1. ¿Achike utzil nukʼäm pe ri nqayaʼ ruqʼij ri Dios achiʼel nrajoʼ rijaʼ?

RI Jehová janila yojrajoʼ. Richin ütz yojbʼe pa qakʼaslem, rijaʼ nrajoʼ nukʼwaj qabʼey. We nqayaʼ ruqʼij achiʼel nrajoʼ rijaʼ, xtqïl kikotem chuqaʼ xtqaköl qiʼ chi kiwäch kʼïy kʼayewal. Man xa xe ta kʼa riʼ, rijaʼ xtkikot qikʼin chuqaʼ xkojrutoʼ (Isaías 48:17). Wakami kʼïy religiones e kʼo. Stapeʼ konojel nkibʼij chi nkikʼüt ri qitzij chi rij ri Dios, jujun wi ketamabʼal chi rij chuqaʼ chi rij ri nrajoʼ rijaʼ ri kʼo chi nqabʼän.

2. ¿Achike rubʼanik nawetamaj ri qitzij rubʼeyal nyaʼöx ruqʼij ri Jehová, chuqaʼ achoj rikʼin ütz najunumaj reʼ?

² ¿Achike rubʼanik nawetamaj ri rubʼeyal nyaʼöx ruqʼij ri Dios? Richin reʼ man nkʼatzin ta nawetamaj na ri nkikʼüt ri religiones o yeʼajunumaj chi kijujunal. Xa xe nkʼatzin natzʼët achike qas nukʼüt ri Biblia chi rij ri rubʼeyal nyaʼöx ruqʼij ri Dios. Jun tzʼetbʼäl. Wakami, e kʼïy winäq yekibʼän kiwachibʼäl ri pwäq. We nbʼïx ta chawe rat chi keʼajachaʼ ri qitzij taq pwäq chi kikojöl ri man e qitzij ta, ¿achike rubʼanik xtawetamaj achike ri e qitzij chuqaʼ ri man e qitzij ta? ¿Nabʼey kami xtayaʼ pa ajolom ronojel ri ketal ri man e qitzij ta? ¿Pejaʼ más na wi ütz nawetamaj ruwäch ri qitzij pwäq? Toq ütz xtawetamaj ruwäch ri qitzij pwäq,  man kʼayew ta xtqʼalajin chawäch ri man e qitzij ta. Ke riʼ kʼa chuqaʼ chi kij ri religiones, toq qetaman achike ri qitzij religión, man kʼayew ta xtqʼalajin chi qawäch ri man e qitzij ta.

3. ¿Achike nrajoʼ ri Dios chi nqabʼän?

³ Kʼo rejqalem ri nqayaʼ ruqʼij ri Jehová achiʼel nrajoʼ rijaʼ. E kʼïy yebʼin chi ronojel religiones yeqa chuwäch. Ri naʼoj riʼ man nukʼüt ta ri Biblia. Chuqaʼ man xa xe ta nabʼij chi at runimanel ri Jesús, ruma rijaʼ xubʼij: «Man konojel ta kʼa ri winaqiʼ ri yebʼin chwe ¡Wajaw! ¡Wajaw! ri xkeʼok chupam ri aj chikajil ajawaren. Ruma xa kan xa xe ri winaqiʼ [...] nkibʼän ri rurayibʼal ri nataʼ [...] xkeʼok chupam ri ajawaren». Ri Dios xtkikot qikʼin we xtqetamaj chuqaʼ xtqabʼän ri nukʼutuj chi qe. Ri Jesús «bʼanöy taq itzelal» xubʼij chi ke ri man nkibʼän ta nrajoʼ ri Jehová (Mateo 7:21-23). Ri religión man qitzij ta, achiʼel ruwachibʼäl ri pwäq: majun rejqalem ta, xa kʼayewal nukʼäm pe.

4. ¿Achoj chi rij yechʼon ri bʼey xerutzijoj ri Jesús chuqaʼ akuchi (apeʼ) yojkikʼwaj?

