1, 2. ¿Achike ruma ütz yeqabʼän kʼutunïk?

¿ATZʼETON rat chi ri akʼwalaʼ ruyon kʼutunïk yekibʼän? E kʼïy kan xa xe toq nketamaj yechʼon pe, ja riʼ yekibʼän kʼutunïk. Yatkitzʼët (yatkitzuʼ) nkibʼij chawe: «¿Achike ruma xar ri kaj? ¿Achike ruma e kʼo ri chʼumil? o ¿Achike ruma yebʼixan ri aj xikʼ taq chiköp?». Stapeʼ nqajoʼ nqaqʼalajrisaj chi kiwäch, kʼo mul man qetaman ta chik achike nqabʼij apo. Chuqaʼ kʼo mul, stapeʼ ütz ri xqabʼij apo, nkibʼij chik pe: «¿Achike ruma?».

² Man xa xe ta kʼa ri akʼwalaʼ yebʼanon kʼutunïk. Toq röj winäq yojkʼïy el, kʼa yeqabʼän na kʼutunïk. Rikʼin bʼaʼ richin nqetamaj achike rubʼanik yojapon pa jun tinamït, richin man nqajuʼ ta qiʼ pa jun kʼayewal o rikʼin bʼaʼ xa xe richin nqajoʼ nqetamaj ri xbʼanatäj. Stapeʼ kan qichin wi yeqabʼän kʼutunïk, e kʼïy winäq man nkikanoj ta chik kiqʼalajrisaxik ri más kʼutunïk. Ri kʼutunïk ri más yemalïx kan, ja ri kʼo kejqalem.

3. ¿Achike ruma e kʼïy winäq man nkibʼän ta chik kʼutunïk ri más kejqalem?

 ³ Tatzʼetaʼ ri kʼutunïk kʼo pe chuwäch re wuj reʼ, ri e kʼo chupam ri nabʼey taq ruxaq chuqaʼ ri e kʼo toq ntikïr qa re tanaj reʼ. Ja reʼ jujun chi ke ri kʼutunïk kan kʼo kejqalem chuqaʼ ri ütz yeqabʼän. Stapeʼ kʼo kejqalem, e kʼïy winäq man nkikanoj ta kiqʼalajrisaxik. ¿Achike ruma? ¿Yeqïl kami kiqʼalajrisaxik chupam ri Biblia? E kʼïy winäq nkibʼij chi ri nubʼij ri Biblia kan kʼayew nqʼax chawäch. E kʼo chik jujun, nkinaʼ chi xa nbʼan yoqʼonïk chi kij we yekibʼän re kʼutunïk reʼ. Chuqaʼ e kʼo yebʼin chi re kʼutunïk reʼ xa xe ri ukʼwäy taq bʼey pa taq religiones etamayon. ¿Achike nabʼij rat?

4, 5. ¿Achike jujun chi ke ri kʼutunïk ütz yeqabʼän, chuqaʼ achike ruma ütz yeqakanoj kiqʼalajrisaxik?

⁴ Rat nawajoʼ na wi nawetamaj kiqʼalajrisaxik ri kʼutunïk kʼo kejqalem pa akʼaslem. Rikʼin bʼaʼ abʼanon qa chawäch re kʼutunïk reʼ: «¿Achike ruma xojaläx? ¿Xa xe re jun rubʼeyal kʼaslem reʼ kʼo? ¿Achike rubʼanik ri Dios?». Kan kʼo rejqalem yeqabʼän re kʼutunïk reʼ chuqaʼ nqakanoj kiqʼalajrisaxik. Ri Jesucristo, ri nimaläj tijonel, xubʼij: «Tikʼutuj kʼa ri nkʼatzin chiwe, y ri Dios kan xtuyaʼ kʼa pe. Tikanoj, y xtiwïl ri niwajoʼ. Kixoyon, y kan xkixakʼaxäx kʼa pe» (Mateo 7:7).

