1-3. ¿Achike kʼutunïk yekibʼän ri winäq chi rij ri kamïk, chuqaʼ achike nkibʼij e kʼïy religiones chi rij reʼ?

RE KʼUTUNÏK reʼ kʼo kejqalem chuqaʼ ojer riʼ e kibʼanon pe ri winäq. Xa bʼa achike na qabʼanik chuqaʼ qatinamit ütz nqetamaj kiqʼalajrisaxik re kʼutunïk reʼ.

² Chupam kan ri jun tanaj, xqetamaj chi ri rukamik ri Jesucristo xujäq ri bʼey richin nqïl ri kʼaslem man kʼisel ta. Chuqaʼ xqetamaj chi ri Biblia nubʼij chi «xtkʼis [...] ri kamïk» (Apocalipsis 21:4). Ja kʼa wakami, kʼa yojkäm na. Achiʼel xubʼij ri Salomón, ri jun qʼatöy tzij, ri «e kʼäs [...] ketaman chi kʼo jun qʼij yebʼekäm» (Eclesiastés 9:5). Stapeʼ ke riʼ, röj nqajoʼ nqetamaj ruqʼalajrisaxik re kʼutunïk reʼ: «¿Achike nqabʼän toq yojkäm?».

³ Toq nkäm jun qachʼalal rikʼin bʼaʼ nqabʼij: «¿Akuchi (apeʼ) kʼo wakami? ¿Nutïj poqonal? ¿La yojrutzʼët pe? ¿La yojtikïr nqatoʼ? ¿La kʼo jun qʼij xtqatzʼët chik?». Ri religiones jujun wi nkibʼij chi kij re kʼutunïk reʼ. E kʼo yebʼin chi ri utziläj taq winäq yebʼe chi kaj; ja kʼa ri e itzel, yebʼe pa qʼaqʼ. E kʼo chuqaʼ yebʼin chi yojok espíritus richin yojapon kikʼin ri qatiʼt qamamaʼ ri e kaminäq el. E kʼo chik jujun nkibʼij chi toq yojkäm, ja riʼ toq nqajäch ri qamak, ke riʼ yojaläx pa jun chik chʼakul.

4. ¿Achike naʼoj ri junan bʼaʼ nkibʼij ri religiones chi rij ri kamïk?

 ⁴ Stapeʼ ri religiones jujun wi nkibʼij chi rij ri kamïk, kan konojel bʼaʼ nkibʼij re naʼoj reʼ: jun peraj chi re ri qachʼakul kʼa nkʼaseʼ na kan. E kʼïy religiones, ri xekʼojeʼ ojer kan chuqaʼ ri e kʼo wakami, nkibʼij chi ri qakʼaslem man nkʼis ta. Ke riʼ kʼa yojtzuʼun na, kʼa nqakʼaxaj na chuqaʼ kʼa yojchʼobʼon (yojnukun) na. ¿Achike rubʼanik riʼ? Röj winäq yojtikïr nqakʼaxaj, yojtzuʼun chuqaʼ nqakusaj ri qanaʼoj ruma ri qajolom nsamäj. Toq yojkäm, ri qajolom man nsamäj ta chik, majun chik achike ta ntikïr nubʼän.

5, 6. ¿Achike kibʼanon ri kaminaqiʼ nubʼij ri Biblia?

⁵ Ri Jehová retaman achike nqabʼän toq yojkäm. Rijaʼ etamayon ri qitzij, ruma riʼ chupam ri Ruchʼabʼäl nuqʼalajrisaj achike kibʼanon ri kaminaqiʼ. Nubʼij chi toq jun winäq nkäm, nkʼis rukʼaslem chi riʼ. Ri kamïk man junan ta rikʼin ri kʼaslem, ruma riʼ ri kaminaqiʼ man yetzuʼun ta, man nkakʼaxaj ta chuqaʼ man yechʼobʼon ta chik. Toq yojkäm majun chik achike ta chi re ri qachʼakul nkʼaseʼ kan, ri qanima nkäm chuqaʼ. *