⁴ Ri Jehová chi ke konojel winäq nusüj ri kʼaslem man kʼisel ta. Richin xtqïl ri kʼaslem riʼ chuwäch ri Kotzʼijaläj Ulew, kʼo chi nqayaʼ ruqʼij ri Jehová chuqaʼ nqabʼän ri nqa chuwäch. Man konojel ta winäq nkibʼän ri nrajoʼ rijaʼ. Ruma riʼ ri Jesús xubʼij: «Kixok kʼa chupam ri okibʼäl [...] janila latzʼ. Ruma [...] ri bʼey ri nkʼamon pe ri kamïk janila nïm ruwäch; y e janila [...] yeʼok ri chi riʼ. Ja kʼa kan janila ok latzʼ ri okibʼäl y koʼöl ok ruwäch ri bʼey ri nkʼamon pe ri kʼaslem, y man e kʼïy ta ri yeʼilon» (Mateo 7:13, 14). Rikʼin reʼ nqʼalajin chi ri qitzij religión yojrukʼwaj chupam ri kʼaslem; ja kʼa ri man qitzij ta, pa kamïk. Ri Jehová nrajoʼ chi konojel ta ri winäq nkïl ri kʼaslem man kʼisel ta, ruma riʼ nrajoʼ chi konojel ta nketamaj ruwäch (2 Pedro 3:9). Ri rubʼanik nqayaʼ ruqʼij ri Jehová xtuyaʼ qakʼaslem o xkojrukʼwaj pa kamïk.

5. ¿Achike rubʼanik nqetamaj kiwäch ri e kʼo chupam ri qitzij religión?

⁵ ¿Achike rubʼeyal nqïl ri bʼey yojukʼwan chupam ri kʼaslem? Ri Jesús xubʼij chi man kʼayew ta xtqʼalajin achike winäq e kʼo chupam ri qitzij religión we nqatzʼët ri kibʼanobʼal. Ri Jesús xubʼij: «Xtiwetamaj kʼa kiwäch ri winaqiʼ ruma ri kibʼanobʼal», achiʼel «jun utziläj cheʼ nuyaʼ utziläj taq ruwäch» (Mateo 7:16, 17). Reʼ nel chi tzij chi ri e kʼo chupam ri qitzij religión, man junan ta ri kinimanïk chuqaʼ ri kibʼanobʼal kikʼin ri más winäq. Stapeʼ e ajmakiʼ, toq xa jun nabʼän chi ke konojel, nqʼalajin chi nkibʼän ri nrajoʼ ri Jehová. Tqatzʼetaʼ waqiʼ ketal.

6, 7. ¿Achike nkibʼij ri qitzij taq nimanelaʼ chi rij ri Biblia, chuqaʼ achike rubʼanik ri Jesús xuyaʼ jun tzʼetbʼäl chi rij riʼ?

⁶ Ri qitzij religión nukʼüt ri kʼo chupam ri Biblia. Kan ja ri Biblia nbʼin chi «ronojel ri tzʼibʼatäl, kan ja ri Dios ri xbʼanon chi xtzʼibʼatäj kan. Y ruma riʼ ütz nukusäx richin tijonïk, [...] richin nqʼalajrisäx chi re jun chik chi tujalaʼ rukʼaslem, chuqaʼ richin nbʼïx achike rubʼanik jun kʼaslem choj. Richin chi ri rusamajel ri Dios kan ta tzʼaqät [...] richin [...] nubʼän ronojel ri utziläj samaj» (2 Timoteo 3:16, 17). Ri apóstol Pablo xubʼij el chi ke ri nimanelaʼ: «Toq xqatzijoj ri ruchʼabʼäl ri Dios chiwe, kan xikʼül wi. Y man xibʼij ta qa chi ruchʼabʼäl winäq, xa kan xibʼij chi kan ruchʼabʼäl wi ri Dios» (1 Tesalonicenses 2:13). Ruma riʼ ri nukʼüt ri qitzij religión chuqaʼ ri kibʼanobʼal ri ruwinaq, man chi rij ta kinaʼoj ri winäq petenäq wi. Reʼ chupam ri Biblia elesan wi.