⁵ We rat man xkakos ta nakanoj kiqʼalajrisaxik ri nimaläj taq kʼutunïk, xtqʼalajin chawäch chi ütz ri najin nabʼän (Proverbios 2:1-5). Xa bʼa achike na kibʼin ri winäq chawe, re kʼutunïk reʼ kʼo kiqʼalajrisaxik chuqaʼ man kʼayew ta nawïl. Yeqïl chupam ri Biblia chuqaʼ man kʼayew ta yeqʼax chi qawäch. Ri kiqʼalajrisaxik ri kʼutunïk, nkibʼän chi qe chi yojkikot wakami y nkisüj urtusanïk pa qawiʼ chi qawäch apo. Tqatikirisaj rikʼin jun kʼutunïk ri rubʼanon chi janila yebʼison ri winäq.

6. ¿Achike ruma e kʼïy yebʼin chi ri Dios majun achike ta chuwäch chi nqatïj poqonal?

⁶ E kʼïy winäq yebʼin chi jaʼ. «Xa ta ri Dios qitzij yojrajoʼ, manäq ta tijoj poqonal», yechaʼ. Wakami ruyon oyowal (chʼaʼoj), itzelal chuqaʼ qʼaxomal e kʼo. Qonojel yojyawäj, nqatïj poqonal chuqaʼ yekäm ri qachʼalal. Ruma riʼ e kʼo winäq yebʼin: «Xa ta ri Dios qitzij yojrajoʼ, ¿achike ruma man relesan ta el ronojel re kʼayewal reʼ?».

7. a) ¿Achike ruma nqabʼij chi e kʼïy ukʼwäy taq bʼey pa taq religiones nkikʼüt chi ri Dios achiʼel ta abʼäj ranima? b) ¿Achike nubʼij ri Biblia chi kij ri kʼayewal e kʼo pa qawiʼ?

⁷ Chuqaʼ e kʼïy ukʼwäy taq bʼey pa taq religiones nkibʼij chi ri Dios achiʼel ta abʼäj ranima. Jun tzʼetbʼäl. Toq kʼo jun nbʼanatäj, rijeʼ nkibʼij chi ja riʼ nrajoʼ ri Dios. Toq nkibʼij reʼ, achiʼel ta nkiqʼabʼaj chi rij ri Dios ri itzelal yebʼanatäj. ¿Qitzij riʼ? ¿Achike nubʼij ri Biblia? Habacuc 1:13 nubʼij: «Rat Jehová kan at chʼajchʼöj y man naköchʼ ta natzʼët ri mak. Chuqaʼ man naköchʼ ta natzʼët ri itzelal nbʼanatäj». Rikʼin reʼ nqʼax chi qawäch, chi ri kʼayewal e kʼo chi Ruwachʼulew man ja ta ri Dios yayon pe (tasikʼij Job 34:10-12). Qitzij na wi, rijaʼ ruyaʼon qʼij chi yebʼanatäj; ja kʼa man junan ta ri nayaʼ qʼij rikʼin ri rat yabʼanon.

8, 9. a) ¿Achike ruma man junan ta ri nayaʼ qʼij nbʼanatäj jun itzelal rikʼin ri nabʼän ri itzelal? Tayaʼ jun tzʼetbʼäl. b) ¿Achike ruma man ütz ta yojchʼon chi rij ri Dios ruma ruyaʼon qʼij chi ke ri winäq nkibʼän ri nkajoʼ?

⁸ Reʼ achiʼel ta jun utziläj tataʼaj y ajnaʼoj, ri kʼo jun rukʼajol rikʼin pa rachoch. Toq re alaʼ reʼ man nniman ta chik tzij chuqaʼ xa nrajoʼ nel el rikʼin ri rutataʼ; ri rutataʼ man nuqʼät ta chuwäch ri nrajoʼ nubʼän. Toq ri alaʼ nbʼe, ruyon itzel taq bʼanobʼäl yerubʼän, ruma riʼ yepe kʼayewal chi rij. ¿Nabʼij kami rat chi ja ri rutataʼ xyaʼon pe ri kʼayewal pa ruwiʼ? Manäq (Lucas 15:11-13). Ke riʼ chuqaʼ chi kij ri winäq, ri Dios man ruqʼaton ta chi kiwäch ri achike nkajoʼ nkibʼän.  Ri ruyaʼon qʼij, man nel ta chi tzij, rijaʼ nyaʼon pe ri kʼayewal kikanon qa pa kiwiʼ. Ruma riʼ man ütz ta nqaqʼabʼaj chi rij ri Dios ri tijoj poqonal e kʼo pa qawiʼ.