⁶ Toq ri Salomón xubʼij chi ri winäq ketaman chi kʼo jun qʼij xkebʼekäm, xubʼij chuqaʼ chi ri «kaminaqiʼ man yechʼobʼon ta chik». Nel chi tzij chi ri kaminaqiʼ man yeʼajowan ta chik chuqaʼ man yeʼitzelan ta chik. Kan nbʼanatäj achiʼel xubʼij ri Salomón chi chupam ri jül akuchi (apeʼ) yemuqüx kan ri kaminaqiʼ «manäq chik samaj, manäq chik chʼobʼonïk, manäq chik retamaxik más etamabʼäl» (tasikʼij Eclesiastés 9:5, 6, 10). Ri Salmo 146:4 nubʼij chuqaʼ chi toq yekäm ri winäq, «nkäm [...] ronojel ri kichʼobʼonik», ke riʼ nkʼis ronojel. Qitzij na wi, röj winäq xa yojkäm. Toq nqïl  ri kamïk, majun achike chi re ri qachʼakul nkʼaseʼ kan. Ri qakʼaslem choj achiʼel ri ruxaq qʼaqʼ nel pa ruwiʼ jun candela. Toq nchup qa ri qʼaqʼ, majun akuchi ta nbʼe wi, choj nchup qa chi riʼ.

7. ¿Achoj rikʼin xujunumaj ri Jesús ri kamïk?

⁷ Ri Jesucristo xubʼij achike kibʼanon ri kaminaqiʼ toq xchʼon chi rij rukamik ri Lázaro. Rijaʼ xubʼij chi ke ri rutzeqelibʼey: «Ri Lázaro ri qachibʼil nwär». Rijeʼ xqʼax chi kiwäch chi ri Lázaro kan qitzij wi nwär o xa nuxlan ruma jun yabʼil. Y man xqʼax ta chi kiwäch ri xrajoʼ xubʼij ri Jesús, ruma riʼ xuqʼalajrisaj chik chi kiwäch toq xubʼij: «Ri Lázaro xkäm» (tasikʼij Juan 11:11-14). Ri Jesús xujunumaj ri kamïk rikʼin ri waran. Toq xkäm ri Lázaro man xbʼe ta chi kaj chuqaʼ man xbʼe ta pa qʼaqʼ. Majun xukʼül ta riʼ kikʼin ri ángeles nixta kikʼin ri ratiʼt rumamaʼ, ri e kaminäq el. Chuqaʼ man xaläx ta chupam jun chik chʼakul. Rijaʼ xa xuxlan, achiʼel ta xkäm chi waran, xa xe man xachïkʼ ta. E kʼo más textos nkibʼij chuqaʼ chi ri kamïk achiʼel jun nimaläj waran. Achiʼel toq xkamisäx ri Esteban chi abʼäj, ri Biblia nubʼij chi «xwär qa» (Hechos 7:60, CR). Chuqaʼ toq ri Jesús xukʼasoj rumiʼal ri Jairo xubʼij: «Man kaminäq ta, xa choj nwär» (Lucas 8:52, 53, CR).

8. ¿Achike ruma qetaman chi ri Dios man nrajoʼ ta yojkäm?

⁸ ¿Xojrubʼän ri Dios richin yojkäm? Manäq. Ri Jehová xerubʼän ri winäq richin man yekäm ta. Achiʼel xqetamaj yan kan, ri Dios xeruyaʼ ri nabʼey taq winäq chuwäch jun kotzʼijaläj ulew chuqaʼ chi man yeyawäj ta. Rijaʼ xrajoʼ  chi ütz ta xebʼe pa kikʼaslem. Jun utziläj tataʼaj kan majun bʼey wi xtrajoʼ ta chi ri ralkʼwal yeyawäj, yerijïx chuqaʼ yekäm. Ke riʼ chuqaʼ ri Jehová, rijaʼ kan yerajoʼ wi ri ralkʼwal ruma riʼ nrajoʼ chi nkʼojeʼ kikʼaslem man kʼisel ta chi Ruwachʼulew. Ri Biblia nubʼij chi ri Dios «ajun ri ruqʼijul man kʼisel ta ruyaʼon pa kanima» ri winäq (Eclesiastés 3:11, TNM). Qitzij na wi, ri Dios ruyaʼon pa qanima chi man nqajoʼ ta yojkäm. Y rukanon chik rubʼanik richin nuyaʼ chi qe ri nqajoʼ.

9. ¿Achike pixaʼ xuyaʼ ri Dios pa kiwiʼ ri Adán, chuqaʼ achike ruma xa xetikïr ta xkibʼän ri xbʼïx chi ke?