⁷ Ronojel ri xukʼüt ri Jesús chupam ri Ruchʼabʼäl ri Dios xrelesaj wi, ruma riʼ rijaʼ xyaʼon ri tzʼetbʼäl riʼ. Jun qʼij toq xchʼon rikʼin Rutataʼ xubʼij: «Ri achʼabʼäl ja riʼ ri qitzij» (Juan 17:17). Ri Jesús kan nunimaj wi ri Ruchʼabʼäl ri  Dios. Ruma riʼ jutaqïl xubʼij: «Tzʼibʼatäl kan», chi rij riʼ nusikʼij apo jun texto (Mateo 4:4, 7, 10). Ke riʼ chuqaʼ ri qitzij taq nimanelaʼ wakami, man kinaʼoj ta rijeʼ ri nkikʼüt. Chi kiwäch rijeʼ ri Biblia kan Ruchʼabʼäl wi ri Dios, ruma riʼ ri nkikʼüt chupam reʼ nkelesaj wi.

8. ¿Achike jun rubʼanik nyaʼöx ruqʼij ri Jehová?

⁸ Ri e kʼo chupam ri qitzij religión xa xe ri Jehová nkiyaʼ ruqʼij chuqaʼ nkikʼüt ri rubʼiʼ. Ri Jesús xubʼij: «Tiyaʼ kʼa ruqʼij ri Jehová ri qa-Dios y kan tisamajij xa xe rijaʼ» (Mateo 4:10). Ruma riʼ ri rusamajelaʼ ri Jehová xa xe rijaʼ nkiyaʼ ruqʼij. Ri nkikʼüt ri rubʼiʼ chuqaʼ ri runaʼoj, jun rubʼanik nkiyaʼ ruqʼij. Ri Salmo 83:18 nubʼij: «Ri abʼiʼ rat, Jehová, y [...] kan xa xe rat yaqʼaton tzij pa ruwiʼ ri ruwachʼulew». Ja ri Jesús xyaʼon kan ri tzʼetbʼäl chi yetoʼöx ri winäq richin nketamaj ruwäch ri Dios. Ri Jesús xubʼij chi re ri Rutataʼ: «Xinbʼän kʼa chi xqʼalajin wi ri abʼiʼ chi kiwäch» ri winäq (Juan 17:6). Ke riʼ chuqaʼ wakami, ri qitzij taq nimanelaʼ nkikʼüt ri rubʼiʼ, ri runaʼoj chuqaʼ ri nrajoʼ ri Jehová.

9, 10. ¿Achike rubʼanik nkajoʼ kiʼ ri qitzij taq runimanelaʼ ri Jesús?

⁹ Ri rusamajelaʼ ri Dios qitzij nkajoʼ kiʼ. Ri Jesús xubʼij: «We kan xtiwajowalaʼ iwiʼ [...], ri winaqiʼ kan xtketamaj chi ix nutijoxelaʼ» (Juan 13:35). Ri nabʼey taq nimanelaʼ kan xkajoʼ wi kiʼ. Ri ajowabʼäl nubʼän chi ri qitzij taq nimanelaʼ wakami, man nkitzʼët ta kijatzul, kitinamit chuqaʼ kibʼeyomal; rijeʼ xa jun kiwäch y qitzij nkajoʼ kiʼ (tasikʼij Colosenses 3:14). Ri e kʼo chupam ri religiones ri man e qitzij ta, manäq re ajowabʼäl reʼ kikʼin. Rijeʼ nkikamisalaʼ kiʼ chi kiwäch ruma ri kijatzul o kitinamit. Ri qitzij taq nimanelaʼ majun kikʼwan ta kiqʼaqʼ chi kij ri kachʼalal chuqaʼ chi kij ri más winäq. Ri Biblia nubʼij: «Nqʼalajin ri achike ri e ralkʼwal ri Dios y ri e ralkʼwal ri Itzel Winäq. Ja kʼa ri man chojmiläj kʼaslem ta kikʼwan y man yekajoʼ ta ri kachʼalal, man e richin ta ri Dios». Ruma riʼ kʼo chi nqajoʼ qiʼ,  «man tqabʼän achiʼel xubʼän ri Caín ojer kan. Rijaʼ kan richin wi ri Itzel Winäq y kan xukamisaj ri Abel ri ruchaqʼ» (1 Juan 3:10-12; 4:20, 21).