⁹ Ri Dios kʼo achoj ruma ruyaʼon qʼij chi ke ri winäq nkibʼän ri nkajoʼ. Rijaʼ kʼo runaʼoj chuqaʼ rijaʼ oj bʼanayon, ruma riʼ majun ruma nutzijoj chi qe achike ruma ruyaʼon qʼij kʼo ri itzelal. Rijaʼ nubʼij ronojel chi qe ruma yojrajoʼ. Chupam ri tanaj 11 xtqetamaj achike ruma ruyaʼon qʼij kʼo ri itzelal. Wakami, tqayaʼ rikʼin qanima chi man rumak ta ri Dios ri yeqïl kʼayewal. Rijaʼ pa rukʼexel yeruyaʼ pe ri kʼayewal, xa nukuqubʼaʼ qakʼuʼx chi jun qʼij xtkʼis kiwäch (Isaías 33:2).

10. ¿Achike ruma ütz nqakuqubʼaʼ qakʼuʼx chi ri Dios kan xtrelesaj el ri itzelal e kʼo pa qawiʼ?

¹⁰ Ri Dios loqʼoläj (Isaías 6:3). Reʼ nel chi tzij chi chʼajchʼöj ranima, majun itzelal ta nubʼän. Ruma riʼ ütz nqakuqubʼaʼ qakʼuʼx chi rij y man chi rij ta jun winäq. Stapeʼ jun qʼatöy tzij ütz runaʼoj, man ntikïr ta nuchojmirisaj ri itzelal yekibʼän ri winäq. Xa xe ri Dios kʼo ruchuqʼaʼ richin nubʼän ronojel. Rijaʼ ntikïr nrelesaj el ri tijoj poqonal ruyaʼon ri itzelal. Ruma riʼ xtrelesaj el. Toq xtubʼän riʼ, jumul xtuchüp ruwäch ri itzelal (tasikʼij Salmo 37:9-11).

11. a) ¿Achike rubʼanik nutzʼët ri Dios toq nyaʼöx kʼayewal pa kiwiʼ ri winäq? b) ¿Achike nunaʼ ri Dios toq nqatïj poqonal?

¹¹ Wakami, ¿achike nunaʼ ri Dios chi rij ri itzelal najin chi Ruwachʼulew chuqaʼ ri kʼayewal yeqïl pa qakʼaslem? Ri Biblia nubʼij chi ri Dios nrajoʼ chi pa ‹ruchojmil› nbʼan ronojel (Salmo 37:28). Rijaʼ nutzʼët pe we ütz o man ütz ta yekibʼän ri winäq. Chuqaʼ itzel nutzʼët ri kʼayewal nyaʼöx pa kiwiʼ ri winäq. Ri Biblia nubʼij chi ri «Jehová janila xbʼison» toq ri Ruwachʼulew xnoj ruwäch chi itzelal ojer kan (Génesis 6:5, 6). Rijaʼ man rujalon ta runaʼoj (Malaquías  3:6). Itzel nutzʼët ri itzelal chuqaʼ nujoyowaj kiwäch ri nkitïj poqonal. Ri Biblia nubʼij: «Rijaʼ kan yixruchajij wi» (tasikʼij 1 Pedro 5:7).

12, 13. a) ¿Achike ruma röj winäq yojajowan, chuqaʼ achike nubʼän chi qe toq nqatzʼët ri tijoj poqonal? b) ¿Achike ruma ütz nqakuqubʼaʼ qakʼuʼx chi ri Dios kan xtuchüp wi ri kʼayewal chi Ruwachʼulew?

¹² ¿Achike ruma nqabʼij chi ri Dios nqʼaxon ranima toq nutzʼët chi röj nqatïj poqonal? Ri Biblia nubʼij chi toq ri Dios xubʼän ri achin, kan achiʼel rubʼanik runaʼoj rijaʼ xubʼän chi re (Génesis 1:26). Ruma riʼ ri ütz qanaʼoj nqabʼän, retal chi ri Dios ke riʼ runaʼoj. Jun tzʼetbʼäl. Toq röj nqatzʼët jun utziläj winäq nutïj poqonal, ¿pejaʼ nqajoyowaj ruwäch? We ke riʼ, tkʼojeʼ chi qakʼuʼx chi ri Dios más nqʼaxon ranima chi qawäch röj.

