíritu. Toq xbʼe chi kaj, ri Jesús xuyaʼ apo chuwäch ri Rutataʼ ri rajïl rukʼaslem xuyaʼ pa kamïk ruma kikolik ri ralkʼwal ri Adán (Hebreos 9:24). Ri Jehová xqa chuwäch ri rajïl rukʼaslem  ri Jesús. Ke riʼ ri Jesús rikʼin tzʼaqät rubʼanik rukʼaslem xeruköl ri winäq chuwäch ri mak chuqaʼ ri kamïk (tasikʼij Romanos 3:23, 24).

14, 15. ¿Achike kʼo chi nqabʼän richin yekuyutäj ri qamak?

¹⁴ Ruma xyaʼöx ri tojbʼäl, wakami yojtikïr nqïl urtusanïk stapeʼ oj ajmakiʼ. Tqatzʼetaʼ jujun chi ke ri urtusanïk ri yojtikïr nqïl wakami chuqaʼ chi qawäch apo ruma ri nimaläj rusipanïk ri Dios.

¹⁵ Ri kuyutajïk mak. Ruma xa oj ajmak, kʼayew nubʼän chi qawäch nqabʼän ri ütz pa qakʼaslem. Qonojel yojmakun kikʼin ri nqabʼij o rikʼin ri nqabʼän. Ja kʼa ruma ri Jesús xuyaʼ rukʼaslem pa kamïk, röj yojtikïr nqïl rukuyutajik ri qamak (Colosenses 1:13, 14). Richin nkuyutäj ri qamak, nkʼatzin rikʼin ronojel qanima ntzolin pe qakʼuʼx. Chuqaʼ kʼo chi nqaqasaj qiʼ toq nqabʼij chi re ri Jehová chi tukuyuʼ ri qamak chuqaʼ nqakuqubʼaʼ qakʼuʼx chi rij ri xubʼän ri Jesús (tasikʼij 1 Juan 1:8, 9).

16. Stapeʼ oj ajmakiʼ, ¿achike ruma yojtikïr nqayaʼ ruqʼij ri Dios chuqaʼ achike rubʼanik yojrutoʼ ri chʼajchʼöj qanima?

¹⁶ Chʼajchʼöj qanima nqanaʼ chuwäch ri Dios. Toq nqanaʼ chi kʼo qamak qabʼanon, majun kiʼ ta qakʼuʼx chuqaʼ achiʼel majun qaqʼij ta nqanaʼ. Ruma ri Jesús xuyaʼ rukʼaslem quma röj, ri Jehová nuküy qamak chuqaʼ nubʼän chi stapeʼ oj ajmakiʼ yojtikïr nqayaʼ ruqʼij (Hebreos 9:13, 14). Ke riʼ kiʼ qakʼuʼx nqabʼij ronojel chi re ri Dios toq yojchʼon rikʼin (Hebreos 4:14-16). Chuqaʼ toq nqanaʼ chi ri qanima chʼajchʼöj chuwäch ri Jehová yojkikot pa qakʼaslem.

17. ¿Achike urtusanïk xkeqakʼül ruma ri Jesús xkäm quma röj?

¹⁷ Ri kʼaslem man kʼisel ta chuwäch jun kotzʼijaläj  ulew. Ri Romanos 6:23, chupam ri Traducción del Nuevo Mundo, nubʼij chi ri «tojïk nuyaʼ ri mak ja ri kamïk». Re texto reʼ nubʼij chuqaʼ: «Ja kʼa ri sipanïk nuyaʼ ri Dios; ja ri kʼaslem man kʼisel ta, ruma ri Cristo Jesús ri Qajaw». Chupam ri tanaj 3, xqetamaj kʼïy urtusanïk ri xkekʼojeʼ chuwäch ri Kotzʼijaläj Ulew chi qawäch apo (Apocalipsis 21:3, 4). Ronojel ri urtusanïk riʼ chuqaʼ ri kʼaslem man kʼisel ta, qitzij xkebʼanatäj ruma ri Jesús xkäm quma röj. Richin xkeqïl apo riʼ, kʼo chi nqakʼüt chi nqamatyoxij ri tojbʼäl xuyaʼ ri Dios.

18. ¿Achike ruma kʼo chi nqamatyoxij chi re ri Jehová ri tojbʼäl?