¹⁰ Ri qitzij ajowabʼäl nubʼän chawe chi man yeʼakamisaj ta ri winäq, chuqaʼ man xa xe ta riʼ nubʼän. Ri qitzij taq nimanelaʼ nkijäm kiwäch, nkikuqubʼalaʼ kikʼuʼx, nkiyaʼ kuchuqʼaʼ chuqaʼ ri kʼo kikʼin richin nkitoʼ kiʼ (Hebreos 10:24, 25). Nkitoʼ kiʼ toq yepe kʼayewal pa kiwiʼ chuqaʼ choj kanima kikʼin ri winäq. Rijeʼ nkibʼän reʼ: «Toq nqatzʼët xa bʼa achike winäq ri kʼo nkʼatzin chi re, kan tqatoʼ kʼa» (Gálatas 6:10).

11. ¿Achike ruma nkʼatzin nqanimaj chi ri Dios ja ri Jesús rukusan richin yojruköl?

¹¹ Ri qitzij taq nimanelaʼ kiniman chi ri Dios ja ri Jesús rukusan richin yojruköl. Ri Biblia nubʼij: «Majun chik achoj rikʼin nqïl wi kolotajïk. Ruma chi kan majun chik jun bʼiʼaj ri yaʼon ta pe [...] richin [...] yojkolotäj» (Hechos 4:12, CO). Achiʼel xqatzʼët chupam ri tanaj 5, ri Jesús xuyaʼ rukʼaslem richin yeruköl ri yeniman tzij (Mateo 20:28). Chuqaʼ rijaʼ ri xchaʼöx richin xtqʼaton tzij pa ruwiʼ ri Ruwachʼulew. Ruma riʼ ri Dios nrajoʼ chi nqanimaj chuqaʼ nqabʼän ri xukʼüt ri Jesús. Xa xe ke riʼ xtqïl ri kʼaslem man kʼisel ta. Ri Biblia nubʼij: «Ri nukuqubʼaʼ rukʼuʼx rikʼin re kʼajolaxel [...] kʼo rukʼaslem ri man kʼisel ta» (Juan 3:36).

12. ¿Achike nel chi tzij ri man najuʼ ta awiʼ rikʼin ri achike yekibʼanalaʼ ri winäq?

¹² Ri qitzij taq nimanelaʼ man nkijuʼ ta kiʼ pa política. Toq ri Jesús nqʼat wi tzij pa ruwiʼ ruma ri Pilato, ri qʼatöy tzij romano, ri Jesús xubʼij: «Rïn man in rey ta richin re ruwachʼulew» (Juan 18:36). Ruma riʼ ri qitzij taq nimanelaʼ, xa bʼa achike na tinamït e kʼo, nkitaqej rutzij ri Jesús. Rijeʼ man nkijuʼ ta kiʼ pa política chuqaʼ rikʼin ri yekibʼanalaʼ ri winäq. Rijeʼ kijachon kan kiʼ rikʼin ronojel reʼ. Toq ri winäq nkajoʼ nkitoʼ jun partido político o nkajoʼ  yeʼok qa pa qʼatbʼäl tzij chuqaʼ toq nkichaʼ kiqʼatöy tzij, rijeʼ man xtkiqʼät ta chi kiwäch. Stapeʼ man nkiyüj ta kiʼ pa política, nkinimaj ri pixaʼ kiyaʼon ri qʼatbʼäl taq tzij. ¿Achike ruma? Ruma ri Biblia nubʼij chi ri runimanelaʼ ri Jesús ‹nkʼatzin [...] yekinimaj ri qʼatöy taq tzij› (Romanos 13:1). Ja kʼa toq nkitzʼët chi ri nkikʼutuj ri qʼatöy taq tzij nuqʼäj rutzij ri Dios, nkibʼän achiʼel ri apóstoles toq xkibʼij: «Nkʼatzin chi ja ri nubʼij ri Dios ri nqanimaj, y man ja ta ri nkajoʼ ri winaqiʼ» (Hechos 5:29; Marcos 12:17).

13. ¿Achike ruma ri qitzij taq nimanelaʼ nkitzijoj ri Rajawaren ri Dios?