¹³ Jun utziläj naʼoj ri kʼo qikʼin röj winäq, ja ri yojajowan. Riʼ jun chik naʼoj ri qakʼamon apo röj chi rij ri Dios. Ri Biblia nubʼij chi ri «Dios kan ajowabʼäl wi» (1 Juan 4:8, CO). Röj yojajowan ruma ri Dios najowan. Xa ta rat yatikïr nawelesaj el ri itzelal chuqaʼ ri tijoj poqonal chi Ruwachʼulew, ¿pejaʼ yeʼawelesaj el? Ja ri ajowabʼäl xtbʼanon chawe chi xtabʼän riʼ. Ruma riʼ tkʼojeʼ chi akʼuʼx chi ri Dios xtuchüp kiwäch ri kʼayewal chi Ruwachʼulew. Ri urtusanïk xeqasikʼij chupam ri nabʼey taq ruxaq re wuj reʼ, man choj ta jun achïkʼ. Reʼ ja ri Dios bʼiyon y kan qitzij xkebʼanatäj. Richin qitzij xtubʼän chi qawäch, nkʼatzin nqetamaj más ruwäch ri Dios ri sujuyun riʼ.

14. ¿Achike rubʼiʼ ri Dios chuqaʼ achike ruma ütz nqakusaj?

¹⁴ ¿Achike nabʼän rat toq nawajoʼ chi jun winäq nretamaj awäch? ¿Pejaʼ ke nabʼij apo abʼiʼ chi re? ¿La kʼo chuqaʼ rubʼiʼ ri Dios? E kʼïy religiones nkikʼüt chi rijaʼ «Dios» o «Tataʼixel» rubʼiʼ. Ja kʼa we nqatzʼët, re tzij reʼ man bʼiʼaj ta. Reʼ xa choj achiʼel toq nqabʼij «qʼatöy tzij» o «ukʼwäy bʼey» chi re jun winäq. Qitzij na wi, ri Biblia nubʼij chi ri Dios kan nbʼïx wi «Dios» chuqaʼ «Tataʼixel» chi re. Chuqaʼ nubʼij chi rijaʼ kʼo rubʼiʼ: Jehová rubʼiʼ. Ri Salmo 83:18, nubʼij:  «Ri abʼiʼ rat, Jehová, y chi kan xa xe rat yaqʼaton tzij pa ruwiʼ ri ruwachʼulew». We ri Biblia kʼo awikʼin rat, man kʼo ta re bʼiʼaj reʼ chupam, tasikʼij achike ruma chupam ri tzijonem «Rubʼiʼ ri Dios: ri nubʼij chuqaʼ ri rukusaxik». Toq ri Biblia xtzʼibʼäx nabʼey mul, pa mil mul nawïl rubʼiʼ ri Dios chupam. Ruma riʼ ri Jehová nrajoʼ chi rat nawetamaj rubʼiʼ chuqaʼ nakusaj. Ri Dios nukusaj ri Biblia richin nqetamaj ruwäch.

15. ¿Achike nubʼij ri bʼiʼaj Jehová?

¹⁵ Ja ri Dios xkanon qa ri rubʼiʼ: Jehová. Re bʼiʼaj reʼ kʼïy achike nubʼij. Nubʼij chi rijaʼ ntikïr nuyaʼ ronojel ri rusujun chuqaʼ nubʼän ronojel ri nrajoʼ rijaʼ. * Ri bʼiʼaj Jehová kan xa xe wi richin ri Dios. Ri Jehová kan majun achoj rikʼin ta junumatäl wi y kʼïy ruma ri ke riʼ rubʼanik. Tqatzʼetaʼ jujun.

16, 17. ¿Achike nkibʼij chi rij ri Jehová re tzij reʼ: a) ‹Kʼo ronojel uchuqʼaʼ pa ruqʼaʼ›? b) «Rey [...] tbʼe qʼij tbʼe säq»? c) Chuqaʼ, ¿achike chik jun nbʼïx chi re ri Jehová?