⁹ ¿Achike ruma yekäm ri winäq? Richin nqetamaj, nkʼatzin nqʼax chi qawäch achike xbʼanatäj toq kʼa xa xe wi jun kʼulaj winäq e kʼo chi Ruwachʼulew. Ri Biblia nubʼij chi ri Dios xubʼän chi xewachin pe «ronojel ruwäch cheʼ ri kan e rayixel y kan e tijel» chuwäch ri kotzʼijaläj ulew pa Edén (Génesis 2:9). Ja kʼa, kʼo jun pixaʼ xyaʼöx pa kiwiʼ. Ri Dios xubʼij chi re ri Adán: «Ronojel ruwäch ri cheʼ [...] ütz natïj ri kiwäch. Xa xe ri cheʼ ri nyaʼon etamabʼäl richin ri ütz y ri itzel man tatïj, ruma ri qʼij toq xtatïj, kan xkakäm» (Génesis 2:16, 17). Re jun pixaʼ reʼ man kʼayew ta richin nubʼän ri Adán y Eva, ruma chuwäch ri kotzʼijaläj ulew e kʼo wi más cheʼ richin nkitïj (nkikʼüx). Xa ta xkibʼän ri xbʼïx chi ke, rijeʼ xkikʼüt ta chi nkimatyoxij ronojel ri ruyaʼon ri Dios chi ke, ajun ri tzʼaqät kibʼanik. Chuqaʼ xkikʼüt ta chi nkiyaʼ rejqalem ri ruqʼatbʼäl tzij ri Dios chuqaʼ chi nkinimaj rutzij.

10, 11. a) ¿Achike xubʼän ri Satanás richin chi ri nabʼey taq winäq xkiqʼäj rutzij ri Dios? b) ¿Achike ruma jun nimaläj mak ri xkibʼän ri Adán y Eva?

¹⁰ Ja kʼa ri nabʼey qateʼ qatataʼ xa xkiqʼäj rutzij ri Jehová. Ri Satanás xukusaj jun kumätz richin xchʼon rikʼin ri Eva. Xubʼij kʼa chi re: «¿Kan qitzij chi ri Dios xubʼij chiwe chi man titïj kiwäch re cheʼ [...] e kʼo waweʼ?». Ri Eva xubʼij: «Ri kiwäch ronojel cheʼ ri e kʼo waweʼ kan jachon wi pa qaqʼaʼ richin nqatïj. Ja kʼa [...] ruwäch re jun cheʼ re kʼo pa runikʼajal re qejoj, xubʼij kan ri Dios [...] chi man tqatïj, ni man tqachäp [tqatzʼäm], ruma we xtqatïj kan xkojkäm» (Génesis 3:1-3).

¹¹ Ri Satanás xubʼij: «Man yixkäm ta. Ruma ri Dios retaman chi ri qʼij toq xtitïj, kan xtjaqatäj kʼa ri runaqʼ iwäch y kan xtiwetamaj kʼa ri ütz y ri itzel y kan xkixok kʼa achiʼel ri Dios» (Génesis 3:4, 5). Ri Satanás nrajoʼ wi chi ri Eva  nunimaj chi más ütz nbʼe pa rukʼaslem we nutïj ruwäch ri cheʼ. Ke riʼ xtitikïr ruyon xtuchaʼ we nubʼän ri ütz o ri man ütz ta. Nel chi tzij chi ntikïr nubʼän ri nrajoʼ rijaʼ. Ri Satanás xuqʼabʼaj chuqaʼ tzij chi rij ri Jehová toq xubʼij chi rijaʼ, man xubʼij ta ri qitzij chi rij ri xtbʼanatäj we xtkitïj ruwäch ri cheʼ. Ri Eva xunimaj ri xubʼij ri Satanás, ruma riʼ xutïj ruwäch ri cheʼ. Chi rij riʼ xuyaʼ apo chi re ri rachijil, ke riʼ xutïj chuqaʼ rijaʼ. Ri xkibʼän rijeʼ man ruma ta manäq ketamabʼal. Rijeʼ kan ketaman wi chi ri xkibʼän, ja ri xbʼïx chi ke chi man tkibʼän. Toq xkitïj ruwäch ri cheʼ, rijeʼ ketaman chi xkiqʼäj jun pixaʼ ri man kʼayew ta nabʼän pa akʼaslem. Ke riʼ xkimalij kan ri Dios chuqaʼ ri ruqʼatbʼäl tzij. ¡Jun nimaläj xajan ri xkibʼän chuwäch ri Dios!