 ¹³ Ri qitzij taq nimanelaʼ nkitzijoj chi xa xe Rajawaren ri Dios xtsolon ri kʼayewal chi Ruwachʼulew. Ri Jesús xubʼij: «Kʼo kʼa chi ntzijöx na [...] ri rajawaren ri Dios chuwäch ronojel re ruwachʼulew, [...] kʼa riʼ toq xtapon ri rukʼisibʼäl qʼij» (Mateo 24:14, CO). Ri qitzij taq nimanelaʼ nkitzijoj chi ja ri Rajawaren ri Dios xtsolon ri kʼayewal e kʼo pa kiwiʼ ri winäq, man ja ta ri qʼatöy taq tzij chi Ruwachʼulew (Salmo 146:3). Ri Jesús xukʼüt chi tqakʼutuj chi re ri Dios chi tpe ri Ajawaren riʼ, rijaʼ xubʼij: «Xtpe yan ta kʼa ri awajawaren. Y kan ja ta kʼa ri nawajoʼ rat ri xtbʼanatäj waweʼ chuwäch re ruwachʼulew, achiʼel nbʼanatäj chi laʼ chi kaj» (Mateo 6:10, CO). Ri Biblia nubʼij chi ri Ajawaren riʼ «xkerukʼïs kʼa ronojel ri qʼatbʼäl taq tzij [...] y ja ri qʼatbʼäl tzij richin rijaʼ ri xtkʼojeʼ jantapeʼ» (Daniel 2:44; Apocalipsis 16:14; 19:19-21).

14. Chawäch rat, ¿achike winäq e kʼo chupam ri qitzij religión?

¹⁴ Rikʼin ri qabʼin pe, takʼutuj qa chawäch: «¿Achike religión nukʼüt ri nubʼij ri Biblia chuqaʼ nutzijoj chi ri Dios Jehová rubʼiʼ? ¿Achike religión kʼo ri qitzij ajowabʼäl rikʼin, nukuqubʼaʼ rukʼuʼx rikʼin ri Jesús, man nujuʼ ta riʼ pa política chuqaʼ nutzijoj chi ja ri Ajawaren xtsolon ri kʼayewal? Chi ke ri religiones e kʼo, ¿achike religión nbʼanon ronojel ri xqatzijoj qa?». Xa xe ri testigos de Jehová nkibʼän ronojel reʼ (tasikʼij Isaías 43:9-12).

15. ¿Achike chik jun nrajoʼ ri Jehová chi nqabʼän?

¹⁵ Richin nkikot ri Jehová qikʼin man xa xe ta nqanimaj chi kʼo rijaʼ, ruma ri itzel taq espíritus nkinimaj chuqaʼ (Santiago 2:19). Ja kʼa röj qetaman chi ri itzel taq espíritus man nkibʼän ta ri nrajoʼ ri Jehová. Ruma riʼ man xa xe ta nqanimaj chi kʼo ri Dios, nkʼatzin nqabʼän ri nrajoʼ rijaʼ.  Chuqaʼ kʼo chi yojel pe chupam ri religión ri man qitzij ta y yojkʼojeʼ chupam ri qitzij.

16. ¿Achike ruma kʼo chi nqayaʼ kan ri religión ri man qitzij ta?

¹⁶ Ri apóstol Pablo xuqʼalajrisaj chi man ütz ta yojkʼojeʼ chupam ri religión ri man qitzij ta. Xubʼij: «Rubʼin ri Ajaw: Kixel pe chi kikojöl ri man e wichin ta rïn. Tichʼaraʼ pe iwiʼ, y man tichäp apo ri xa tzʼiloläj kʼaslem, richin [...] yixinkʼül» (2 Corintios 6:17; Isaías 52:11). Ruma riʼ ri qitzij taq nimanelaʼ man nkibʼän ta rubʼanobʼal ri religión ri man qitzij ta.

17, 18. ¿Achike ri «nimaläj Babilonia», chuqaʼ achike ruma nkʼatzin yojjel pe chi riʼ?