 ¹⁶ Ri Salmo 83:18 nubʼij chi rij ri Jehová: «Kan xa xe rat yaqʼaton tzij pa ruwiʼ ri ruwachʼulew». Chuqaʼ ri Apocalipsis 15:3 nubʼij: «Ajaw Dios, ri kʼo ronojel uchuqʼaʼ pa aqʼaʼ. Rat [...] nimaʼq taq bʼanobʼäl [...] yeʼabʼän. Kan qitzij y choj ri abʼey, y ja rat ri rey kichin konojel ajawaren». Ri 1 Timoteo 1:17 chuqaʼ nubʼij chi rij ri Dios: «Ja rijaʼ ri rey [...] tbʼe qʼij tbʼe säq». Toq nbʼïx chi ‹kʼo ronojel uchuqʼaʼ pa ruqʼaʼ› ri Dios; nel chi tzij, majun achike ta nilon ri ruchuqʼaʼ. Ja kʼa toq nbʼïx: «Rey [...] tbʼe qʼij tbʼe säq», nubʼij chi xa xe rijaʼ ri kʼojeynäq pe. Ri Salmo 90:2 chuqaʼ nubʼij chi «tbʼe qʼij tbʼe säq, kan xa xe wi rat ri at Dios». ¿Pejaʼ kan achike la yeʼawakʼaxaj re tzij reʼ?

¹⁷ Ronojel ri kʼo, ja ri Jehová bʼanayon. Reʼ jun chik ruma toq rijaʼ man junumatäl ta. Ri Apocalipsis 4:11 nubʼij: «Qajaw Dios, kan rukʼamon kʼa chi nakʼül aqʼij akʼojlem y ronojel uchuqʼaʼ. Kan ja rat kʼa xabʼanon ronojel ri kʼo y xeʼakʼiytisaj». Ronojel ri e kʼo ja ri Dios e bʼanayon, achiʼel ri ángeles ri man yeqatzʼët ta, ri chʼumilaʼ, ri kiwäch taq cheʼ, ri kär pa taq yaʼ chuqaʼ ronojel ri yeqatzʼët.

18. ¿Achike ruma e kʼo yebʼin chi majubʼey xketikïr ta xkekʼojeʼ chunaqaj ri Dios, chuqaʼ achike nubʼij ri Biblia chi rij reʼ?

¹⁸ E kʼo winäq nkixibʼij bʼaʼ kiʼ chuwäch ri Jehová ruma nimaläj ruqʼij. Nkibʼij chi janila näj kʼo chi qawäch röj winäq o rijaʼ man yojrajoʼ ta. ¿Kan qitzij ri jun naʼoj riʼ? Manäq, ri Biblia nubʼij chi ri Jehová «man näj ta kʼo wi, xa kan naqaj kʼo wi pe chi qe» (Hechos 17:27). Chuqaʼ nubʼij: «Kixjel apo rikʼin ri Dios, y rijaʼ chuqaʼ xtjel pe iwikʼin» (Santiago 4:8).

19. a) ¿Achike ütz nabʼän richin yakʼojeʼ chunaqaj ri Dios, chuqaʼ achike nukʼäm pe pa awiʼ ri nabʼän riʼ? b) ¿Achike naʼoj kʼo rikʼin ri Dios más nqa chawäch rat?

 ¹⁹ ¿Achike ütz nabʼän richin yakʼojeʼ chunaqaj ri Dios? Jun rubʼanik ja ri nawetamaj ruwäch rijaʼ, achiʼel najin nabʼän wakami. Ruma riʼ man tayaʼ kan rubʼanik reʼ. Ri Jesús xubʼij: «Ri kʼaslem man kʼisel ta, ja ri nketamaj awäch rat nataʼ Dios, [ri qitzij Dios] y chuqaʼ nketamaj nuwäch rïn [...] ri Cristo» (Juan 17:3). Ri Biblia nubʼij chi ri nawetamaj chi rij ri Jehová chuqaʼ chi rij ri Jesús yarukʼwaj chupam ri «kʼaslem man kʼisel ta». Xawetamaj yan chi ri «Dios kan ajowabʼäl wi» (1 Juan 4:16, CO). Ri Jehová man xa xe ta kʼa ajowabʼäl kʼo rikʼin, kʼo chik más naʼoj rikʼin. Ri Biblia nubʼij chi rijaʼ joyowanel, kochʼonel, man chanin ta npe royowal, nïm rujoyowanïk y kan nubʼän ri nubʼij (Éxodo 34:6). Chuqaʼ nubʼij chi ri Dios janila ütz chuqaʼ kuyunel (Salmo 86:5). Toq nasikʼij ri Biblia nqʼalajin chawäch chi kan ja riʼ wi runaʼoj ri Dios.