¹⁸ ¿Achike ruma kʼo chi nqamatyoxij chi re ri Jehová ri tojbʼäl xuyaʼ quma röj? Jun sipanïk kʼo más ruqʼij toq ri winäq nyaʼon chawe eqal na nukanoj chuqaʼ nuyaʼ ri rajïl xkʼutüx chi re. Chuqaʼ ja riʼ rubʼanik nukʼüt chi qitzij yarajoʼ. Ri tojbʼäl xuyaʼ ri Dios ja riʼ ri más ruqʼij chuwäch  ronojel sipanïk, ruma rijaʼ xuyaʼ ri más nrajoʼ. «Ri Dios kan janila wi kʼa yerajoʼ [...] ri winaqiʼ, y ruma riʼ kan xutäq kʼa pe ri juney rukʼajol», nubʼij ri Juan 3:16. Rikʼin ri tojbʼäl, ri Dios xukʼüt chi kan qitzij yojrajoʼ. Chuqaʼ ri Jesús yojrajoʼ ruma riʼ rikʼin ronojel ranima xuyaʼ rukʼaslem pa kamïk quma röj (tasikʼij Juan 15:13). Ri tojbʼäl nukʼüt chi qawäch chi ri Jehová chuqaʼ ri Jesús yojkajoʼ chi qajujunal (Gálatas 2:20).

19, 20. ¿Achike rubʼeyal nakʼüt rat chi namatyoxij ri tojbʼäl?

¹⁹ ¿Achike rubʼeyal nakʼüt chi namatyoxij ri tojbʼäl xuyaʼ ri Dios? Nabʼey, tawetamaj ruwäch ri Jehová, ri xyaʼon ri sipanïk (Juan 17:3). Richin nawetamaj ruwäch ri Jehová, ütz natijoj awiʼ chi rij ri Biblia rikʼin re wuj reʼ. Toq más nawetamaj ruwäch, más xtawajoʼ rijaʼ chuqaʼ más nawajoʼ nabʼän ri nqa chuwäch (1 Juan 5:3).

²⁰ Takuqubʼaʼ akʼuʼx chi rij ri tojbʼäl. Ri Biblia nubʼij chi ri nukuqubʼaʼ rukʼuʼx chi rij ri Jesús, kʼo rukʼaslem man kʼisel ta (Juan 3:36). ¿Achike rubʼanik nqabʼän riʼ? Man xa xe ta nqabʼij chi kʼo qakuqubʼabʼäl kʼuʼx. Ri Santiago 2:26 nubʼij chi toq ri «kuqubʼabʼäl kʼuʼx [...] man rukʼwan ta utziläj taq bʼanobʼäl» xa kaminäq. Ruma riʼ ri qitzij kuqubʼabʼäl kʼuʼx nqʼalajin rikʼin ri samaj yeqabʼän. Y jun rubʼeyal nqakʼüt, ja ri nqabʼän pa qakʼaslem ri xubʼij chuqaʼ ri xubʼän ri Jesús (Juan 13:15).

21, 22. a) ¿Achike ruma nkʼatzin yojbʼe chupam ri molojriʼïl nbʼan ronojel junaʼ chi rij ri Loqʼoläj Waʼin? b) ¿Achike xtqatzʼët apo chupam ri tanaj 6 chuqaʼ 7?

²¹ Katapon chupam ri molojriʼïl richin Runataxik (Rukʼuxlanik) rukamik ri Cristo. Ri aqʼaʼ 14 chi re ri ikʼ nisán, junaʼ 33, ri Jesús xubʼij kan chi tqanimaqʼijuj ri rukamik. Ri Biblia «loqʼoläj waʼin» nubʼij chi re (1 Corintios 11:20, CO; Mateo 26:26-28). Chuqaʼ Runataxik (Rukʼuxlanik) rukamik ri Cristo nbʼïx chi re. Ri Jesús xuyaʼ kan  reʼ richin chi ri apóstoles chuqaʼ röj ri runimanelaʼ man nqamestaj ta ri xubʼän rijaʼ quma röj. Ruma riʼ xubʼij: «Tibʼanaʼ kʼa reʼ richin natabʼäl wichin» (Lucas 22:19, CO). Toq yojapon chupam ri molojriʼïl richin Runataxik rukamik ri Jesús, nqakʼüt chi nqamatyoxij ri tojbʼäl chuqaʼ man nqamestaj ta chi ri Jehová chuqaʼ ri Jesús qitzij yojkajoʼ. *

²² Ri tojbʼäl xuyaʼ ri Jehová jun nimaläj sipanïk ri majun achoj rikʼin junumatäl wi (2 Corintios 9:14, 15). Re sipanïk reʼ man xa xe ta pa qawiʼ röj ri oj kʼäs wakami nukʼäm pe utzil, chuqaʼ xtukʼäm pe utzil pa kiwiʼ ri e kaminäq el, achiʼel xtqatzʼët chupam ri tanaj 6 chuqaʼ 7.