¹⁷ Ri Biblia nubʼij chi ronojel ri religiones ri man e qitzij ta, e kʼo chupam ri «nimaläj Babilonia» (Apocalipsis 17:5, CR). * Re jun bʼiʼaj reʼ nukʼäm pe pa qajolom ri jun ojer tinamït rubʼiʼ Babilonia, akuchi (apeʼ) xtikïr pe ri religión man qitzij ta, toq xqʼax yan ri Kamïk Jöbʼ. E kʼïy bʼanobʼäl chuqaʼ ri yekikʼüt ri religiones wakami, xetikïr pe chupam ri ojer tinamït Babilonia. Ri aj Babilonia nkiyaʼ wi kiqʼij tyoxiʼ ri oxiʼ kikʼwan kiʼ. Wakami, e kʼïy religiones ja ri Trinidad kiyaʼon rejqalem. Ja kʼa ri Biblia nukʼüt chi xa xe jun qitzij Dios kʼo, ja ri Jehová. Chuqaʼ nukʼüt chi ri Jesús Rukʼajol rijaʼ (Juan 17:3). Ri aj Babilonia nkinimaj wi chuqaʼ chi xa xe kichʼakul ri winäq nkäm, ja kʼa ri kanima nkʼaseʼ kan, ke riʼ nutïj poqön pa qʼaqʼ. Wakami, ri religiones nkibʼij chuqaʼ chi ri qanima nkʼaseʼ kan toq yojkäm y rikʼin bʼaʼ nbʼe pa qʼaqʼ.

¹⁸ Ri ki-religión ri ojer taq babilonios xutaluj riʼ ronojel Ruwachʼulew. Ruma riʼ nqabʼij chi ri «nimaläj Babilonia» wakami, nukʼambʼej ronojel religiones ri man e qitzij ta. Ri Dios rubʼin pe chi ri «nimaläj Babilonia» wakami, chaq  kʼateʼ xtitzaq. ¿Nqʼax chawäch achike ruma nkʼatzin yatel pe chi riʼ? Ri Jehová nrajoʼ chi yatel yan pe, ütz kʼa kʼo na bʼaʼ tiempo (tasikʼij Apocalipsis 18:4, 8).

19. ¿Achike utzil xtawïl we xtayaʼ ruqʼij ri Jehová?

¹⁹ Toq rat xtayaʼ kan ri religión man qitzij ta e kʼo na wi winäq man xtkajoʼ ta chik yatkachibʼilaj. Toq rat nayaʼ ruqʼij ri Jehová pa rutinamit, kʼïy utzil xtawïl pa akʼaslem, más chuwäch ri xtayaʼ kan. Rat e kʼïy awachʼalal xkeʼawïl achiʼel xkibʼän ri nabʼey taq rutzeqelibʼey ri Jesús ri xkiyaʼ kan ronojel ruma rijaʼ. Chuqaʼ xkakʼojeʼ pa jun familia ri qitzij xkatkajoʼ. Ri familia riʼ pa millón qitzij taq nimanelaʼ e kʼo chupam y e kʼo ronojel Ruwachʼulew. Jun chik utzil, ja ri xtawïl akʼaslem man kʼisel ta chuwäch ri Kotzʼijaläj Ulew «chi qawäch apo» (tasikʼij Marcos 10:28-30). Rikʼin bʼaʼ kʼo jun qʼij ri winäq xkeyaʼon kan awichin, xtketamaj chi rij ri Biblia, ke riʼ xkeʼok rusamajelaʼ ri Jehová.

20. ¿Achike kʼaslem petenäq chi kiwäch ri e kʼo chupam ri qitzij religión?

²⁰ Ri Biblia nubʼij chi ri Jehová xtuchüp yan ruwäch ri itzelal, ke riʼ xtukʼäm pe ri Rajawaren richin xtkʼojeʼ jun utziläj kʼaslem (2 Pedro 3:9, 13). ¡Jun nimaläj kʼaslem xtubʼän! Chuwäch ri kʼaslem riʼ xa xe ri qitzij religión xtkʼojeʼ. Ruma riʼ takanoj rubʼanik richin yakʼojeʼ chupam ri qitzij religión, ke riʼ xtayaʼ ruqʼij ri Dios achiʼel nrajoʼ rijaʼ.