12. ¿Achike xunaʼ ri Jehová toq ri Adán y ri Eva xkiqʼäj rutzij?

 ¹² Reʼ achiʼel jun akʼwal ri xakʼiytisaj pe y wakami man nunimaj ta chik atzij, man nuyaʼ ta aqʼij chuqaʼ man yarajoʼ ta chik. ¿Pejaʼ nqʼaxon awanima ri ke riʼ nubʼän chawe? Ke riʼ na wi xunaʼ ri Jehová chuqaʼ toq ri Adán y Eva xkiqʼäj rutzij.

13. ¿Achike xrajoʼ xubʼij ri Jehová chi ri Adán xtok chik ulew?

¹³ Ri Adán y Eva xkiqʼäj rutzij ri Jehová, ruma riʼ majun chik ruma xyaʼöx ri kʼaslem man kʼisel ta chi ke. Ke riʼ xebʼekäm achiʼel xubʼij ri Jehová chi ke. Rijeʼ xbʼekʼis kiwäch, man xeʼok ta espíritus richin xebʼekʼojeʼ jukʼan chik. Toq ri Adán xmakun yan, ri Jehová xubʼij chi re: «Xkatok chik jun bʼey ulew ri achoj rikʼin xatinbʼän wi; ruma kan at ulew wi» (Génesis 3:19). Ri Jehová rikʼin wi ulew xubʼän ri Adán (Génesis 2:7). Toq kʼa majani tubʼän, ri Adán man kʼo ta wi. Ruma riʼ toq ri Jehová xubʼij chi re chi xtok chik ulew, xrajoʼ xubʼij chi xtkʼis ruwäch. Y toq ri Adán xkäm, xok chik poqolaj ri majun rukʼaslem ta.

14. ¿Achike ruma yojkäm?

¹⁴ Xa man ta ri Adán y Eva xemakun, kʼa e kʼäs ta wakami. Rijeʼ xekäm ruma xkiqʼäj rutzij ri Jehová. Ruma röj oj ralkʼwal kan ri Adán, qonojel yojkäm. Rijaʼ xuyaʼ kan ri mak chuqaʼ ri kamïk pa qawiʼ (tasikʼij Romanos 5:12). Ri mak riʼ achiʼel jun itzel yabʼil ri qakʼamon kan, ri majun achike ta ntikïr nuköl riʼ chuwäch. Re yabʼil reʼ yojrukʼwaj pa kamïk (1 Corintios 15:26). Ruma riʼ, tqamatyoxij chi ri Jehová xutäq pe ri Rukʼajol richin xojruköl chuwäch ri mak chuqaʼ ri kamïk.

15. ¿Achike ruma nukuqubʼaʼ qakʼuʼx nqetamaj ri qitzij chi rij ri kamïk?

¹⁵ Janila nukuqubʼaʼ qakʼuʼx ri nubʼij ri Biblia chi rij ri kibʼanon ri kaminaqiʼ. Achiʼel xqetamaj kan, rijeʼ majun e  kʼo ta pa tijoj poqonal. Man tqaxibʼij qiʼ chi kiwäch, rijeʼ majun itzelal ta nkibʼän chi qe. Majun kitoʼik ta nkajoʼ chuqaʼ man yetikïr ta yojkitoʼ. Majun chik yetikïr ta yechʼon, ruma riʼ röj man yojtikïr ta chuqaʼ yojchʼon kikʼin. E kʼïy ukʼwäy taq bʼey pa taq religiones nkibʼij chi yetikïr yekitoʼ ri kaminaqiʼ. Y kʼïy winäq kan nkinimaj ri nkibʼij, ruma riʼ nkiyaʼ apo pwäq chi ke. Toq nqetamaj ri qitzij chi rij ri kamïk yojkolotäj chi kiwäch ri tzʼukun taq tzij riʼ.

16. ¿Achike tzʼukun taq tzij nkikʼüt e kʼïy religiones chi kij ri kaminaqiʼ?