20-22. a) ¿Yojtikïr yojkʼojeʼ chunaqaj ri Dios stapeʼ man nqatzʼët ta? Taqʼalajrisaj. b) Rikʼin bʼaʼ ¿achike xtkibʼij ri winäq chawe? Ja kʼa, ¿achike ütz nabʼän rat?

²⁰ Qitzij na wi, ri Dios man yojtikïr ta nqatzʼët, ruma rijaʼ jun espíritu (Juan 1:18; 4:24; 1 Timoteo 1:17). Stapeʼ ke riʼ, ri Biblia nutzijoj achike rubʼanik rijaʼ. Achiʼel xubʼij ri salmista, röj yojtikïr nqatzʼët rubʼanik runaʼoj ri Dios (Salmo 27:4; Romanos 1:20). Toq más nqetamaj chi rij rijaʼ más qitzij Winäq nubʼän chi qawäch, más nqajoʼ chuqaʼ nqanaʼ chi más naqaj oj kʼo rikʼin.

²¹ Eqal eqal xtawetamaj achike ruma ri Biblia nubʼij chi tqatzʼetaʼ ri Dios achiʼel jun tataʼaj (Mateo 6:9). Ri Dios xuyaʼ ri qakʼaslem chuqaʼ nrajoʼ chi ütz rukusaxik nqabʼän chi re. Achiʼel nubʼän jun utziläj tataʼaj ri nrajoʼ ri ütz pa kiwiʼ ri ralkʼwal (Salmo 36:9). Ri Biblia nukʼüt chuqaʼ chi röj winäq yojtikïr yojok rachibʼil ri Jehová (Santiago 2: 23, TNM). ¡Jun nimaläj urtusanïk ri yojtikïr yojok rachibʼil ri xbʼanon ri kaj chuqaʼ ri Ruwachʼulew!

²² Toq nawetamaj más chi rij ri Biblia, rikʼin bʼaʼ e kʼo winäq xtkibʼij chawe chi tayaʼ kan ri atijonïk. Ruma chi kiwäch rijeʼ najin yatkitoʼ o rikʼin bʼaʼ ruma man nkajoʼ ta chi rat najäl ri animan pe. Ja kʼa man tayaʼ qʼij chi nkiqʼät chawäch yatok rachibʼil ri nimaläj Dios.

23, 24. a) ¿Achike ruma ütz yeʼabʼän kʼutunïk chi rij ri najin nawetamaj? b)  ¿Achike xtqetamaj chupam ri jun chik tanaj?

²³ Toq kʼa riʼ natikirisaj ri atijonïk kʼïy naʼoj man xkeqʼax ta chawäch. Ja kʼa mani yakʼïx nakʼutuj atoʼik. Ri Jesús xubʼij chi majun achike ta nubʼän nqaqasaj qiʼ achiʼel nubʼän jun akʼwal (Mateo 18:2-4). Röj qetaman chi ri akʼwalaʼ qʼij qʼij yekibʼän kʼutunïk. Ri Dios nrajoʼ chi rat nawïl kiqʼalajrisaxik ri akʼutunïk. Ri Biblia nubʼij chi e kʼo jujun winäq ojer kan janila xqa chi kiwäch xketamaj ruwäch ri Dios. Ruma riʼ xkinikʼoj rupam ri Ruchʼabʼäl ri Dios. Chuqaʼ ronojel ri xtzijöx chi ke xkitzʼët na nabʼey we qitzij o man qitzij ta ri xbʼïx chi ke (tasikʼij Hechos 17:11).

²⁴ Ri rubʼanik más ütz nawetamaj ruwäch ri Jehová ja ri nasikʼij ri Biblia, jun wuj, ri kan jun wi chi kiwäch ri más wuj. ¿Achike ruma jun wi chi kiwäch ri más wuj? Riʼ xtqetamaj chupam ri jun chik tanaj.