¹⁶ ¿La nukʼüt a-religión rat ri nubʼij ri Biblia chi kij ri kaminaqiʼ? Man konojel ta nkikʼüt ri qitzij chi rij reʼ. ¿Achike ruma? Ruma ri Satanás yerukusaj ri religiones ri man e qitzij ta, richin nkikʼüt chi toq jun winäq nkäm nok jun espíritu, ke riʼ nbʼekʼojeʼ jukʼan chik. Ri Satanás nukusaj re tzʼukun tzij reʼ chuqaʼ más naʼoj ri man e qitzij ta richin chi ri winäq man nketamaj ta ruwäch ri Jehová. ¿Achike rubʼeyal nubʼän reʼ?

17. ¿Achike ruma nchʼon itzel chi rij ri Jehová ri naʼoj ri nbʼïx chi ri winäq yebʼe pa qʼaqʼ?

¹⁷ Achiʼel xqatzʼët yan kan, e kʼïy religiones nkibʼij chi ri itzel taq winäq xkebʼe pa qʼaqʼ. Ri naʼoj riʼ nchʼon itzel chi rij ri Jehová. Rijaʼ yerajoʼ ri winäq y majun bʼey xkeruyaʼ ta pa qʼaqʼ (tasikʼij 1 Juan 4:8). ¿Achike kami nabʼij rat chi rij jun tataʼaj ri nujuʼ ruqʼaʼ jun ralkʼwal pa qʼaqʼ ruma man nunimaj ta rutzij? ¿Utziläj winäq xtabʼij chi re ri tataʼaj riʼ? ¿Xtawajoʼ kami xtawetamaj ruwäch? Manäq na wi. Riʼ itzel achin xtabʼij chi re. Ja riʼ nrajoʼ ri Satanás nqabʼij chi rij ri Jehová. Nrajoʼ chi röj nqanimaj chi ri Jehová yeruyaʼ pa qʼaqʼ ri winäq tbʼe qʼij tbʼe säq.

18. ¿Achike ruma man ütz ta nqaxibʼij qiʼ chi kiwäch ri kaminaqiʼ?

¹⁸ Ri Satanás yerukusaj chuqaʼ ri religiones richin nkikʼüt chi ri kaminaqiʼ yeʼok espíritus richin chi ri winäq  nkiyaʼ kiqʼij. Nbʼïx chi ri espíritus xtkibʼän utzil chawe o xkatkitzelaj. Ri winäq ri yeniman ri naʼoj riʼ nkixibʼij kiʼ chi kiwäch ri kaminaqiʼ o nkiyaʼ kiqʼij. Ja kʼa ri Biblia nubʼij chi ri kaminaqiʼ xa yewär y majun achike ta yetikïr nkibʼän. Chuqaʼ nubʼij chi xa xe ri Jehová tqayaʼ ruqʼij, ruma ja rijaʼ ri oj bʼanayon chuqaʼ ruyaʼon ronojel chi qe (Apocalipsis 4:11).

19. ¿Achike chik jun naʼoj xtqʼax chi qawäch toq nqetamaj ri qitzij chi rij ri kamïk?

¹⁹ Toq nqetamaj ri qitzij chi kij ri kaminaqiʼ nqaköl qiʼ chi kiwäch ri tzʼukun taq tzij yekikʼüt ri religiones. Chuqaʼ man kʼayew ta chik yeqʼax chi qawäch ri más naʼoj yerukʼüt ri Biblia. Achiʼel ri kʼaslem nusüj ri Dios chuwäch ri Kotzʼijaläj Ulew. Re naʼoj reʼ kan qitzij nubʼän chi qawäch toq nqetamaj chi ri kaminaqiʼ man yeʼok ta espíritus jukʼan chik.

20. ¿Achike kʼutunïk xtqetamaj chupam ri jun chik tanaj?

²⁰ Ojer yan riʼ, jun rusamajel ri Dios rubʼiʼ Job xubʼän re kʼutunïk reʼ: «We jun winäq nkäm, ¿ntikïr nkʼaseʼ chik jun mul?» (Job 14:14, TNM). Ri Job xrajoʼ xubʼij: ¿Kʼo kami rubʼanik nyaʼöx chik kikʼaslem ri winäq e kaminäq el? Ri nubʼij ri Biblia chi rij reʼ nukuqubʼaʼ qakʼuʼx, reʼ xtqetamaj chupam ri jun chik tanaj.